رايح السوق بكره

[A7MED_PHARMA]

السلام عليكم


بكره رايح سوق مدينة نصر

.
ماحدش يعرف اوصله ازاي ؟

انا جاي من الزقازيق
يعني ممكن أدخل القاهرة من الزراعي -------> شبرا
او من الصحراوي --------> السلام

وممكن أركب الدائري من اي طريق فيهم

ايه احسن طريق واروق طريق اوصل بيه السوق





وياترى للي يعرف ظروف السوق ايه في رمضان ؟

[MARTINDALE]

هتاخد الدائري في الاتجاه اللي رايح المعادي . هتمشي حوالي 10 كيلو لحد ما تلاقي المطار بقى على ايدك اليمين , بعده بحوالي كيلو هتلاقي مخرج ونفق المخرج هيكون مكتوب عليه الى مدينه نصر هتاخد المخرج وتخش يمين في شارع عريض اسمه احمد الزمر , هو ده الشارع بتاع سوق السيارات .

[BUNSH]

وعليكم السلام ورحمة الله وبركاتة

بص يادوك لو هتيجى من شبرا تتطلع من (الخلفاوى-مماليك-ابووافية -الزواية- تطلع كوبرى حدائق القبة-كوبرى الفنجرى-هتلاقى نفسك نزلت عند ارض معارض والاستاد -لو تعرف طريق من عند الامن الوطنى وتخرم من وراء يبقى تماااااام ) وكدة هتيجى من تحـــــــــــــت .

يــــــــــاما تطلع دائرى فى اتجاة المعادى ومدينة نصر وتنزل فتحة (ميدان اكاديمية الشرطة/مدينة نصر) وكدة هتنزل من فوق من عند زهراء مدينة نصر والعاشر وبعد كدة سوق السيارات ..

احــــــــــــب اقولك لو هتشترى ينزل معـــــــــاك حد بيفهم كوويس لأن تقليب للركب وهتلاقى مخلفات حرب كتــــــــــــــــير وهتلاقى لقط برضك وطبعاا لو تعرف ترووح بدرى يبقى احسنلك لأن طريق بيتقفل من فوق (من عند اكاديمية الشرطة) ونفس الوقت بيسمع ويتقفل من تحت من عند (شركة انبى وهتكرة نفسك) ..
بالتــــــــــــــوفيق :) وتوصل بسلامة بأذن الله ..

[adel_2346]

لو زراعى هتطلع الدائرى اتجاه مدينة نصر (تانى طلعة)
ومعاه لحد نفق السلام وتنزله وبعديه نزلة اسمها مدينة نصر (الحى العاشر) هتلاقى نفسك فى السوق
واظن ده اسهل حاجة

[sha2e]

لو دائري " الطريق الاطول " خد اتجاه المعادي لحد أكاديمية الشرطه هتدخل يمين هتعدي على زهراء مدينة نصر وبعدين موقف العاشر وبعدين علطول هتلاقي سوق العاشر

لو من الزراعي شبرا شوف انت بتوصل لعباس العقاد ازاي - سواء من القبه او كوبري أكتوبر - المهم تاخد عباس العقاد لأخره لحد ما تلاقى انبي امامك هتلف من أمامه وتخليها على يمينك وتمشي شويه هتلاقى نفسك فى السوق

ولو كملت فى نفس الاتجاه بعد السوق هتلاقي نفسك على الدائري امام اكاديمية الشرطه " الطريق الاول"

[HOSSAM99]

و عليكم السلام و رحمة الله و بركاته
الناس مشكورين وصفولك الطريق
لكن فيه حاجه نسيوها إنك هاترجع من السوق عندك جفاف من الشمس و الحراره
خلي يبقي معاك طاقيه متينه و منديل محلاوي مبلول لزوم طرطيب القفا اللي هايتفحم و كام أزازه ميه متلجه و أيس تانك
و قبل أذان الضهر بنص ساعه تجري علي الجامع تتوضي و تحجز مكان (مش هاتستحمل تصلي في الصهد)
متحتكش و لا تركز مع كلام حد قد يفقدك ذلك ثواب صيام اليوم بل صيام رمضان كاملا (فيه كائنات عجيبه هناك )
سعر السوق أزيد من كونتاكت و باقي مواقع البيع و الشراء

لكن لو مكانك خليها بعد العيد
بالتوفيق

[A7MED_PHARMA]

رمضان كريم

مش عارف اقولكم ايه يارجالة كلكم واحد واحد

شكرا بجد كنت هتسوح بكره .. مابحبش اروح مكان بالعربية مش عارف طريقه

انا رايح بعد صلاة الجمعة


والحمد لله يعني الواحد اتحكت في العربيات كتير
وبعدين انا رايح اجيب عربية مكوة او كريستالة
وانا عارف اسعارهم وعارف مخابئهم وعارف فيهم زي كف ايدي
وعارف سعر كل حالة ايه
يعني كلام الناس .. يتكلمو زي مايحبو .. انا عارف الحاجة تسوى كام قدامي





الف شكر للرجالة

محدش نازل السوق بكره طيب نونس بعض

[rockana9112007]

انا نزلت السوق كام مرة كدة

ولله الحمد كرهت نفسى وكرهت العربيات

بس حابب اقولك متخودش فلوس (مبلغ كبير معاك ) عشان شوفت اشكال هناك غريبة

[shaddadfalcon1]

زي ماالأخوه قالو هتاخد الدائري من علي الزراعي اتجاه مدينية نصر وهتعدي نفس السلام والمطار وبعدين هتلاقي مخرج مدينة نصر - الحي العاشر وعشان كده خليك يمين عشان متنزلش النفق وهتلاقي علي قمة الشارع ده ميكروباصات كتيير بتحمل والشارع ده اسمه اجمد الزمر او زاكر حسين
وهو ده بقي اللي فيه سوق السيارات من اوله لاخره

يستحسن طبعا اول ماتلاقي الزحمه اركن علي جنب وانزل اتمشي لانك لو دخلت في الزحمه مش هتعرف تطلع غير علي الفطار

انا مره دخلت من اوله العصر وعبال ماعديت منه كنت بعد المغرب مع انه كله علي بعضه مايخدش 5 دقايق

لو مشيت فيه كتيير او ناوي تمشي لاخره قولي عشان انا ساكن فيه عند جامع السلام واهي فرصه اتعرف عليك ونفطر سوي

[sha2e]

في طريقين كمان للوصول للقاهره لكن معرفش ظروفهم ايه دلوقتي
من الزقازيق لبلبيس وبعد كده طريق الاسماعليه "الزراعي" لحد الدائري
وممكن من بلبيس لطريق الاسماعليه الصحراوي وتاخده للدائري وده هيكون الاقرب