خريطه مفصله للقاهره؟؟؟؟؟؟؟؟؟؟؟؟؟

[theking2690]

كنت عاوز خريطه مفصله للقاهره الاقيها فين على النت و لا اشتريها منين لأنى انا معلوماتى بالطرق ضايعه خالص و مش عارف احفظ اسماء الشوارع يعنى ممكن اكون عارف الشارع وواحد يوصفهولى معرفهوش علشان معرفش اسمه وبقيت كل مشوار علشان اروحه لازم اتوه شويه الاول علشان اعرف اوصل بعد سؤال ناس كتيير و الغريبه ان وصفاتهم كلها بتكون مختلفه عن بعض ده طبعا نتيجه للقاعده المصريه الشهيره اللى يسأل لازم يتوه و كل اما اسأل واحد يقول هو قالك تروحله منين بالظبط طب ما هو لو كان قالى كنت روحت من غير ما اسأل حضرتك اصلا و اللى بيغيظنى عساكر المرور اللى هما مش بيبقوا عارفين هما واقفين فين و جربتها عندنا فى ميدان الخلفاوى وسألت العسكرى اللى واقف فى الميدان لو سمحت هو فين ميدان الخلفاوى قالى معرفش معلش طولت عليكو بس الموضوع ده تعبنى جدا فى اى مشوار اروحه بالعربيه

[pro_samir]

الله المستعان
والله حاجة بقت تنقط بجد
يعنى يا ريت اللى مش عارف يقول مش عارف وخلاص تبقى أرحم لاكن لازم يفتى
انا من يومين قعدت نص ساعة الف فى شارع واحد رايح جاى عمال ادور على برج معروف والمصيبة انى كنت جنبة وبرضو بعتونى اخر الشارع
والأجمل بقى ان الشارع اتجاة واحد واتظبطت الصراحة وحتى مكنتش بلاقى حتة أركن فيها علشان انزل اعرف اسأل :@
سبحان الله مع ان دة من الصدقة اصلا انك ترشد حد

http://www.nilemotors.net/Nile/showthread.php?t=47512

[sh21s]

قمت برفع خريطة القاهرة مقسمة بناء على الأحياء و أقسام الشرطة على النت من خلال الرابط التالى:

http://www.4shared.com/file/72748406/ffb293b/__online.html

الملف على صورة rar و حجمه 27.5 ميجا.
أدعوا الله أن يفيد الجميع.

[theking2690]

الف شكر يا باشا على الخرائط وشكرا يا سمير باشا على ردكو معلش لو فيها رخامه انا كنت عاوز اشترى خريطه بتاعة القاهره الكبرى علشان اسيبها فى العربيه ياريت لو حد يفيدنى اشتريها منين

[ahmed1981]

الف شكر يا باشا على الخرائط وشكرا يا سمير باشا على ردكو معلش لو فيها رخامه انا كنت عاوز اشترى خريطه بتاعة القاهره الكبرى علشان اسيبها فى العربيه ياريت لو حد يفيدنى اشتريها منين

أنا إشتريت خريطة كبيرة للقاهرة زمان من فرع هيئة المساحة بمعرض الكتاب
وكان سعرها 15 جنيه
ممكن تسأل في هيئة المساحة بالدقي

[theking2690]

طيب معلش هى فين هيئة المساحه ديه فى الدقى

[sherif_84]

شكرا على الخريطة يا شريف باشا وجزاك الله خيرا

[sh21s]

الحمد لله أن الخرائط كانت مفيدة.
بالنسبة لهيئة المساحة المصرية:
الموقع الرسمى على الانترنت: http://www.esa.gov.eg/indexar.aspx
و من هذا الموقع يمكنك معرفة أماكن بيع الخرائط و أسعارها أيضا: http://www.esa.gov.eg/Static/MapShopsAR.aspx
و بالنسبة لمديريات المساحة: http://www.esa.gov.eg/Static/indexof...icationar.aspx

و عليك إنك تعتمد على الخريطة عشان تعرف تروح الأماكن دى :k4:

[sh21s]

هناك موقع آخر وجدته خاص بهيئة المساحة أيضا.
وهو موقع خدمات لكن الحقيقة لم أتفقده جيدا:

http://www.portal.esa.gov.eg/ar_Portal/ptk

[hero]

الف شكر يا باشمهندس شريف وجزاك الله خيرا عن كل من سيستفيد بهذة الخرائط....
انا فعلا كنت بادور برضة علي خرايط...وكنت قارف نفسي علي الجوجل مابس وان كان برضة خرايطة كويسة....

في برضة كتيب كانت مطبعه الجامعه الامريكية عملها للقاهرة فقط....اسمة Cairo Maps هو بحوالي 45 جنية ...

[theking2690]

الف شكر يا شريف تعبتك معايا جدا وهى طلع عنوانها 16 شارع عكاشه فى الدقى هبقى اعدى عليهم بكره بإذن الله و اشوف ايه النظام

[sh21s]

أرجو يا مصطفى أن تكتب لنا عن محاولتك فى الهيئة و أخر ما وصلت إليه. و إذا كانت الخرائط الموجودة لديهم حديثة أم قديمة. طبعا عارف إن كل يومين ثلاثة فى تغيير فى شوارع المحروسة

[marsguy]

ممكن برضه تفكر في موضوع الـ Gps

مفيد جداً

[theking2690]

تم بحمد الله انهارده روحت اشتريتها و تنبيه يا جماعه اللى هيروح يشتريها يكون مفضى نفسه 2 او 3 ساعات والله انهارده كرهت نفسى وكرهت اليوم اللى فكرت اشترى فيه خريطه انا كنت فاكر الموضوع كله هياخد 5 دقائق قعدت فيه من 12:15 خلصت 1:45 اولا روحت على المبنى اللى فى 16 شارع عكاشه فى الدقى طلع مش ده اللى بيبيع الخرايط قالولى المبنى بتاع بيع الخرايط قدام مديرية امن الجيزه طبعا انا كنت ركنت العربيه خلاص فأضطريت اخدها مشى وبعدين وصلت قلتلهم يا جماعه انا عاوز خريطه القاهره الكبرى الخاصه بالطرق قالولى ان فيه 2 فيه واحده اسمها القاهره 2006 و فيه القاهره 2008 المهم قالولى ان 2006 احسن من 2008 على حسب كلامهم المهم الاجراءات كالتالى هتروح تشترى استماره من هناك ب1جنيه وبعدين تقولها الخريطه اللى انت عاوزها بالنسبالى كانت(القاهرة 2006) وبعد كده تطلع على مكتب مدير ادارة بيع الخرائط اسمه استاذ حمدى وتخليه يمضيلك على الاستماره وبعد كده تطلع على الشباك اللى جنبه هناك فيه واحد اسمه عم سعد هياخد منك الاستماره وهيعد بعديها بتاع نص ساعه مختفى فى مخزن الخرايط جوه بعد كده يطلعلك ويقولك على سعر الخريطه وبكتبهولك على الاستماره ويقولك اطلع على الخزنه تدفع بعدين تجيله تانى تطلع على الخزنه تقعد هناك بتاع نص ساعه تانى وبعد كده ترجع على عم سعد تانى تديله الاستماره ووصل احمر بتاع الدفع و يقعد بتاع نص ساعه كمان و اخيرااااااااا يسلمك الخريطه بعد ما تكون كرهت نفسك وكرهت اليوم اللى فكرت تشترى فيه الخريطه ويمكن تفضل انك تفضل تايه علطول على انك تشترى الخريطه معلش يا شريف باشا انا طولت عليك بس اصلى اول مره اتعامل مع الروتين الحكومى فأنت عارف الصدمه لسه فى بدايتها لسه على ما اتعود المهم انا هحاول اعدى على زيروكس و اعمل scan للخريطه وابقى ارفعها على اى سايت رفع واحط اللينك هنا فى الموضوع

[AhmedSarhan]

مبروووووووووووك يا درش........عقبال الgps