حد راح طابا او نوبيع بالعربيه قبل كده ..

[Migo123]

شباب كنت عايز اعرف شويه معلومات عن طريق طابا، نوبيع من بعد النفق لغاية نوبيع
يعني في بنزينات او استراحات
حالة الطريق

خصوصا من طابا لنوبيع المسافه تقريبا كام ؟؟؟
وبعدين انا شايف طريقين واحد داخلي من وسط الجبال
وطريق تاني من على البحر
ايهما أفضل لو انا رايح على نوبيع (ادخل طابا وانزل من على طريق البحر ولا اخش من الوصله اللي جوه ؟؟؟

مشكورييين

[ahmed azab]

انا روحت بالعربية اخر مرة من حوالي سنتين الطريق لنويبع هتدخل من طابا اعتقد ده الطريق الوحيد بمحازاة البحر ومن بعد النفق علي اول طريق طابا رست اسمه نخل ( بكسر الخاء) وده اللي بيوقف فيه شرق الدلتا
الاستراحات مش كتير علي الطريق لكنه طريق جميل جدا خصوصا 40 كيلو قبل كمين طابا اسمهم شق التعبان ودول وسط الجبل (منحدر جامد)
ومن طابا حتي نويبع حوالي 60 كيلو

[Migo123]

في طريق داخلي متفرع من طريق طابا قبل طابا بحوالي 40 كيلو
ده ماشي وسط الجبال لغايه نوبيع (اسمه طريق 37 هلى جوجل ايرث)
بس مش عارف ده حد بيستخدمه ولا لأ؟؟

[dentalbibo]

انا رحت من شهرين تلاته تقريبا
فولت بنزين في العاشر من رمضان و تاني تفويله كانت في نويبع .. الطريق لحد النفق ممتاز خصوصا لو انت جاي من القاهرة على طريق السويس .. بعد نخل مفيش استراحات تقريبا .. يعني نصيحة مني استغل كل محطة بنزين في طريقك .. الطريق قبل نويبع بحوالي 40 كيلو مليان تلافيف ومنحدرات ومحتاج تركيز .. السواقة بليل بتسهل موضوع انك تشوف اللي جاي من الناحية التانية عشان النور بتاعه بيضرب في المنحنيات .. بس السواقة هناك بليل عاوزة قلب جامد :)

[GBYTE]

تمام ذى الاخوة لكن ارخم حاجة عند المطار لازم تلف حولين المطار كله عشان تكمل الطريق لكن اجمل حاجة شق التعبان سبحان الله على الجبال وتحس بضغط الجبال وفيه منزل ممكن تمور العربية لكن احظر رجلك على الفرامل ..................

[سمير يونس]

وفيه منزل ممكن تمور العربية لكن احظر رجلك على الفرامل ..................

خطر جداً إنك تمور العربية وانت نازل منحدر لأنك كدة بتفقد السيطرة على السيارة و لو دوست فرامل وانت نازل المنحدر بسرعة ممكن لا قدر الله العربية

تقلب و بعدين كتر التحميل على الفرامل في المنحدرات القاسية ممكن يسبب تلف التيل و تأكله بسرعة و سخونته

و السواقة الصح في المنحدرات إنك تعشق الفيتيس على الثالث و يستحسن إنك تعشقه على التاني خصوصاً لو كان المنحدر شديد

تقبل تحياتي

[mohamed ibiza]

احنا رحنا شرم بالعربية و الطريق فيه استراحات و بنزينات بس مش كتير يعني احنا رحنا بالابيزا يفضل قبل ما تطلع تبقي واخد اكلك وحاجتك لا حاجة الاستراحات ممكن متعجبكش يعني و تفول العربية بنزين و تقرا الفاتحة و تكون نايم كويس لان الطريق ده خطر جدا جدا و فيه سواقين مجانين و لازم تكون مركز لاقصي درجة ممكنة و تبقي مظبط نور العربية قبل ما تطلع و تعملها صيانة عشان الطريق ده مفهوش ريحة الميكانيكية :d:d

[Migo123]

انا طلعت فعلا بالعربيه في اجازه العيد واليكم الانباء بالتفصيل

- طريق السويس لحد النفق وده طبعا معروف
- بعد النفق في اتجاهين هتاخد الشمال طريق طابا 265 كيلو
- اول حاجه هتقابلك مدينه نخل ودي فيها بنزينه (مهم قوي انك تكون مفول قبل دخول النفق في وطنية ودي غالبا اخر مكان في 92 )لا انصح باستخدامه الا لو مضطرا. الاستراحات في نخل طبعا ضايعه .... كبيرك تريح وتقف في مكان في ناس والمفروض انك تكن مجهز نفسك بالاكل والشرب
مهم جدا....... انواع المياه المعدنيه الموجود على الطريق او هناك غالبا انواع غريبه وشكلها ضايع ... خد معاك كرتونه ميه.
- الطريق طبعا مزدوج ولكن متسفلت كويس وواسع والمرور عليه ضعيف جدا مفيش اي زحمه .... في حته تقريبا حوالي 5 كيلو فيها صيانه... خلي بالك منها

- بعد نخل هتقابل 2 كمين و المناظر على الطريق اكتر من رائعه جبال وصحراء مفتوحه وجرب تفتح الشباك شويه وتشم هو الصحرا عشان فعلا هوا يرد الروح بس طبعا هتحتاج تهدي السرعه شويه.ا

-بعد الكمين تاني مفرق طرق
يمين تاخد طريق وادي وتير لنوبع
على طول طابا

انا خدت طريق وداي وتير وده حوالي 100- 120 كيلو
وده يوصلك لغاية نوبيع
والطريق ده متعه

اخر 40 كيلو انت بتمش في وسط الجبال
اعمل حسابك تاخدهم في ساعه مثلا او اقل قليلا
بس بصراحة متعه

[Migo123]

خطر جداً إنك تمور العربية وانت نازل منحدر لأنك كدة بتفقد السيطرة على السيارة و لو دوست فرامل وانت نازل المنحدر بسرعة ممكن لا قدر الله العربية

تقلب و بعدين كتر التحميل على الفرامل في المنحدرات القاسية ممكن يسبب تلف التيل و تأكله بسرعة و سخونته

و السواقة الصح في المنحدرات إنك تعشق الفيتيس على الثالث و يستحسن إنك تعشقه على التاني خصوصاً لو كان المنحدر شديد

دي اهم نصيحه لازم اي حد يسوق على طرق سيناء يبقى ملم بيها جدا وينفذها بالحرف
خصوصا ان المنحدرات في سيناء غالبا بتبقى مصاحبه لملفات جامدة و استخدام الفرامل فقط ممكن يخليك تفقد السيطرة على العربيه و الطريق اصلا مفيهوش فرصه للتهريج :)

[champoo]

انا كنت راجع من نويبع على الطريق ده و اتقلب بينا الأوتوبيس و السواق مات بس كنا راجعيين بليل هو على قد ما هو طريق جميل بس بشهادة جميع السواقين العقر من اخطر الطرق فى سينا لأنه بيتميز بمنحدرات و ملفات قوية و مفاجاءة و ربنا يستر على الجميع