للحد من الحوادث، او لتخفيف اثارها برجاء استعمال فرامل اليد

[amrico]

السلام عليكم ورحمة الله

في البداية مش عارف لو كان موضوعي ده مكرر في المنتدى ولا لأ وفي حالة اذا كان مكرر اتقدم بإعتذار ضمني لصاحب الموضوع الأصلي مع رجاء من المنتدى برفع الموضوع القديم لأهميته ولتذكير الأعضاء به للوقاية وتخفيف اثار الحوادث

السؤال يا جماعة !! حد بيفكر يستعمل فرامل اليد وهو موجود في الشارع ولا بنستعملها بس في وقت مابنركن العربية؟

انا متأكد ان محدش بيستعملها او قليلين جدا اللي بيستعملوها رغم انها بتكون مفيدة جدا في بعض مواقف هانتعرض ليها هنا

من مبادئ القيادة الوقائية اللي اتعرضنا ليها قبل كدا في مواضيع مختلفة في المنتدى يجب استعمال فرامل اليد في حالة الأنتظار لمدة تزيد مثلا عن 3 ثواني في الطريق لأي سبب من الأسباب، إشارة، طريق عطلان، لجنة ... الخ
ويا ترى عارفين ليه؟
الإجابة عشان لاقدر الله لو حد جاي من وراك ومكانش مسيطر على العربية عنده اكيد عارفين ايه اللي ممكن يحصل
هايروح خابط عربيتك من الخلف وهايدفعها للعربية اللي امامك يعني العربية هاتتعمل سندوتس وهاتكون الخسائر جسيمة، او لو كنت اول واحد واقف في الإشارة ممكن يدفعك لدخول نهر الطريق مع العربيات اللي ماشية عمودي ودي طبعا كارثة (وطبعا بتكلم عن خسائر عربيات بس يعني خسائر مادية مش حياة انسان لا تقدر بثمن)
بعض الناس هايقولك انا بكون دايس على دواسة الفرامل بس تفتكروا ده كفاية؟ اكيد لأ لأنك في حالة التصادم ممكن رجلك تفلت من على الدواسة ممكن رجلك تخف من عليها وبالتالي العربية هاتتحرك
لكن في حالة تفعيل فرامل اليد عربيتك مش هاتتحرك او هاتتحرك حركة بسيطة وهانقلل الخسائر الى اقصى حد

ارجوكم ماتستهروش بالموضوع ده ومحدش يقولي اللي ورايا هايضرب كلاكسات عشان هاتأخر في الحركة على مانزل الفرامل اليد وامشي
هاقولك تجاهله تماما سلامتك اولا وسلامة اولادك

حاجة تانية برضه للتذكير مش للتعريف لأني عارف ان معظم اعضاء المنتدى ماشاء الله سواقين محترفين بس للتذكير ولتعريف اللي ميعرفش محدش ينكر فايدة استعمال فرامل اليد في المطالع وخصوصا لو هاتوقف العربية في المطالع
انا عارف ان معظمنا بيعرف يوازن بين الفرامل والدبرياج والبنزين لأبقاء العربية واقفة في مكانها على المطلع بس ده غلط على اسطوانة الدبرياج فلو مستعمل فرامل اليد هاتخف كتير عن العربية، وليك انك تتخيل ايه اللي ممكن يحصل لو العربية رجعت منك على اللي وراك اكيد موقف مش لطيف ابدا

اتمنى لكم السلامة واسف للإطالة وياريت نطبق الكلام ده

[gade2]

greay greAT

[Moh.Abdelbaset]

حصلت مع والدتي ، كنا واقفين في إشارة ( كان عندنا أكسنت موديل 2000) وورانا فيات 124 و مش فاكر العربية اللي قدامنا كانت إيه
وجه الونش بتاع المرور اللي بيسحب العربيات وراح خابط ال 124 راحت خابطة فينا ( أمي كانت رافعة فرامل اليد و رابطة الحزام) تقريباً اتحركنا حركة بسيطة -بس كانت جامدة -لقدام والعربية محصلش فيها حاجة غير وش الفوانيس الأمامبة اتشرخ و وش الفانوس الخلفي شمال اتكسر وأضرار بسيطة كانت في الشنطة
فعلاً موضوع مهم استعمال فرامل اليد في حالات الانتظار

[jisso82]

على الرغم من بساطة المعلومة زى ما قلت إلا إنها قيمة جدا و فى نفس الوقت طريقة عرضك تدل على إنك إنسان محترم و حابب إنك تنصح الناس و تفيدهم بجد.
ميرسى لحضرتك جدا

[أبو إياد]

انا لما اكون واقف اخر واحد باكون متعمد انى مارفعش فرامل اليد خوفا من التصادم بحيس ان لو العربيه لقدر الله اتصدمت ماخدوش الخبطه كلها عموما باكون واقف امامى مسافه كافيه ومره حصلت معايا وبعد ماخبطنى العربيه مشيت معاه وقدرت اقف قبل ما اصدم الامامى
بعكس لو الفرامل مرفوعه هاخد رزعه تمام التمام
والفكره دى اخذتها من واحد صاحبى لما دخل فى عربيه راكنه وكانت مموره العربيه المركونه مشيت ولا جرالها الهوى وعربية صاحبى اتدمرت تماما

[ahmedsamir79]

معلومات قيمه الف شكر

[kloda]

معلومة قيمة جدا
شكرا بشمهندس امير

[ahmedhilmy]

انا لما اكون واقف اخر واحد باكون متعمد انى مارفعش فرامل اليد خوفا من التصادم بحيس ان لو العربيه لقدر الله اتصدمت ماخدوش الخبطه كلها عموما باكون واقف امامى مسافه كافيه ومره حصلت معايا وبعد ماخبطنى العربيه مشيت معاه وقدرت اقف قبل ما اصدم الامامى
بعكس لو الفرامل مرفوعه هاخد رزعه تمام التمام
والفكره دى اخذتها من واحد صاحبى لما دخل فى عربيه راكنه وكانت مموره العربيه المركونه مشيت ولا جرالها الهوى وعربية صاحبى اتدمرت تماما

انا شايف ان وجهة نظر الاستاذ محمد هي الاصح في هذه النقطة

[YaSSerwIN]

وانا أيضا ً بس تحتاج سرعة

[amrico]

حصلت مع والدتي ، كنا واقفين في إشارة ( كان عندنا أكسنت موديل 2000) وورانا فيات 124 و مش فاكر العربية اللي قدامنا كانت إيه
وجه الونش بتاع المرور اللي بيسحب العربيات وراح خابط ال 124 راحت خابطة فينا ( أمي كانت رافعة فرامل اليد و رابطة الحزام) تقريباً اتحركنا حركة بسيطة -بس كانت جامدة -لقدام والعربية محصلش فيها حاجة غير وش الفوانيس الأمامبة اتشرخ و وش الفانوس الخلفي شمال اتكسر وأضرار بسيطة كانت في الشنطة
فعلاً موضوع مهم استعمال فرامل اليد في حالات الانتظار

شكرا على المثال الواقعي والف سلامة لحضرتك وللوالدة الكريمة

[amrico]

على الرغم من بساطة المعلومة زى ما قلت إلا إنها قيمة جدا و فى نفس الوقت طريقة عرضك تدل على إنك إنسان محترم و حابب إنك تنصح الناس و تفيدهم بجد.
ميرسى لحضرتك جدا

والله حضرتك احرجتني جدا وده مدح الواحد ميستحقوش
واكيد ربنا هاحاسبني لو كتمت معلومة ممكن تفيد الناس فما بالك لو الناس دول احبائي في المنتدى
المعلومة بسيطة بس مهمة جدا فعلا

[amrico]

انا لما اكون واقف اخر واحد باكون متعمد انى مارفعش فرامل اليد خوفا من التصادم بحيس ان لو العربيه لقدر الله اتصدمت ماخدوش الخبطه كلها عموما باكون واقف امامى مسافه كافيه ومره حصلت معايا وبعد ماخبطنى العربيه مشيت معاه وقدرت اقف قبل ما اصدم الامامى
بعكس لو الفرامل مرفوعه هاخد رزعه تمام التمام
والفكره دى اخذتها من واحد صاحبى لما دخل فى عربيه راكنه وكانت مموره العربيه المركونه مشيت ولا جرالها الهوى وعربية صاحبى اتدمرت تماما

متتصورش حضرتك سعادتي بمشاركتك لأنك فتحتلي موضوع جامد للمناقشة مع المسؤول عن الأمان الصناعي والقيادة الوقائية في الشركة وطرحت عليه وجهة نظر حضرتك (مع التنويه انها لصديق ليا طبعا) قالي انه مبسوط ان صاحبي بيفكر بالطريقة دي ودا يدل على حس وقائي في التفكير لتلافي الحوادث، بس الراجل نبهني لنقطتين
اولا: انك مش دايما هاتكون ضامن انك اخر واحد في الشارع والراجل قاللي لاحظ ان صاحبك في مصر (الراجل ليه ذكريات اليمة في السواقة في مصر ) ممكن اي واحد يطلعله من شارع جانبي، ممكن واحد يكسر إشارة ويطلعلك فجأة، وبالتالي بتطلع هنا نقطة متعرضناش ليها وهي المسافة الآمنة اللي بينك وبين اللي قدامك اللي انشاء الله (بعد إذنكم) هانتعرض ليها في موضوع تاني

ثانيا: ممكن اللي يخبطك من قدام يزقك على ورا على مدخل شارع جانبي
او على إشارة مفتوحة وراك

المهم الراجل برضه بينصح بفرامل اليد حتى لو كنت اخر واحد في الشارع

بس مأقنعنيش بسهولة على فكرة

وشكرا على المرور والمشاركة الجميلة

[amrico]

معلومات قيمه الف شكر

العفو

معلومة قيمة جدا
شكرا بشمهندس امير

اسمي عمرو مش أمير
وشكرا على المرور يا حبيب قلبي

انا شايف ان وجهة نظر الاستاذ محمد هي الاصح في هذه النقطة

شكرا على المرور

وانا أيضا ً بس تحتاج سرعة

شكرا على المرور

[أبو إياد]

بص يا استاذ عمرو
خلينا نتفق على مبدأ واحد وهو الايمان بالقدر

حصل لاصحابى حوادث بشعه جدااااااا علشان كده يمكن انا من النوع القلوق جدا وباخد حذرى بطريقه بشعه بدون اللى معايا ماياخد باله او يحس بالكلام ده

فمثلا فعلا انا لو واقف اخر واحد فعلا عينى مش بتنزل من على مرايات العربيه الا لما الطريق ورايا يتملى

تلاته اصحابى راجعين من الساحل طريق العلمين ركنوا العربيه على جانب الطريق ونزل اتنين منهم يعملوا اللى يعملوا ماعلينا
قدر الله وماشاء فعل ان عربيه تريلا شالت العربيه واتدمرت واللى كان فيها مات فورا

دى مثلا علمتنى انى استحاله اقف فى اماكن خطره


صديق اخر كان على المحور هو وزوجته وبيتخطى ونش فوجىء بالونش راكب فوق العربيه وتوفت زوجته وابنه اللى ماشافش النور

وباردوا مجموعه من اصحابى بيجروا بعربيه فيرنا رايحين اسكندريه والعربيه اتقلبت حوالى 5 قلبات بس بستر الله انهم بخير والحمد لله وفى 1000 داهيه العربيه

كل الكلام ده علمنى ان القياده فى مصر هى انك تسوق وتتفادى اخطاء الغير وتخلى عينك فى وسط راسك وربنا يارب يسترها عل الجميع

[amrico]

بص يا استاذ عمرو
خلينا نتفق على مبدأ واحد وهو الايمان بالقدر

كل الكلام ده علمنى ان القياده فى مصر هى انك تسوق وتتفادى اخطاء الغير وتخلى عينك فى وسط راسك وربنا يارب يسترها عل الجميع

اللهم ارحم امواتنا جميعا وهو ده الهدف من القيادة الوقائية يا استاذ محمد
انا عندي يقين وايمان بقدر الله طبعا واكيد ربنا هايحاسبنا لو اهملنا او رمينا نفسنا في التهلكة بالقيادة برعونة
اما الحوادث اللي محدش له دخل فيها فاهنعمل ايه؟
الأنسان اخترع طفايات الحريق ولحد دلوقت الحوادث بتحصل
اهم حاجة نعمل اللي علينا عشان منقابلش ربنا مهملين ومتهورين

وشكرا على الردود الراقية وبحيي فيك حسك الوقائي اللي موجود بشكل فطري