مطار القاهرة من الدائرى - عاجل

[A.Saad]

السلام عليكم
كنت عايز اعرف ازاى اروح مطار القاهرة من الدائرى
يا ريت التوضيح بالتفصيل لانى مش عارف فيه دخله هناك ولا لا
انا اعرف انزل منزل السلام والف من اسماعيلية الصحراوى وادخل طريق المطار
لكن هل فيه نزلة تانية ولا لا
ويارريت لو حد برده يوضح اى مطلع للعودة

انا جاى من الهرم
اعرف اوصل لحد منزل السلام لو جاى من اتجاه المرج
او اوصل لحد اكاديمية مبارك لو جاى من اتجاه المعادى

[amribrahim]

لو حضرتك جاي من ناحية المعادي يبقى تمشي إتجاه jw ماريوت هناك في نزلة للمطار

و لو جاي من السلام إتجاه المعادي بردو في نزلة للمطار

[A.Lotfy]

اتجاه المعادي
كمل من جوة نفق أكاديمية مبارك
وافضل ماشي شوية هتلاقي فيه فندق jw marriot وهتلاقي مخرج طريق السويس ما تنزلهاش ... انزل المخرج اللي بعده على طول كأنك راجع من السويس للقاهرة
بعد ما تنزل امشي حوالي 200 متر هتلاقي مخرج المطار وصلة جديدة وفاضية خالص

[د.أحمد سمير]

قدامك حلين ..
الدائري من اتجاه المعادي ثم نزول نفق أكاديمية مبارك ، ثم نزول مخرج طريق السويس كانك راجع على ألماظة ومن هناك هتلاقي مخرج المطار الجديد على يمينك مباشرة ..

ولكن .. هذا الإجراء لا تقم به من الساعة 3 عصراً حتى الثامنة مساء
لأن مخرج طريق السويس إلى مصر الجديدة احياناً بيكون مقفول تماماً


الطريق الثاني : كمل في الدائري بعد مخرج السويس حوالي 3كم
هتلاقي يوتيرن لف وارجع ..
هتلاقي على يمينك مخرج المطار بعد 2.5 وأكيد هاتشوفه بعد ما تعدي طريق السويس على شمالك طبعاً

وهذا هو الطريق السهل معظم الأوقات لكن فيه حوالي 5كم زيادة
وتوصل بالسلامة يا بوحميد

[A.Saad]

الف شكر ليكم كلكم
دكتور احمد
تسرنا رؤيتك

[Egyzizo]

طيب أنا النهارده كنت فى المطار ، والمفروض بارجع للدائرى علشان أخش الزراعى للعودة إلى مدينة شبين الكوم ، وعادة كنت بارجع زى ما باروح (سكة الكلية الحربية والسندباد) ..

لكن النهارده لقيت يافطة مغرية أول ما خرجت من المطار بتشاور على كوبرى وتقول (الدائرى) .. كانوا بالظبط يافطتين اليمين طلوع الكوبرى للدائرى والشمال أرضى للاوتوستراد

فقلت دى أكيد اختصار للطريق الدائرى وطلعت الكوبرى ونزلت على طريق رااااااااائع وسط التلال الصحراوية المطعمة بالخضرة بين حين وآخر ونخيل زينة وقصارى زرع كبيرة ، واعلانات مجسمة غير الاعلانات العادية اللى احنا عارفيها .. أنا قلت أنا مش فى مصر ، بجد كان طريق ممتع ، وفعلاً بعد دقائق قليلة لقيت نفسى فى الدائرى ، وفرحت جداً بالطريق ده لأنه وفر الزحمة ..

بس يا فرحة ما تمت ، لقيت نفسى خرجت فى اتجاه المعادى والقطامية ، ومشيت كتير قوى علشان ألاقى يو تيرن أو أى خرجة ترجعنى المقابل ما لقيتش .. وآخر ما زهقت دخلت طريق القطامية ، وبدأ التوهان بلاد تشيلنى وبلاد تحطنى لغاية ما لقيت نفسى فى المطار تانى واحترمت نفسى ورجعت من طريق الكلية الحربية اللى أنا عارفه.

يا ترى الطريق الجميل ده اسمه ايه ؟؟
وأكيد فيه حاجة بتخرج من الطريق ده للمقابل على طول يا ترى حد عارفها ؟؟

أنا متأكد ان الحل سهل وكان تحت ايدى بس اعذرونى علشان انتوا عارفين ان الغريب أعمى ولو كان بصير.

[a_elsadaany]

هو انا ينفع اروح المطار القديم بنفس الطريقة ولا اية ؟؟ انا بشوف المطار على شمالى على الدائرى وانا جاى من المعادى ؟؟

[Samir Elshahawy]

هو انا ينفع اروح المطار القديم بنفس الطريقة ولا اية ؟؟ انا بشوف المطار على شمالى على الدائرى وانا جاى من المعادى ؟؟

ممكن لأن مدخل المطار من الدائري يدخلك بعد كده علي كل الصالات 1 و 2 و 3

[mohamed_selim]

يا ترى الطريق الجميل ده اسمه ايه ؟؟
وأكيد فيه حاجة بتخرج من الطريق ده للمقابل على طول يا ترى حد عارفها ؟؟

ده طريق داخلى فى المطار
المفروض و انت ماشى فى الطريق ده فى مخرج تانى قبل متوصل الدائرى يخرجك لطريق السويس (فى اتجاه القاهره) و تعمل يوترن قريبه (فى اصلاحات اليومين دول) و ترجع تعدى من تحت الدائرى و تطلع يمين فى صينيه تطلعك الدائرى فى اتجاه الزراعى

هو انا ينفع اروح المطار القديم بنفس الطريقة ولا اية ؟؟ انا بشوف المطار على شمالى على الدائرى وانا جاى من المعادى ؟؟

ايوه ممكن بس هتدفع و انت خارج من المطار الجديد على القديم 5 جنيه
تحتفظ بالوصل و التذكره و متدفعش تانى و انت خارج من المطار القديم (الا اذا كسرت 3 ساعات تدفع الفرق بس)

[Egyzizo]

كتر ألف خيرك ، أنا كنت يأست ان حد هيرد عليا فى النقطة دى.

[mahmoud_anwar]

ياباشا لو جي عن طريق الدائري يبقا تدخل يمن من موقف العاشر وتفضل واخد الطريق علي طول هتطلع كوبري وتنزله كمل لغايه لما تلقي نفسك في مساكن شيراتون وفي طريق تاني انا بفضله بدل الدائري لي انه طويل جدآآآ وممل انتا ممكن تاخده من طريق السيده زينب وتطلع علي طريق صلاح سالم افضل منه لي ان الدائري بيجي عند المرج وتلقي الدائري بقا زحمه بسبب الجنه الي عليه لي انها لجنه ردار