عاوز اسافر الغردقه بعد العيد ... حد يفيدنى !!!

[alaaeldeinm]

السلام عليكم وحمه الله وبركاته
إن شاء الله ناوى اسافر انا و الاواد نصيف ف الغردقه بعد العيد على طول
وقررت اسافر بعربيتى عشان الشنط و بهدله الاولاد
ياريت لو حد سافر قريب يعرفنى شويه حاجات مهمه :

- الطريق اخباره ايه امان ولا لا .... انا هسافر إن شاء الله بعد الفجر ان شاء الله
- الاحتياطات اللى لازم اعملها قبل ماطلع عشان الامان على الطريق
- المسافه تقريبا كام كيلو تاخد وقت أد ايه
- ايه اللى هحتاجه معايا ف رحله السفر دى
لو حد عنده فكره عن اماكن الخروجات و الفسح هناك و الاسعار يبقى ليه جزيل الشكر
وادعولى ياخوانا لان اول مره هسافر مشوار طويل كده

[Egyzizo]

دى مشاركة منقولة من موضوع سابق :

- الطريق : احسن طريق هو طريق القطامية - العين السخنه و مدخله من الطريق الدائرى بعد كارفور بحوالى 5 كيلو و تقسيمة الطريق من القاهرة للغردقة كالأتى (القطامية - العين السخنه المسافة حوالى 120 كم و السرعة القصوى 120 و توجد بنزينة وطنية فى أول و منتصف و أخر الطريق) ثم (العين السخنه - الزعفرانة المسافة حوالى 70 كم و السرعة القصوى 90 و توجد بنزينة مصر للبترول فى أول الطريق و بنزينة التعاون فى الزعفرانة) ثم (الزعفرانة - رأس غارب المسافة حوالى 120 كم و السرعة القصوى 90 و توجد بنزينة موبيل فى رأس غارب) و أخيرا (رأس غارب - الغردقة المسافة حوالى 100 كم و السرعة القصوى 90) و مدخل الجونة قبل الغردقة بحوالى 23 كيلو، كل الطريق حلو و اتجاه واحد و العجل مش كتير ما عدا المسافة من العين السخنه - الزعفرانة اتجاهين و ياريت محدش يستعجل فيها لأنها خطر.

2 - المدينة : الغردقة مدينة جميلة و اسعارها معتدلة، يعنى ماتفرقش حاجة عن القاهرة، تنقسم الى جزئيين أساسيين (الدهار) و دى منطقة سكن أغلب سكان الغردقة من عائلات و موظفين و عاملين بالفنادق و هناك تحس انك فى احد الأحياء الشعبية و شوارعها نظيفة و متسفلتة و بها بعض الفنادق المتوسطة من 2 - 3 نجوم و لو عاوز اقامة نضيفة بسعر معقول فى فندق أو شقة يبقى هتلاقى طلبك هناك و فيها كمان شارع الحجاز اللى فيه ورش الميكانيكا و كل ما يتعلق بالسيارات بس مش هتلاقى غير 5% صنايعية كويسين علشان أغلب العربيات فى البلد جديدة. الجزء التانى من المدينة هى منطقة (السقالة) و بتمتد من ميدان السقالة حتى مطلع الهضبة مرورا بالشارع الرئيسى بالمنطقة و هو شارع شيراتون اللى بيضم مجموعة كبيرة من البازارات و المطاعم و الفنادق و هو بالأضافة للشوارع المتفرعة منه يعتبر المقر الرئيسى لمكاتب شركات السياحة و المكان المفضل لسكن الأجانب العاملين بشركات السياحة و الفنادق، و على فكرة الغردقة فيها ميزة جامدة وهى ان اللى مامعاهوش عربية يقدر يتنقل بسهولة بالميكروباصات بس هى مش زى ميكروباصات القاهرة بتبقى انضف و اجدد و اسعارها كويسة، يعنى بجنيه تجيب البلد من أولها لأخرها.

3 - الأقامة: الغردقة مدينة شتوية، يعنى لا انصح اى حد يروحها فى الصيف لأن الجو بيبقى ناااااااااااااااااااار، لو بتنزل فى فنادق هتلاقى تنوع كبير و اسعار كويسة (مقارنة بشرم الشيخ) و على قد ميزانيتك هتلاقى طلبك بس ماتسافرش من غير حجز ولو تحب تأجر شقة برضوا هتلاقى طلبك باسعار مقاربة للأسكندرية و الغردقة فيها 8 شواطىء عامة كويسة جدا كمواقع و نضافة.


4 - الأكل و الفسح: أحلى حاجة فى الغردقة ان كل واحد بيلاقى الفسحة اللى تناسبه و على حسب امكانياته و ده علشان التنوع اللى فيها و علشان فيها عائلات مقيمة هناك مش زى شرم الشيخ اللى كل حاجة فيها معمولة على مقاس الأجانب، المهم انصحكم تقضوا يوم كامل للصيد فى البحر و مش لازم عن طريق شركة أو فندق، روح الميناء السياحى و رتب مع ريس مركب قبلها بيومين و ممكن يضمك على مجموعة، أما بالنسبة للأكل فمتفوتوش المطاعم دى

- بيتا سفينكس: أكل على كل زوق جميل و نضيف قوى، متفرع من شارع شيراتون/ الشارع اللى على ناصيته مكدونالدز.
- أسماك الميناء أو الجوكر: الأتنين قريبين من بعض فى ميدان السقالة و أسعارهم زى بعض بس الميناء قعدته و خدمته احسن.
- بولز: مطعم امريكى و ايطالى بعد منزل الهضبة قبل الماريوت، زى تشيليز و البيتزا هناك ايطالى اصلى
- فول أبو أية: شارع شيراتون قبل ميدان عروسة البحر، كل و ادعيلى انا و ابو اية :d :d :d

[alaaeldeinm]

ياباشا جزاكم الله خير بجد افدتنى كتير و طمنتنى

[ZALABANY]

نصيحتي ليك يلاش الغردقه انا رحت السنه دي والحر كان لسه ما شدش كده وما اتبسطش فيها كبلد بصراحة الفندق بس اللي كان كويس لو هاتفضل قاعد في الفندق وتتبسط بيه وولادك يلعبوا روح لكن الغردقة كبلد بصراحة ما عجبتنيش ومنظر الشباب المصري اللي كل واحد مصري ساحب أجنبيه في إيده فعلا منظر سئ للغايه والبلد نفسها مافيهاش فسح لو روحت أوعى تروح مطعم بيتا سفينكس ده خماره مش مطعم وشكله ما يسرش بصراحه انا رحته بناء على المشاركه اللي فوق ولما دخلته خرجت على طول
لو هاتطلع تصطاد برده هاتتبسط بس للأسف اليومين دول مش موسم صيد
السفاري فيها سخيفه جدا لازم تطلع من الساعه 8 الصبح وطبعا الدنيا هاتكون حر جدا على الولاد
عايز نصيحتي جو اليومين دول عاوز مطرووووح

[Ahmed_Adham]

لو هتروح الغردقه خليك لشهر 10 عشان الغردقه مشتى مش مصيف واحلى جو بين المواسم.