الطريق الي كورنيش المقطم

[M.Osama]

السلام عليكم يا رجالة نايل موتورز وكل سنه وانتو طيبين

عاوز اطلع المقطم.. بالتحديد عند الكورنيش زي ما بيسموه (المنطقه اللي فوق الجبل دي)

مطلع المقطم منين بقي بالظبط ؟؟ انا عارف ان هوا قبل المنصه بعد كوبري المشاه علطول.. بس دا حاخده طوااااالي علطول كده حكون فالمقطم ؟؟

واوصل منين للكورنيش فوق ؟؟ ولو حد من هناك ياريت يقولي في ناس كتير بتروح تتسحر هناك وكده ولا ححس ان انا في صحرا

اسف للاطاله بس انا رايح بكره

[M.Osama]

الرفع للاهميه

[ahmed_mido1889]

حضرتك انت بتطلع من عند المطلع اللي بعد كوبري الدويقهاو هتلاقي لفه تطلع منها المقطم هتاخد المطلع لحد اخره (خليك ماسك الشمال علشان متخشش الهضبه الوسطي) وبعد كده هتلاقي مترو ماركت خد الشارع بتاعه لحد الاخر بعد كده خد يمين هتمشي حته تقريبا 200 متر هتلاقي الكافيهات في وشك

[M.Osama]

شكرا لاهتمامك وردك

بس انا جاي من علي الدائري من عند اسكندريه الزراعي وفي نزله للمقطم مباشر من علي الدائري

ياتري فييييييييين بقي ؟؟

[ahmed_mido1889]

حضرتك هتبقي جاي من انهي اتجاه اتجاه التجمع الخامس ولا اتجاه الهرم؟؟؟

[ahmed_mido1889]

عالعموم لو حضرتك جاي من اتجاه الهرم(المريوطيه) هتمشي عالدائري هتلاقي منزل الكورنيش الاول والثاني هتعديهم هتلاقي نزله الاوتوستراد الاولي تفوتها وتنزل التانيه علطول اللي علي الكوبري من فووق

[M.Osama]

لا انا جاي من اتجاه التجمع الخامس يعني حعدي علي موقف العاشر واعدي علي الربوه وتكون اكاديميه مبارك للامن علي شمالي

[ahmed_mido1889]

يبقي حضرتك هتمشي لحد ما توصل لابراج سما المعادي هتلاقي بعدها بحبه منزل عاليمين هو مش منزل بمعني منزل
هو تفريعه من الطريق هتمشي في الطريق ده
هتلاقي كوبري متطلعووش كمل من تحته هتلاقي نفسك بقيت عالاوتوستراد هتمشي عالاوتوستراد هتعدي كوبري التونسي (خلي بالك الكوبري عليه مطبات صناعيه) هتكمل بعديه هتلاقي كوبري تاني اطلعه وامسك يمين في اخر الكوبري
هتلاقي مطلع المقطم علي اليمين من اخر الكوبري هتخش اليمين هيبقي المقطم بمطالعه في وشك علطول
اطلع لحد الاخر وخليك في الشمال لحد لما تلاقي ميدان كمل علطولهتلاقي مترو ماركت علي شمالك كمل علطول
هتلاقي شارع بالعرض خش يمين هتلاقي الكورنيش في وشك بعد حوالي 200متر وبعد كده هتلاقي الكافيهات في وشك
بس خلي بالك علشان هناك في كافيه ماكسيم ده سرقه علني.

[M.Osama]

الف شكر ليك يابو حميد علي ردك بس هوا مفيش طريق تاني من بره بره من غير ما انزل اوتوستراد وكده ؟؟ يعني في منزل للمقطم علطول ؟؟

معلش طولت عليك بس الواحد بيتجنب الاوتوستراد قدر المستطاع

[ahmed_mido1889]

شكر علي ايه يا باشا ده احنا اخوات
الصراحه هو ده الطريق اللي اعرفه وفي طريق بس ده هيدخلك في الهضبه الوسطي ولف جوه والطريق مظلم الصراحه انا مشيت من مره كنت قافل العربيه علي نفسي وهيبقي لفه من جوه

[ahmed_mido1889]

بس مفيش منزل للمقطم من غير لما تعدي عالاوتوستراد

[M.Osama]

يبقي حضرتك هتمشي لحد ما توصل لابراج سما المعادي هتلاقي بعدها بحبه منزل عاليمين هو مش منزل بمعني منزل
هو تفريعه من الطريق هتمشي في الطريق ده
هتلاقي كوبري متطلعووش كمل من تحته هتلاقي نفسك بقيت عالاوتوستراد هتمشي عالاوتوستراد هتعدي كوبري التونسي (خلي بالك الكوبري عليه مطبات صناعيه) هتكمل بعديه هتلاقي كوبري تاني اطلعه وامسك يمين في اخر الكوبري
هتلاقي مطلع المقطم علي اليمين من اخر الكوبري هتخش اليمين هيبقي المقطم بمطالعه في وشك علطول
اطلع لحد الاخر وخليك في الشمال لحد لما تلاقي ميدان كمل علطولهتلاقي مترو ماركت علي شمالك كمل علطول
هتلاقي شارع بالعرض خش يمين هتلاقي الكورنيش في وشك بعد حوالي 200متر وبعد كده هتلاقي الكافيهات في وشك
بس خلي بالك علشان هناك في كافيه ماكسيم ده سرقه علني.

تمام كده انا بعد ما ركزت في السكه دي لقيتها سهله وتمام

تسلم يابوحميد.. ومعلش تعبتك معايا.. بس علفكره انا مش حعد علي كافيهات وكده انا حعد قدام الهضبه علطول

[ahmed_mido1889]

ما هي الكافيهات هي طرف هضبه المقطم حاول تقعد في اخر واحد في اليمين ده اسعاره في الحنين
يعني انت علشان تقعد علي الهضبه لازم تاخد مشروب

[ahmed_mido1889]

ولا تعب ولا حاجه ده انت تأمر

[M.Osama]

ما هي الكافيهات هي طرف هضبه المقطم حاول تقعد في اخر واحد في اليمين ده اسعاره في الحنين
يعني انت علشان تقعد علي الهضبه لازم تاخد مشروب

ازاي بقي ! انا قعدت قبل كدا علي الهضبة مباشرة بدون كافيهات ولا يحزنون.. ولا هوا المكان اتغير ؟؟ اصل مروحتش هناك غير مره واحده من سنه تقريبا او اتنين