مستعمل ولا زيرو

[elrasy]

هل فعلا مفيش مستعمل كويس؟
هل اجيب مستعمل واظبطة على مزاجى؟
هل الزيرو اوفر من المستعمل على المدى العيد؟
هل ادفع اللى معايا فى مقدم زيرو احسن ما اجيب مستعمل اصرف علية؟


يا ريت تقولولى رايكم وتجاربكم علشان يستفيد كل اعضاء المنتدى

[ayman_elkholy]

اكيد فيه فى المستعمل حاجات كويسه
انا قبل ما اجيب الكرولا كان معايا لادا كنت جايبها مستعمله من عقيد جيش كانت مثل الزيرو وبامانه على الرغم من الشكوى من الادا لكنى مكنتش باروح للميكانيكى غير مره كل 6 شهور تقريبا عشان اغير طقم كهرباء فقط ماشتكش منها نهائى بس الوضع الاجتماعى فرض عليا التغيير
كتير كانو بيشتكو من العفشه لكنى محستش بالمشكله دى نهائى . وكانت صعبانه عليا جدا وانا با بعها

على فكره العربيه كانت موديل 95 ولما اشتريتها ما صرفتش عليه ولا مليم غير تغير طقم الكهرباء فضلت معايا 6 سنوات ذى الفل

[limo]

زيرو ثم الزيرو ثم الزيرو ثم المستعمل لو العربيه عارف اصلها وفصلها وكانت عامله ايه مع صاحبها

[أبو عبدالله]

طبعا الجديد المعروف ليس كالبطيخه عكس المستعمل مهما كان لا تضمن ان تجده جيد

[أبوسيف]

انا واحد من الناس اللى عانيت من المستعمل ومشاكله وصرفت فلوس كتير على العربية وفى الآخر بعتها وخلاص حرمت. نصيحة هات الزيرو وريح دماغك حتى لو هاتقسط الفرق. أنا عن نفسى هاعمل كدة ان شاء الله.

[Ahmed Anwer]

لست ثريا جدا كي أشتري سيارة مستعملة
هيا دي الخلاصة
و إن كان من واجبنا إن إحنا نوضحلك نقطة إقتصادية اول واحد بيشتري العربية زيرو هوا أكتر واحد بيخسر في العربية
بمعني اخر لو جبت عربية مستعملة ب 40 ألف جنيهة مثلآ لما هتيجي تبيعها اخرك هتخسر فيها خمستلاف جنيه
علي عكس الزيرو اللي بتخسر فيه كتير
يعني لو ناوي تركب زيرو يبقي تعمل حسابك مثلآ إنك كل خمس سنين بتخسر ثلاثين ألف جنيه :?: :?: :?:
مش عارف يا جماعة ممكن تراجعوني أنا حاسس إني كلامي مش صح أوي
لو حطينا إحتمال إن السيارات تغلي ؟؟؟؟؟ قصدي البرايد مثلآ كانت الناس بتجيبها ب 22 ألف زيرو و دلوقتي بعد ما طلعوا عينيها ركوب بيبعوها ب 35 و 37 ألف

[HESHAM AMIN]

لو انت غنى ومستغنى عن وقتك هات مستعمل
ولو انت غلبان زى حلاتى ومعندكش وقت هات زيرو

[sherif Anton]

انا رأيي ان اففضل وضع هو ان العربية تكون كسر الزيرو ... بمعنى ان تكون العربية موديل حديث و عاملة كيلومترات قليلة ...بكده حتحس برفاهية الزيرو وفي نفس الوقت مش حتخسر كتيير في حالة البيع

[PAYOO]

لست ثريا جدا كي أشتري سيارة مستعملة
هيا دي الخلاصة
و إن كان من واجبنا إن إحنا نوضحلك نقطة إقتصادية اول واحد بيشتري العربية زيرو هوا أكتر واحد بيخسر في العربية
بمعني اخر لو جبت عربية مستعملة ب 40 ألف جنيهة مثلآ لما هتيجي تبيعها اخرك هتخسر فيها خمستلاف جنيه
علي عكس الزيرو اللي بتخسر فيه كتير
يعني لو ناوي تركب زيرو يبقي تعمل حسابك مثلآ إنك كل خمس سنين بتخسر ثلاثين ألف جنيه :?: :?: :?:
مش عارف يا جماعة ممكن تراجعوني أنا حاسس إني كلامي مش صح أوي
لو حطينا إحتمال إن السيارات تغلي ؟؟؟؟؟ قصدي البرايد مثلآ كانت الناس بتجيبها ب 22 ألف زيرو و دلوقتي بعد ما طلعوا عينيها ركوب بيبعوها ب 35 و 37 ألف

الكلام ده خلاني أطلع بالنتيجه دي

انا رأيي ان اففضل وضع هو ان العربية تكون كسر الزيرو ... بمعنى ان تكون العربية موديل حديث و عاملة كيلومترات قليلة ...بكده حتحس برفاهية الزيرو وفي نفس الوقت مش حتخسر كتيير في حالة البيع

وفعلا الكلام والنتيجه هم الحل الوسط والامثل لسؤالك


وبالتوفيق إن شاء الله

[goodwave]

زيرو ثم الزيرو ثم الزيرو ........... لا أتفق نهائيا مع اللي بيقول الخسارة في المستعمل قليلة...... حضرتك نسيت تضيف مصاريفك على العربية بعد ما إشتريتها؟ مين فينا إشترى مستعمل وماصرفش علية؟ يبقى خسارتك في المستعمل بتكون نقص سعر إعادة البيع + مصاريفك على العربية...... في كمان حاجة مهمة وهي إنك بتبقى راكب عربية مش عارف فيها إية ومشاكلها فين وممكن تطلعلك مشكلة وإنت مش عارف وأنصحك تكشف على المستعمل كويس علشان تعف كل ثغرة فين...... وكمان أوعى تسافر بيها مشاوير طويلة لوحدك في الاول لانها ممكن تعطل من حيث لا تدري...... ولذلك لو في إمكانية زيرو توكل على الله في الزيرو وإنت مغمض......

لكي لا اغفل المستعمل حقه, هذه مميزات المستعمل:

1- لو جديد في السواقة زي حالاتي الخبطة اثناء الركنة او في الطريق مش حتزعلك أوي.
2-حتمشي في شوارعنا وإنت مش مرعوب إن واحد مستهتر بموتوسيكل او عجلة يخبطك.
3- ودي أهم نقطة إن لا قدر الله لو حصلك ظرف طارئ او مكروة وإحتجت فلوسك ممكن تبيع العربية في الحال وتحل ازمتك... لكن مع الجديد التقسيط في حظر بيع يا حلو! فلو لقيت جديد تقسيط من غير حظر بيع تبقى حليت المعادلة الصعبة............ بالتوفيق إن شاء الله