نادي المحامين النهري

[abo_lamar]

سلام يا أحلى منتدى
عندي فرح ان شاء الله يوم الخميس في نادي المحامين النهري ... بصوا هو الوصفة اللي قالهالي العريس :
نادي المحامين النهري
طريق كورنيش المعادي
أسفل كوبري المنيب
مع العلم انا ساكن في حلمية الزيتون .. فابالله عليكو اروح هناك ازاي ؟؟
وشكراً

[amrfox2002eg]

السلام عليكم
سأفترض انك برضه فى ش سليم الاول هاتاخده لأخره وتحود يمين وتلف يوتيرن من تحت كوبرى قصر الطاهرة وترجع تانى فى اتجاه ش جسر السويس فى الناصية بتاعت الاشارة اللى عند ش جسر السويس هاتخش يمين انت كده ماشى فى جسر السويس اتجاه كوبرى القبة عند مسجد جمال عبدالناصر هاتخش شمال من تحت كوبرى القبة وهاتعدى الاشارة وتكمل على طول انت كده ماشى تحت كوبرى القبة فى اتجاه مدينة نصر هايلف الشارع معاك يمين وبعدين شمال لف معاه هاتلاقى كوبرى الفنجرى فى وشك مش هاتطلعه هاتخش من تحته وبعدين هاتخش يمين قى شارع صلاح سالم اول ما تخش يمين امسك الشمال لغاية لما تلاقى فتحة تطلعك فى نهر الطريق كده انت فى شارع صلاح سالم اتجاه السيدة عائشة وماسك اقصى شمالك هايقابلك كوبرى هاتلطعه وتنزل وتكمل على طوووووول هايقابلك كوبرى تانى(كوبرى الفردوس)هاتطلعه وتنزل منه هايقابلك على اليمين مسجد الشرطة وبعديه اول نفق الازهر هاتعدى كل ده هايقابلك حديقة الازهر على يمينك وبعدها الشارع هايحود بيك شمال فيمين وهاتلاقى القلعة ظاهرة قدامك هايقابلك كوبرى السيدة عائشة ادامك هاتطلعه وتنزل وتكمل على طول هاتدخل فى اول يمين رئيسى هاتلاقى انك ماشى جنب سور مجرى العيون وهاتكمل هاتلاقى كبابجى بحة المشهور وبعديه مستشفى السرطان 57357 وهايقابلك كوبرى هاتطلعه وتنزل منه هاتلاقى كورنيش النيل فى وشك ووقدامك اشارة يمين السيدة زينب والقصر العينى والتحرير وشمالك المعادى وحلوان وهو اللى مطلوب هاتعدى الاشارة وتخش شمال انت كده ماشى وعلى يمينك النيل هاياقبلك كوبرى الملك الصالح هاتطلعه وتنزل وتكمل على طول بعديها بشوية هايقابلك دخلة دار السلام على شمالك وفى فى اولها بنزينة واخدة الناصية ملكش دعوة بيها هاتكمل على طول مافيش حوالى كيلو واحد بعد دخلة دار السلام اللى على الشمال هاتلاقى طلعة الطريق الدائرى على يمينك والنادى المطلوب برضه على يمينك
وعقبال عندنا جميعا وارجو ان اكون اوضحت

[abo_lamar]

يا أخي والله العظيم انا كل مرة بحترم حضرتك اكتر من المرة اللي قبلها ..انت ايه موسوعة في طرق الجمهورية ؟؟ ربنا يزيدك من علمه

[abo_lamar]

طيب معلش يا باشا هو مش ممكن اخد الطريق الدائري احسن ؟؟

[amrfox2002eg]

طبعا ممكن تاخده بس هايبقى طويل قوى قوى قوى عليك هاتخده من طلعة مسطرد مثلا وهاتاخده لغاية أخره خالص عند المرج ونفق السلام وهاتكمل فى اتجاه مدينة نصر على طوللللللل بس بصراحة انا مش عارف هاتنزل ازاى على كورنيش النيل..لذلك انا بافضل الطريق الاولانى واعتقد انه هايكون طريق سريع ورايق شوية

[aboyassen07]

عمرو فوكس وربنا انت احلى من اى جى بى اس

[aboyassen07]

ينفع ينزل نزله عبد المنعم راض من اكتوبر ويطلع من عند الكورنيش على القصر العينى الفرنساوى ويكمل علطول لحد ما يوصل لهناك ولا ايه