من بنها لمدينه نصر بالعربيه

[mahmoudmahmedelsayed]

بصوا بقى يا جدعان انا عايز وصف دقيق من بنها لمدينه نصر بس وحيات اوبكو بالتفصييل و ازاى اروح عند طيبه مول و وانا راجع ارجع ازاى عن طرق رمسيس عشان منتوهش ونبهدل الدنيا ؟

[M.Radwan]

هتخرج من بنها تاخد الزراعي علطول في اتجاه شبرا الخيمة
لما توصل عند كلية الزراعة متحودش يمين وكمل علطول في أحمد حلمي
يعني هتطلع كوبرى عبود وتنزل وتكمل عطول هتفضل ماشي بتاع ربع ساعة
لغاية متلاقي نفق أحمد بدوى، هتعمل يوترن وتدخل فيه وتطلع كوبري اكتوبر
تكمل معاه علطول ومتنزلش أى نزلة تقابلك على اليمين
وعند أخره هتلاقي نزلى على ايدك الشمال هتنزلك قدام قاعة المؤتمرات
كده بقيت فى مدينة نصر
وانت راجع هتعمل نفس الحكاية بالظبط
نزلة نفق أحمد بدوي هتبقى تاني نزلة وانتى راجع.

وانت ماشي فى الطريق اسأل على نفق أحمد بدوي، كل الناس عارفاه وهيدلوك ان شاء الله،

[M.Osama]

في طريق اسهل بس حتلف شويه عن طريق الدائري

حتطلع عالزراعي عادي خالص وبعدين تطلع الدائري من تاني طلعه اللي هوا اتجاه مصر الجديده

وتفضل ماشي حوالي 25 كيلو تقريبا لحد ما تلاقي نفق السلام حتعديه وبعديه بـ 8 كيلو بالظبط حتلاقي منزل المطار حتعديه وتنزل اول منزل بعده وحتلاقي مكتوب عليه ألماظه

حتنزل وتفضل ماشي مع الطريق لحد اما تلاقي كوبري معدي من فوقك قاطع الطريق "كوبري الكيلو 4,5" حتعدي من تحته وتاخد اول يوتيرن شمال "من فوق الترماي" وتمشي وتدخل من قبل الكوبري علطول يمين

كدا انت علي طريق النصر او الاوتوستراد - حتفضل ماشي حتقابل فطريقك سيتي ستارز.. ومن بعده حتلاقي مكرم عبيد وبعده عباس العقاد ومن بعده حتلاقي طيبه مول علي يمينك

طريق طويل شويتين بس فاضي واحسن بكتير من دخول شبرا واحمد حلمي وكبري اكتوبر

[mohamed_selim]

بص انا لسه كنت تايه يوم الجمعه نواحى بنها :)
هتطلع الطريق الزراعى اتجاه القاهره و تفضل ماشى فيه لحد الدائرى عند قليوب كده و تطلع الدائرى شمال يعنى الطلعه اللى بعد ما تعدى الدائرى و كأنك رايح ناحية طريق الاسماعيليه الزراعى و الصحراوى بعديه .... تفضل ماشى و تعدى الاسماعيليه الزراعى و مكمل و تنزل النفق عند الاسماعيليه الصحراوى و مدينة السلام و تفضل مكمل هتلاقى على اليمين يافطه بتقول مدخل المطار و بعدها يافطه بتقول مدينة نصر و الماظه ... تنزل النزله دى يمين و تفضل ماشى هتطلع كوبرى (ممكن يكون فيه اصلاح فتنزل من جنبه) و تفضل ماشى لحد متلاقى فى كوبرى فوق دماغك تاخد اليوترن اللى بعده (هتعدى فوق شريط المترو) و ترجع تخش يمين جنب الكوبرى (كأنك من اتجاهك الاصلى اخدت شمال) كده انت فى الاوتوستراد هتفضل ماشى طوالى لحد متلاقى محل "توم و بصل" على اليمين كده انت عند اول عباس العقاد ... طيبه مول على الشمال بعد حوالى 400 متر

فى الرجوع اطلع تانى الاوتوستراد زى ما كنت بوصفلك كأنك جاى من ناحية اول عباس و طيبه على شمالك هتعدى اشارة رابعه و بعديها اشارة يوسف عباس و بعديهم المنصه و قاعة المؤتمرات هتلاقى مطلع كوبرى اكتوبر على الشمال اطلعه و خليك مع الكوبرى متنزلش لحد ما تعدلى رمسيس ... بعد رمسيس فى نزله يمين اسمها شارع شنن (ممكن تنزل وتمسك الشارع ده لاخره هتوصل الكورنيش و يمين تبقى كده فى اول الزراعى بس انا مبنصحش بيه) تانى يمين ده وصلة كوبرى 15 مايو من اكتوبر خش فيها و بعد حوالى كيلو هتلاقى نزله يمين تانى للكورنيش و اسكندريه الزراعى انزلها و خليك طوالى ...

اتمنى اكون وضحتلك الوصفه

[M.Radwan]

بس يا جماعة الراجل أول مرة يروح..الدائري هيبقى صعب وطويل عليه حتى لو فاضي

[Ahmed Nouh]

وفى طريق ثالث

تاخد طريقك من بنها علطول بدون ما تدخل يمين او شمال , قبل المؤسسة هتلاقى الطريق فى يمين الكورنيش وفى شمال اللى هو ماشى علطول برده خليك معاه

هتدخل على اشاره اللى قصادها من الناحية التانيه محطه مترو الانفاق وبعدها على اليمين مستشفى النيل برده علطول

هتلاقى نفسك دخلت عند كلية الزراعه وبعدين طلعت كوبرى فوق موقف عبود ونزلت وفى كمين فى وشك برده خليك علطول

هنا بقا التركيز , بعد الكمين مباشره فى دخله يمين ملكش دعوه بيها

اول دخله بعدها يمين هى اللى هتدخلها , متتوهش نهائى هتلاقى فى كوبرى معدى الطريق بالعرض وشارع داخل من جنبه يمين هو ده اللى هتدخله

تمشى فيه شويه وبعدين تلاقى صينيه , تلفها وترجع عكس ما كنت جاى

هتطلع كوبرى ( كوبرى ابو وافيه ) وتنزل فى الاخر فى شارع زحمه كدا ( الزاوية الحمراء ) , وبعدين هتلاقى مطلع كوبرى تانى قابلك اطلعه ( كوبرى سكة الوايلى ) , وبعدين مطلع كوبرى ثالث هتنزل منه فوق كوبرى القبه

تكمله للأخر هينزلك عند معهد القوات المسلحه للغات وبعدين تطلع تانى اول كوبرى يقابلك ( كوبرى الفنجرى ) وتنزل منه قصاد قاعة المؤتمرات وتمشى على طول تبقى فى طريق النصر وتدخل اى حته فى مدينه نصر

يعنى انت علطول لحد كمين عبود وبعدين تدخل يمين وتلف الصينيه وترجع , ومن هنا اى كوبرى يقابلك اطلعه ومتنزلش غير اخره خالص

اول ما تطلع بقا على طريق النصر تلف اول يوتيرن شمال وترجع , وبعدين تدخل ثانى دخله يمين اللى هى فى وشها المنصة

لحد اخرها خالص هتلاقى تقاطع فيه مترو , عديه وبعدين هتلاقى تقاطع تانى عديه وبعدين ادخل فيه شمال

اول يمين كبير يقابلك اللى هو طريق رايح جاى وفى النص جزيره علشان فى قبله واحد بس شارع صغير ادخل فيه

اول ما تدخل الشارع ده اسأل فين جنينه مول الناس هتشاورلك عليه وانت واقف

على العموم هو هيبقى ثانى يوتيرن شمال تدخل الشارع اللى فى وشه فى اول يمين هتلاقى المول على يمينك


وانت راجع بقا

خلى المول على شمال وامشى لحد ما تلاقى الشارع صغر وبقى فى صينيه على الشمال ادخل معاها شمال هيرجعك الشارع اللى انت جاى منه اصلا

عيد بقا المسار بالشقلوب

خد الشارع لأخره وعدى اول تقاطع وبعدين ادخل شمال فى اول يمين اللى هو انت جاى منه

وبعدين عدى كمان التقاطع اللى فيه المترو وانزل من الشارع المنزل اللى فى وشك ( خلى بالك الحته دى كلها مطبات متجريش فيها والشارع ده فيه مطب كبير جدا فى النص خلى بالك كويس منه )

انزل من الشارع هتلاقى المنصة فى وشك هتاخد يمين اجبارى وتلف اول يوتيرن وترجع تانى

اول يمين تفضل ماشى فيه وتطلع كل الكبارى اللى طلعتها تانى , كوبرى الفنجرى وبعدين تنزل منه وتطلع كوبرى القبه وتمشى فيه للأخر وتنزل تمشى شويه وبعدين تطلع كوبرى سكه الوايلى وبعدين تنزل تمشى شويه وبعدين تطلع كوبرى ابو وافيه وتنزل منه هتلاقى نفسك داخل على اشاره الخلفاوى

قصادك حل من اثنين

يا تلف الصينيه وترجع تانى تدخل من جنب الكوبرى فى الشارع اللى انت جاى منه وتلف اول يوتيرن وترجع فى اتجاه عبود فالطريق الزراعى وده مفيهوش توهان

يا تاخد طريق اسرع بس صعب شويه , تكمل بعد الصينيه علطول هتلاقى فى وشك اشاره بكاميرات ( متقلقش مش شغاله )

خش يمين اجبارى فى اول يوتيرن شمال وبعدين عند الاشاره هتلاقى فى دخله يمين كدا اللى هو الشارع اللى كان فى وشك عند اول اشاره ادخل فيه لحد اخره وبعدين يمين اجبارى

هتلاقى الكورنيش على شمال اخرج بس من الرصيف للشارع شمال واطلع الكوبرى اللى فى وشك وانزل خليك ماشى علطول هتلاقى نفسك على الطريق الزراعى تانى

لو فى حاجه مش واضحه بقا قولى :)

[mahmoudmahmedelsayed]

الف الف الف شكر يا رجاله والله ما عارف اقولك ايه بجد بس شوفتو بقى انا توهت و انا راجع عن طريق رمسيس عشان محدش قالى ارجع ازاى بس وصلنا الحمدلله و الف شكر كمان مره

[m7nsh]

انتو جبتو يا رجاله اظرف 3 حلول فعلا مفيش غيرهم تقريبا
بس اقصرهم عموما هى طريقه احمد نوح ( ابو وافيه - وايلى - قبه - فنجرى ) و شخصيا لسه مجربها النهرده و مكنتش مشيت فيها قبل كده .. بصراحه ولااروع يا بو حميد .. تسلم يا كبير والله
وونا راجع طلعت اكتوبر و نزلت 15 مايو وبعدها الكورنيش - وبعدها الزراعى برده وصفه تماااااام

بس النهرده كان الجمعه .. و مش عارف هل عشان كده الدنيا كانت سالكه ؟؟ ايه ظروف الطريقين دول فى الأيام العاديه ؟؟

[Ahmed Nouh]

انتو جبتو يا رجاله اظرف 3 حلول فعلا مفيش غيرهم تقريبا
بس اقصرهم عموما هى طريقه احمد نوح ( ابو وافيه - وايلى - قبه - فنجرى ) و شخصيا لسه مجربها النهرده و مكنتش مشيت فيها قبل كده .. بصراحه ولااروع يا بو حميد .. تسلم يا كبير والله
وونا راجع طلعت اكتوبر و نزلت 15 مايو وبعدها الكورنيش - وبعدها الزراعى برده وصفه تماااااام

بس النهرده كان الجمعه .. و مش عارف هل عشان كده الدنيا كانت سالكه ؟؟ ايه ظروف الطريقين دول فى الأيام العاديه ؟؟

حمد الله على سلامه معاليك يا باشا , فينك مختفى بقالك فترة كبيرة ؟؟

والله هو الوصفة دى مش دايما زى ما انت شوفتها النهاردة :) , بس فى نفس الوقت مش جحيم يعنى باقى الاوقات

المناطق اللى بتتزحم فى الموضوع ده بالترتيب كالاتى

الدخلة بتاعت المؤسسة علشان الاشاره ( من زحام خفيف لمتوسط ) , ومنزل كوبرى عبود علشان اللجنة ( من خفيف لمتوسط ) , والحته بتاعت الصينية وانت بتلف علشان ترجع ابو وافية ( من شديد لزبالة ) , حته الزاوية ( من خفيف لأقل من المتوسط ) وبعدين الطريق سالك

يعنى لو انت النهارده اخدتها فى ساعه الا ربع او نص ساعه ( لو بتجرى ) هتاخد منك فى العادى اكثر ربع او ثلث ساعه ونص دى فى حاله انك جاى فى وقت خروج موظفين

بليل بشكل عام كل الاماكن دى بتبقى ألذ

فى طريق كمان لذوى الخبرة انا شخصيا بستخدمة اطول بس سالك , انا بفضل امشى اكتر بس المهم مقفش

قبل المؤسسة فى مفرق الطرق ادخل يمين اللى هو رايح على الكورنيش

امشى معاه لغايه ما تلاقى فى وشك سور واشاره ادخل شمال اجبارى مع الناس , هتمشى شويه وبعدين تطلع كوبرى وتعدى على لجنة بردة وبعدها تلاقى نفسك على الكورنيش , اول ما تشوف الكورنيش على يمينك والناس بتلعب شغل اشاره شمال واول يوتيرن يقابلك

ادخل اول يمين بعد عين القط , متقلقش لازم هتشوفها وتهدى عندها وتجيب الاول كمان

كدا انت داخل على اشاره الخلفاوى , زى ما انت عدى الاشاره وخليك ماشى علطول , تعدى الشارع وتكمل الشارع الصغير اللى فى الوش هتلاقى فى وشك الصينيه بتاعت الوصفة التانية وبعدين كوبرى ابو وافيه فالطريق اللى سبق شرحة

الدخلة دى اريح كتييييييييييير من عبود ومفيهاش اى زحام نهائى عدا زحام خفيف فى دخلة الكمين بس وانتظار مش ازيد من 5 دقايق فى اشاره الخلفاوى

[m7nsh]

والله انت معلم كبير فعلا !!
ربنا يخليك يا احمد بيه و تسلم على سؤالك .. كانت فتره امتحانات و كورسات و قلق كده .. وفى انتظار النتيجه المشئومه :(

بالنسبه بقى لدخله الكورنيش فانت سهلتهالى كتير جدا ,, لأنى كنت نفسى اعرف ازاى ممكن اختصر من الكورنيش للسكه دى
و على فكره جربت الوصفه امبارح برده ( السبت ) و كانت ممتازه جدا و مفيش زحمه ولا حاجه .. و الحمد لله الصينيه اياها اللى قبل ابو وافيه ( ميدان المماليك ) مكانش فيها اى حاجه :) ..ظروف بقى !

انا كده فاهم صح يا احمد ولا ايه ؟؟

كنت عاوز اسألك هو الكوبريين اسمهم المظلات ؟ ( السهم الأزرق و الأحمر )
رغم ان الأزرق مكتوب عليه عرابى ,, و الأحمر مكتوب عليه شبرا العلوى حاجه كده ؟