طريق عين السخنه ?

[weta]

صباح الفل عليكم

انا كنت بسأل اخبار طريق عين السخنه ايه ؟؟؟ امان ولا لا وانسب الاوقات لسفر عليه ؟؟

عشان انا بصراحه خايف من البلطجيه ....
ومن اي نزله من الدائري وبعد منزل امشي ازاي؟؟

[ELBEH]

صباح الفل عليكم

انا كنت بسأل اخبار طريق عين السخنه ايه ؟؟؟ امان ولا لا وانسب الاوقات لسفر عليه ؟؟

عشان انا بصراحه خايف من البلطجيه ....
ومن اي نزله من الدائري وبعد منزل امشي ازاي؟؟

امان ان شاء الله انا كنت فى السخنة من اسبوع الطريق امان بس خد بالك فى حتت بيصلحوا فى و حاول تمشى بالنهار و ربنا يسترها ان شاء الله.

[mostafa53]

السلام عليكم ورحمة الله وبركاته
نصيحة عامة: لو إنت أول مرة بتمشى على طريق لازم يكون فى النهار علشان كل طريق فيه مميزات وعيوب وعلشان تسوق وانت مرتاح. طريق السخنة أمان جدا لكن الدائرى نفسه اللى بيوصل ليه حصلت فيه بعض حوادث السطو, والكلام ده كان من مدة وده سبب تانى يخليك تروح بالنهار فى وقت فيه حركه كتير على الطريق. المنزل من الدائرى لو إنت جاى من المعادى حايكون بعد كارفور بمسافة بسيطة. إتبع اليافطات وده سبب تانى لاستعمال الطريق بالنهار

[tutankhamoun]

طريق العين السخنة نفسه امان خصوصا أنه ادارة الجيش
ربنا يستر طريقك و يحرق البلطجية

[ZALABANY]

طيب وطريق الغردقه أخباره ايه أمان برده ولا ايه النظام

[mohamed_selim]

أمان ... مفيش اى حاجه عليه ... من ساعة الثوره سافرت حوالى 20-30 مره الغردقه فى اوقات مختلفه (الصبح و بالليل) و كله تمام ... الجديد بس ان بقى فى كارته عند الزعفرانه :)

[kimo-nubira]

انا لسه كنت راجع عليه من كام يوم والدنيا كويسه بس وانا راجع الساعه 11 بليل لاقيت واحده من اياهم واقفه في وسط الطريق وطبعا ده كمين منصوب واللي يقفلها محدش يعرف ايه اللي يحصله فــ اوعي تقف لحد خالص

[_hema]

صباح الفل عليكم

انا كنت بسأل اخبار طريق عين السخنه ايه ؟؟؟ امان ولا لا وانسب الاوقات لسفر عليه ؟؟

عشان انا بصراحه خايف من البلطجيه ....
ومن اي نزله من الدائري وبعد منزل امشي ازاي؟؟

اخى الكريم


السلام عليكم ورحمه الله تعالى وبركاته

طريق العين السخه من الطرق الرائعه فى مصر بغض النظر عن بعض الاصلاحات به والسرعه المقرره به 120 كم / س

وممكن من حلاوه الطريق العربيه تغريك للجرى

ولكن انا بانصح طالما دى اول مره حضرتك تسافر عليه فيفضل حضرتك تمشى بسرعه مناسبه مابين 90 الى 100 ويكون سفر حضرتك نهاراً

اما الدخول
الى طريق العين السخنه الغردقه

( او مايسمى بطريق الجيش)


لو حضرتك جاى من الدائرى
اتجاه السويس / المعادى حضرتك هتنزل نزله نفق القطاميه يمين
( هتلاقى محطه بنزين موبيل على يمين الطريق ومعارض محمد زكى للسيارات)

هتكمل كأنك رايح المقطم ومع اول لفه شمال هتلف عشان تنزل نفق القطاميه وتخليك مع الطريق واول ماتعدى النفق هتلاقى صينيه تلفها على اتجاه الشمال وتظل سائراً كانك رايح القطاميه وبعد محطه وطنيه يمين الطريق هتلاقى بدايه طريق الجيش او العين السخنه الغردقه كما يطلق عليه

لو حضرتك جاى من اتجاه الهرم او المعادى من خلال الطريق الدائرى بعد حضرتك ماتعدى كافور خليك فى اليمين واول نزله يمين
( دى اسمها نزله القطاميه العين السخنه المقطم)

تنزلها وتخليك يمين مع العربيات ثم شمال مع العربيات وهتلاقى مصنع بوتاجاز القطاميه على يمين حضرتك هتمشى لغايه الصينيه الى قلنا عليها بس المره دى هتعدى عليها مش هتلف معها وتكمل زى الوصف الاولى

واتمنى لك رحله ممتعه

مع كل الشكر

[weta]

انا بشكركم جميعا ..واحسن حاجه لو الواحد مش لقي رد علي اسالته بجري علي طول علي المنتدي واسال بلاقي اجبتي الحمد لله وكذا رائ كمان بيخليك تطمن وده احلي حاجه فيكوا اخوات بجد ..

انا كمان بشكر hema علي رده الوافي وشرحه الجميل بدل مالواحد بيقف ويسال ربينا يخليكوا ليا

[_hema]

انا بشكركم جميعا ..واحسن حاجه لو الواحد مش لقي رد علي اسالته بجري علي طول علي المنتدي واسال بلاقي اجبتي الحمد لله وكذا رائ كمان بيخليك تطمن وده احلي حاجه فيكوا اخوات بجد ..

انا كمان بشكر hema علي رده الوافي وشرحه الجميل بدل مالواحد بيقف ويسال ربينا يخليكوا ليا

كل الشكر لحضرتك ونورت القسم

واتمنى لحضرتك رحله موفقه بإذن الله تعالى

حفظنا الله ربى واياك من كل مكروه