من فضلك لو سمحت اروح فين منين

[AlmAhAtmA]

طبعا نظرا لاني اسكندراني
فمعلوماتي عن شوارع القاهره تكاد تكون منعدمه
شويه بشويه بدات اعرف اماكن و اسهل الطرق ليها
لكن طبعا اكيد بحتاج وصفات سهله

انا كل ما احتاج مكان جديد حضيفه علي الموضوع اللي حيبتدي بيكم و يستمر بيكم برضوا

المره دي انا جي من الصحراوي و عايز اروح دار الاوبرا

اعمل ايه بعد ما اركب المحور

افيدوني افادكم الله

[kareem_Ashmawy]

بص حضرتك ادخل على الموقع ده
هتلاقى فى كل حاجة عن الطرق فى القاهرة
و تقدر منه تكتب اسم الشارع او الميدان او الحى اللى انت عايزة و هو يجيبلك خريطة واضحة به
كمان ممكن تنزل نسخة مصغرة منه على الموبايل
تساعدك و انت ماشى
تحياتى..

الموقع أهوه :

https://www.cairolocator.com

لو مشتغلش اكتب الاسم فى جوجل و هو هيجيبهولك..

[AlmAhAtmA]

شكرا يا كريم علي الموقع الجميل ده

[د.أحمد سمير]

الموقع فعلاً جميل ورائع

لكن عالسريع كدة .. لو جاي من المحور خليك ماشي لحد كوبري 15 مايو .. أول كوبري حيقابلك في المهندسين بعد ميدان لبنان .. بعد ما تطلع انزل أول منزل يقابلك ، حتلاقي عنده كدة زحمة وخناقات والذي منه .. ده منزل الزمالك . بعد ما تنزل امشي طوالي لا يمين ولا شمال ، حيقابلك مطلع كوبري أكتوبر متطلعوش نهائي .. خليك طوالي ، حتلاقي الطريق بقى اتجاه اجباري شمال بعد النادي الأهلي .. أنت الآن أصبحي أمام باركينج دار الأوبرا .. وحمد الله على السلامة
ملحوظة : لو غلسوا عليك ورفضوا يدخلوك الباركينج من الحتة دي ، وطبعاً استحالة تلاقي ركنة عادية في الشارع ، حتلف حوالين دار الأوبرا يعني بعد ما تخش شمال في الاتجاه الإجباري داخل الشارع الأفعواني حتلف يمين في يمين في يمين حتلاقيك على مدخل الباركينج عند كوبري الجلاء .

ونورت مصر .. هههههه
تحياتي يا هاني

[Eng.Ahmed]

يا هانى بيه القاهره هاتنور بيك ، لو عاوز تروح اى مكان كلمنى وانا تحت امرك ، بس اوعا تنسى الكاب علشان الشمس

م / احمد فوزى
0125805764

[AlmAhAtmA]

دكتور احمد
بجد ربنا يخليك ليا
يعني فيه ناس بتحس انهم نعمه من الله
انت من الناس دي يا دكتور
كمل جميلك و قولي ابطل الاوترفين ازاي علشان انا بقيت بتلات تخرام مناخير من كتر النقط

باشمهندس احمد
استناني بعد الفاصل
انا كل ما اكون رايح مشوار حكلمك

بجد يا جماعه الحمد لله علي المجموعه الرائعه اعضاء المنتدي

[Santino]

الموقع ده ح ينفع حضرتك :

http://www.khareeta.net/

[Karim_Monir]

دكتور احمد
بجد ربنا يخليك ليا
يعني فيه ناس بتحس انهم نعمه من الله
انت من الناس دي يا دكتور
كمل جميلك و قولي ابطل الاوترفين ازاي علشان انا بقيت بتلات تخرام مناخير من كتر النقط

باشمهندس احمد
استناني بعد الفاصل
انا كل ما اكون رايح مشوار حكلمك

بجد يا جماعه الحمد لله علي المجموعه الرائعه اعضاء المنتدي

نورت مصر وارجع بسرعة عشان بلدنا حر مووووت
دكتور احمد سمير دكتور جامعي في جامعة مصر الدولية
دكتور احمد DR Ahmed
هو اللي اخصائي انف واذن
:lol: :lol: :lol: :lol:

[AlmAhAtmA]

انا بعتذر عن اللبس اللي حصل


انا جي و غلاوتك لاجي
اصلي بحب امشي جوه الحيط الاول

[kimoo2002]

والله موقع جميل جدا
والف الف شكر على الاستفادة من الموقع دة