مستشفى مصر الدولى

[ramy_gamal]

يوم الجمعه اللى جايه رايح مستشفى مصر الدولى اللى فى الدقى كنت سمعت انها من عند كوبرى قصر النيل .
فلو ممكن الواصفه من بعد البوابات ( انا جاى من اسكندريه ) وهل يوم الجمعه فى مشاكل فى المنطقه دى من ناحيه المظاهرات ولا احاول اروح يوم تانى بس اعتقد هيكون زحمه ...متهيالى الجمعه اروق شويه
الف شكر مقدما

[kh_fawzy]

ممكن تنزل المحور لحد الكورنيش وتفضل ماشى مع الكورنيش وتعدى مستشفى الشرطه ونعمه وبعدين تدخل الشارع اللى قبل موبيل عالطول هاتلاقى المستشفى شمالك

[kh_fawzy]

المستشفى هاتبقى يمينك مش شملك معلش غلط

[ramy_gamal]

متشكر على ردك.... يعنى انا مش هطلع كوبرى 6 اكتوبر

[kh_fawzy]

لا مش هاتطلع اكتوبر هاتكمل عالطول وتدخل الشارع اللى قبل بنزينه موبيل عالطول

[ramy_gamal]

معلش استحملنى
انا همشى على الكورنيش وهيكون النيل على يمينى مستشفى الشرطه هتكون شمال وبنزينه موبيل شمال برضو ؟

[mohamed_selim]

بص يا باشا عشان اللخبطه ادى الوصفه بالتفصيل
هتعدى البوابات و تعدى تحت المحور و تلف يوترن و ترجع تركب المحور و تعدى من تحت الدائرى و شويه هتوصل ميدان لبنان تاخد اليمين عشان تكمل طوالى و تخرج من المحور من اول يمين بعد ميدان لبنان و هتكون عند باب نادى الزمالك و تمشى مع السور و تخش يمين فى شارع جامعة الدول و تلف و ترجع اول يوترن فى اول يمين (كانك ماشى تحت المحور) و هتوصل للكورنيش و تخش يمين هيكون النيل شمالك و تكمل طوالى و تعدى مستشفى الشرطه (على يمينك) و تعدى تحت كوبرى اكتوبر و بعديه بشويه هتلاقى بنزينة موبيل على يمينك تخش قبلها يمين .... مش هتلاقى ركنه بسهولع فلو لقيت ركنه على الشارع الرئيسي متسيبهاش

[ramy_gamal]

الف شكر على الوصف الواضح
اللى كان ملغبطى ان على جوجل انزل على كورنيش النيل والنيل يكون على يمينى لحد الجبلايه وادخل يمين واعدى النيل وانزل والف وارجع على الكورنيش من الناحيه التانيه

[mohamed_selim]

ماهو ده حل عشان تتلافى انك تنزل عند نادى الزمالك و تلف و ترجع من تحت على كورنيش الجيزه بس بالنسبه للجمعه الصبح انا افضل الوصفه اللى قولتهالك

[ramy_gamal]

تمام .... لكن السكه دى مفيهاش قلق وبالنسبه ل الرجوع هيكون بالليل امشى من نفس السكه

[mohamed_selim]

السكه بالراجع هتمشى كورنيش و تعدى من تحت كوبرى ١٥ مايو اللى هو امتداد المحور و تخش شمال و طوالى هتوصل ميدان و تاخد اول يوترن لعد الميدان و ترجع تخش يمين فى يمين هتلاقى نفسك على المحور و طوالى لحد ما توصل الصحراوى تنزل يمين على اسكندريه

بالنسبه للقلق دى حاجه مش مضمونه فى اى حته فى مصر

[ramy_gamal]

الف الف شكر