اول يوم دراسة و المرور مكبر الطاسة

[Samir Elshahawy]

كل سنة و أنتوا طيبين ....
النهاردة اول يوم لبدء الدراسة (فعليا) في معظم المدارس و الجامعات

لكن أيه رأيكوا في حالة المرور النهاردة ؟؟

أنا شخصيا قطعت المسافة من بيتي (في الرحاب) لشغلي (ألماظة) , يعني حوالي 16 كم في ساعة ألا ربع لأن الطريق كان واقف تماما في الكيلو 4 و نص و عند ألماظة

و الاغرب انا ماشوفتش عسكري و لاظابط و لا حتي أشارة مرور مش عارف كانوا فين و بيعملوا أيه ؟؟

[kh_talaat]

ومين سمعك يا باشمهندس سمير

أنا طريق شغلي بياخد مني كل يوم حوالي نص ساعه

النهاردة والحمد لله خد مني ساعه وربع بالتمام والكمال من أول الهرم لغاية الكيلو 21 طريق مصر اسكندرية الصحراوي

ربنا يتوب علينا بقى من المدارس وتوابعها

[Ashraf_Ashraf]

ومن امتى ياشباب الشرطه بتكون موجوده ف ايام المدارس هى الشوارع سداح مداح وكل اللى نفسه يعمل شئ بيعمله وطبعا الفضل يرجع لغياب الشرطه واللى بقى هما الاكبر المخالفات واللجان وسحب الرخص

[M.Mosaad]

انا ساكن في مدينه نصر و شغلي في التحرير في العادي باخد 45 دقيقه
النهاردة عملت حسابي قلت انزل بدري نزلت 7.15 وصلت 9.30 كنت هعيط
و مش عارف اهرب منين كل ماهرب لحته الاقيها مقفوله
ربنا يستر باقي الايام
انا مش عارف اروح البيت من اني طريق
عاوز اروح

[Imhotep]

المحور كان هباب النهارده و واقف من قبل مكان الوقوف المعتاد بتلاتة اربعة كيلو كلهم زحف.... حاجة تقرف....

[Terrible_DaRsH]

بالعكس يا باشمهندس سمير دى الاشارات اشتغلت النهارده .

شارع الخليفة المامون و شارع الجامعة شغلوا الاشارات اللى فيهم علشان الزحمة و كل اشارة بتقف بتاع 10 دقايق و لا حاجة ممكن تنام فيها :)

[amr.elsayed]

لا ويقولك عاملين خطط عشان التكدس المرورى اثناء المدارس

[SeiffoZ]

أنا بروح كليتى و أرجع ماشى على رجلى .. بتأخذ منى 40 دقيقة فقط ... و الواحد يحرق الدهون الزيادة بالمرة و عارف إنى مستحيل أتأخر لو نزلت فى معادى :)

[icehearted girl]

احساس جميل انك تراقب الزحمة من بيتك ببعض الشماتة الناتجة مالجنس البشري

ومبسوطة اوي اني قاعدة فبيتنا

والدتي بتنزل 7 الصبح...الساعه 9 لقتها بتتصل بيه وتقولي انها لسه فاول الشارع ومش لاقيه اي حاجة وانزلي وصليني

اهئ اهئ

لبست بس بعد عشر دقايق كلمتني قالتلي خلاص ركبت

[MoToRiZeR]

لأ انا شفت عسكري .. كان بيشاورلي عند ميدان جهينة عشان يركب معايا .
إنهاردة أكتوبر كانت صعبة أوي .. غير إن إمبارح لبست بتاع ساعة زحمة لأن كنت معدي من طريق الواحات ساعة الحادثة الكبيرة اللي حصلت .. ده كان منظر بشع يا جماعة انا تخيلت الحادثة من المنظر اللي شفته جسمي قشعر .

[dr-mohamed]

احساس جميل انك تراقب الزحمة من بيتك ببعض الشماتة الناتجة مالجنس البشري

ومبسوطة اوي اني قاعدة فبيتنا

والدتي بتنزل 7 الصبح...الساعه 9 لقتها بتتصل بيه وتقولي انها لسه فاول الشارع ومش لاقيه اي حاجة وانزلي وصليني

اهئ اهئ

لبست بس بعد عشر دقايق كلمتني قالتلي خلاص ركبت

يا ساتر على الحقد البشري
ايه كم الغل والحقد ده

والحمد لله
من اعمالكم سلط عليكم
اديكي كنتي هتتدبسي في الزحمة
بس للاسف فلتي
يا رب تتدبسي بقية الاسبوع

[icehearted girl]

لا

انا اجاااااااااااااااااااااااااااااااازة _بتعطيش الجيم_

[dr-mohamed]

مسير الادازة تخلص
ومسير ماما تخليكي تنزلي توصليها
وموج البحر مبيخلصش
مسيرك تتدبسي

[icehearted girl]

[dr-mohamed]

ايه الضرب ده كله
مين المفتري اللى بيضرب البقرة كل ده
انا بقالي ساعة كل شوية ادخل الموضوع الاقيها لسة بتنضرب