طريق جمصة منين ؟؟

[أبو ياسين]

فى مكان اسمه جمصة تبع محافظة الدقهلية المفروض انى اروحه الاسابيع الجايه كتير
كنت عايز اعرف الطريق من اول طريق مصر اسكندريه الزراعى (شبرا الخيمه) لحد هناك
بوصف تفصيلى
انا اخرى لحد بنها بعد كده مرحتش
و شكرا

[WalidAdel]

شوف ياباشا طريق جمصه كالاتي
من عند كوبري بنها كده تنزل يمين علي طريق المنصوره تفضل ماشي لحد قبل المنصوره بحاجه بسيطه كده حتلاقي كوبري علوي تطلعه و تفضل ماشي علطول الي ماشاء الله لحد ما تلاقي كوبري معدي من فوقك كده و حتلاقي يافطه بتقولك جمصه يمين
ممكن تاخد الطريق ده او تكمل علطول من تحت الكوبري بردوا ده الطريق الدولي حيوصلك لجمصه بس الطريق فيه اصلاحات و مقرف و مليان مطبات خليك في الطريق القديم احسن

[hazem_khidr]

بص يا سيدي
عندك طريقين
يا اما من عند بنها تاخد يمين من الكوبري اللي هو طريق كفر شكر و توصل للمنصوره و من المنصوره تاخد طريق جمصه بس طريق بايخ شويه.
او انك تاخد الطريق لحد المحله و من المحله للمنصوره و من هناك بتاخد طريق جمصه برضه.
حتت وصف تفصيلي دي ما تنفعش لانك بتقول اخرك لحد بنها ف محدش حيقدر يوصفهالك اكتر اكتر من كده:)

[أبو ياسين]

الف شكر و ان شاء الله هحاول اوصل

[WalidAdel]

انا ممكن ياباشا لو تحب يوميها ابقي معاك علي التليفون لحد ماتوصل انا معنديش مانع
او حل تاني لو تعرف موقف عبود تروح هناك اول بوابه حتلاقي عربيات طالعه جمصه تظبط مع السواق اللي طالع و تقولوا حطلع وراك بعربيتي ممكن تبقي تديلوا فلوس 5 جنيه ولا حاجه علي اساس يبقي واخد بالوا منك في الطريق

[M_ashraf]

شوف يا سيدي بالظبط كالتالي
عند بنها انزل يمين مع نزلة كفر شكر والمنصورة
وافضل ماش طوالي هتعدي على كفر شكر ثم ميت غمر
ثم قرى صغيرة لحد ما توصل قرية طنامل وهي قرية كلها جزارين ومحلات بيع لحوم
على جانبي الطريق كمل طوالي هتلاقي كوبري اطلع وانزل
طوالي هتلاقي كوبري فوق ترعة ادخله وبعده شمال الى المنصورة
طوالي هتعدي على قرى وهتلاقي توكيل عيسى بتاع صيانة هياكل دايوو واسبيرانزا على يمينك بعد شوية
طوالي لحد ما توصل قرية منية سندوب
ركز هناك في زي كمين جمب محطة الكهرباء
وفي على اليمين توكيال الموافي للسيارات بتاع سيارات نيسان
وبعديه على اليمين مدرسة ماشي ركز بقى
بعد كده بالظبط هتلاقي ادامك يا تكمل طوالي وتعدي من تحت الكوبري يا اما تطلع طلعة الكوبري يمين اطلع يمين وهتلاقي قبله بشوية على اليمين في اخر قرية منية سندوب كعلامة يعني
يافطة على اليمين مكتوب عليعا طريق المنصورة الشرقي مغلق للاصلاح
بعدها على طول يمين طلعة الكوبري اللي قلتلك عليها هتلاقيها طلعة ولافة جامد لف معاها وانزل
هتلاقي على يمينك اكاديمية مصر للعلوم والتكنولوجيا كمل طوالي للاخر هتلاقي صينية وبعدها كوبري
اطلع الكوبري وانزل وخد يمين كده تبقى وصلت طلخا اشمي طوالي على طول كتير هتلاقي نفسك بعد شوية ماشي وعلى يمينك ترعة وتبدا تلاقي قرى على يمينك تدخلها بكباري من فوق الترعة وعند كل قرية مطب او اتنين وهتوصل عند مركز شربين كمل طوالي ملكش دعوة
لحد ما توصل عند بداية قرية هتلاقي عندها تمثال وعنده يا فطة الى جمصة شمال
يعني تاخد اول يو تيرن وترجع تدخله ده اسمه طريق بطرة بسنديلة بس هو طريق وحش ولا انصحك به لانه حارة واحدة رايح جاي في وش بعض يبقى سيبك منه ومتدخلهوش؟؟؟؟؟؟؟؟؟؟
نرجع تاني زي ماكنا ماشيين في الطوالي اللي كنان ماشيين فيه ومش هنلف عند التمثال ولا حاجة
الى ان تدخل في كمين محافظة دمياط
انتبه معايا كمل طوالي زي ما انت
هتلاقي على يمينك بعد شوية مطلع كوبري يمين متجه الى فارسكور سيبك منه كمل طوالي هتلاقي اول مركز كبير هو كفر سعد بعديه على طول ركز معايا هتلاقي طلعة كوبري يمين مكتوب عليها بورسعيد
خد اول يو تيرن بعدها على طولوهتلاقي على يمينك في ذلك الاتجاه بلوكات اسمنتية وهي مدخل الطريق الدولي ادخل معاها وطوالي على طول طالع ونازل مع الطريق وبعد شوية هتلاقي جمصة على يمينك ادخلها بالسلامة
ولو في اي استفسار انا تحت امرك
يمكن الطريق ده اطول حاجة بسيطه لكن صدقني احسن من طريق بطرة بسنديلة كتير وفرق طول المسافة هيتعوض فرق سرعة متجربة وتوصل بالسلامة

اسف للاطالة لكنك طلبت وصف تفصيلي

[أبو ياسين]

الف شكر استاذ m حتته وصفه تمام
انا اول مشوار ليا يوم الجمعه الجية ان شاء الله
هحط الوصفة على التابلوه و اتوكل
استاذ وليد الف شكر بس حظرتك عارف ان الشعب المصرى متعاون مكان مهتسال هتلاقى الف واحد يدلك فا ان شاء الله مش هزعج حظرتك بتليفون بالذات انى مسافر الساعة 5 الصبح هربا من الزحمه و حر الطريق
و شكرا لكل من ساهم

[Karim_Monir]

واعمل حسابك على تربيط عفشة لما ترجع
مشوار مهبب بصراحة
طلعتة من كام سنة وكان علقة

[أبو ياسين]

واعمل حسابك على تربيط عفشة لما ترجع
مشوار مهبب بصراحة
طلعتة من كام سنة وكان علقة

طمنتنى و شكرا على النصيحة