استفسار عن الطريق الدائرى....

[amrrashed]

بما انى ولله الحمد فاشل فى الاتجاهات ارجو من اصدقائنا توضيح كافة المخارج اللى على الطريق الدائرى علشان االواحد يعرف يطلع منين وينزل فين لو فى رسمة ده يبقى لوز..... وشكرا

[Hossam_Hassan]

شرح كل الطريق صعب علشان قليل اللى حافظه، حدد مسارك من - الى و اللى يعرف هيقول

[m74mansour]

أنا دورت كتير عن خريطة توضح الطريق الدائرى ومنها حايبقى عندنا تصور ومش محتاج تفاصيل كتير ... ممكن حد يخدمنا بالخريطة دى ؟

[MMamdouh]

انا شايف ان ممكن يتعمل لقطات من جوجل ايرث للطريق مع شوية اسهم و توضيحات بسيطة لان معتقدش فى خريطة دقيقة للطريق

MMamdouh

[أبوسيف]

أنا ممكن أقولك على جزء من الدائرى وهو الجزء من أول التقاطع مع المحور لغاية مدينة السلام وبداية طريق الإسماعيلية ،
الجزء دة فى 8 نزلات هانقولهم واحدة واحدة:
1- نزلة القومية: ودى بتنزلك فى شارع القومية العربية فى إمبابة ومنها على شارع الوحدة ثم على كوبرى روض الفرج
2- نزلة الوراق
3- نزلة باسوس وطريق القناطر ، ودى لو نزلت وأخدت يمين تطلعك على المؤسسة ولو أخدت شمال تطلع على أبو الغيط والقناطر
4-نزلة طريق إسكندرية الزراعى
5- منزل ميت نما ودى بتنزلك فى قرية اسمها ميت نما ومنها على شبرا الخيمة (خلف السكة الحديد)
6- منزل بهتيم
7- منزل مسطرد ودى يمين على مسطرد والمطرية وشارع الكابلات وشمال على مدينة الخصوص
8- منزل المرج
ونهاية الطريق يمين النفق على شارع جسر السويس ومنه لمصر الجديدة والمطار ، اما لو نزلت النفق هايطلعك على طريق الإسماعيلية

[د.أحمد سمير]

أكملك أنا
بعد نفق السلام في مخرج طريق السويس : يمين إلى ألماظة ومصر الجديدة ، وشمال إلى مدينتي ومدينة الشروق ثم السويس .
مخرج مدينة نصر أعلى نفق التجمع الأول : عند الربوة .. يمين إلى مدينة نصر شارع ذاكر حسين ، وشمال إلى التجمع الأول .
مخرج مدينة نصر 2 أعلى نفق التجمع الخامس ( محور NA ): يمين إلى مدينة نصر عند الوفاء والأمل ، وإلى المقطم ، وشمال غلى التجمع الخامس والثالث والقطامية .
مخرج القطامية العين السخنة ( رقم 8 ) : يمين إلى شارع المخيم الدائم بمدينة نصر والحي السابع ، وشمال إلى القطامية والعين السخنة .
نفق زهراء المعادي : يمين إلى مدينة عباد الرحمن والفرسان ونادي الصيد الجديد ، وشمال إلى كارفور وزهراء المعادي .
مخرج الأتوستراد : يمين إلى البساتين والسيدة عائشة في اتجاه مدينة نصر ، وشمال إلى حلوان .
مخرج كوبري المنيب 1 : يمين إلى دار السلام ومصر القديمة باتجاه شارع القصر العيني ، وشمال إلى المعادي .
مخرج كوبري المنيب 2 : يمين إلى الجيزة وميدان الجيزة والمهندسين ، وشمال إلى أم المصريين والمنيب وطريق الصعيد .
مخرج المريوطية : يمين إلى شارعي الهرم وفيصل إلى كرداسة ، وشمال إلى أرياف الجيزة يعني الحوامدية ، الصف ..الخ
مخرج المنصورية : يمين إلى شارع الهرم وفيصل ، وشمال لأرياف الجيزة أيضاً .
أعتقد كدة الطريق انتهى من الناحية التانية
لكن لو بدأنا من بعد منزل المحور كأنك قادم من امبابة أعتقد فيه منزل واحد عند حدائق الأهرام على طريق الاسكندرية قبل ميدان الرماية ، وهو الذي يتصل بالوصلة الجديدة التي تنتهي عند مدينة الإنتاج الإعلامي على طريق الواحات .
هذه آخر معلوماتي .
تقبلوا جميعاً خالص مودتي

[m74mansour]

جزاكم الله خيرا

[amrrashed]

الف شكر ليكم يا جماعة

[kareem_Ashmawy]

أستاذ أبو سيف.....

شكرا على مجهودك
بس أنا راجعت المنازل اللى حضرتك ذكرتها على جوجل ايرث
لقيت ان فى منزل بين( منزل المرج ) و ( النفق المؤدى الى طريق الاسماعيلية فى أخر الطريق)
ياريت حضرتك توضحلنا المنزل ده بيودى على فين...

[أبوسيف]

غالبا دة منزل مدينة السلام.

[eng_elnaggar]

غالبا دة منزل مدينة السلام.

+1

[kareem_Ashmawy]

شكرا يا استالذ أبو سيف...

[د.أحمد سمير]

عفواً يا أبا سيف .. هذا المنزل هو منزل مؤسسة الزكاة في عين شمس ، وليس منزل السلام ، منزل السلام ملاصق تماماً لمخرج طريق الإسماعيلية .

[أبوسيف]

شكرا يا دكتور أحمد على التوضيح ، وآسف على الغلطة غير المقصودة. حصل عندى لخبطة لأنى مش بنزل من المنزل دة خالص علشان كدة اتلخبط انما أكيد حضرتك أدرى منى

[د.أحمد سمير]

العفو يا باشا .. أنا عارف المنزل ده بس علشان كنت باهرب منه لما طريق الاسماعيلية بيكون واقف بدل ما الف للدائري من تحت كوبري الحرفيين بقيت ادخل يمين للدائري لحد المنزل ده وبعدين ارجع للدائري في اتجاه البيت في مدينة نصر .
تقبل خالص تقديري