ممكا حد يدلنى اروح إزاى شرم الشيخ بالعربية؟

[Ahmed Sharaf]

اولا كل سنة وانتم طيبين جميعاً.
من فضلكم انا هاروح إن شاء اللة شرم الشيخ بالعربية, ودة اول مرة اسافر شرم , هل فية حد من الاخوة الافاضل ممكن يشرحلى الطريق اروح إزاى من ميدان الرماية , واية الاماكن الكويسة اللى الواحد ممكن يروحها هناك لانى رايح انا ومراتى والاولاد.
شكراً

[Islam_galal]

علي قد معلوماتي (اسكندراني) و المصراويه أكيد حايصلحوا

- من ميدان الرماية إلي الدائري
- ثم طريق السويس لنفق أحمد حمدي
- تاخد يمين لغاية شرم الشيخ (380 كم تقريبا)
حضرتك مقلتش نازل في أي فندق و في أي منطقة في شرم

[Ahmed Sharaf]

شكرا إسلام , انا عارف لغاية طريق السويس ومش عارف بعد كدة امشى ازاى , انا هنزل فى سلطان جاردينز

[ecybrarian]

انا كمان مهتم جدا بالموضوع ده...ياريت حد كمان يقول لنا برضه فين المقالب في الطريق. مثلا مفترق طرق بدون علامات. او بنزينة لازم نمون عندها علشان إللي وراها بعيده جدا. مطب بدون علامات! منحدرات وملفات حول الجبال واخيرا اللجان والرادار.. إلخ من مقالب الطرق المصرية..
وبعدين انا اعرف إن في طريق من الطور اسمه طريق سانت كاترين بيختصر الطريق إلى شرم، الكلام صح ولا اشتغاله؟؟؟

وهل الطريق (طريق السويس، نفق احمد حمدي، رأس سدر-الطور موازي للبحر، طريق سانت كاترين وسط الجبال، ثم إلى شرم) كده يبقى صح ولا غلط؟؟؟؟؟

[Islam_galal]

الطريق من النفق لشرم مفيهوش افتكاسات و لا مفارق بس بتخللي بالك عند المدن لان الطريق ضيق و ممكن متاخدش بالك و تلاقي نفسك جوه المدينة

قبل كل مدينة بحوالي 20كم تخللي بالك لأن أحيانا في رادار بالذات قبل الطور و طبعا شرم الشيخ

البنزين أفضل انك تمون من قبل دخول سيناء للأمان لكن في بنزينات حوالي 2 أو تلاتة في الطريق وفي بنزين 92 في شرم و بنزينات محترمة

بصراحة معرفش سلطان جاردينز فين بس في واحد في شرم البلد اسمه نجمة سيناء -مطعم أسماك أكله ممتاز و سعره مقبول
و طبعا ماك و بيتزا هت و وأخوانهم و خللي بالك من مطاعم الأسماك في نعمه . . . نااااااااار

[د.أحمد سمير]

الطريق اللي حضرتك ذكرته صعب ، وطريق سانت كاترين شرم الشيخ طريق جبلي حوالي 70كم فوق الجبال ..
الطريق المعتاد هو السويس ، الطور ، شرم الشيخ
تسير بمحاذاة خليج السويس ثم رأس محمد ثم خليج العقبة ..
يفضل إنك تريح في ...
عيون موسى وفيها نصب تذكاري واستراحة محترمة ، وزيارة للدوشمة الإسرائيلية وتشوف كمان عيون موسى المذكورة في القرآن الكريم ، والموقع على بعد حوالي 30 كم من مخرج نفق أحمد حمدي .

وبعدها تريح في مدينة الطور وهي عاصمة المحافظة ..

وفي الطريق إشارة صغيرة لحمام فرعون ، وهو عبارة عن كهف في الجبل يطل على خليج السويس به نبع ماء ساخن كبريتي له فوائده الصحية والكهف كله عبارة عن ساونا ربانية ..
بس لو هاتقف هناك تأكد إن في أتوبيسات سياح واقفة لأن المنطقة مش آمنة كفاية وأنا آخر مرة زرتها من حوالي 5 سنين يعني ممكن يكون الوضع اتغير دلوقتي
ورحلة سعيدة

[Ahmed Sharaf]

استاذ إسلام / دكتور أحمد
أشكركم جداً على إهتمامكم بالرد . تحياتى لكم

[محمد عز]

تاخد طريق السويس
وبعد الكمين بالظبط عند الكليو 104 هتلاقى مدخل للنفق

هتمشي فيه وهتكمل على طول ولا يمين ولا شمال لحد ما تدخل النفق
قبل النفق مباشره هتلاقى محطة بنزين وطنيه ممكن تمون منها

اول ما تخرج من النفق هتلاقى يافطة شرم الشيخ 380 كم زى ما الاخوة الافاضل ذكروا

هتمر على

راس سدر
ابو رديس
ابو زنيمه
عيون موسي
الطور
واخيرا شرم الشيخ

الطريق طوالى على طول مافيش اى مداخل
يعيبه انه طريق مفرد ( حارة رايح وحارة جاى)
ويفضل انك تسافر فى ضوء النهار

غير كده الطريق كويس

[Ahmed Sharaf]

أشكرك جداً أ/محمد واشكر كل من اهتم بالرد على موضوعى

[Islam_galal]

تروح و تيجي بالسلامة و متنساش تروح راس محمد و تركب قارب زجاجي (glass boat) و تعمل سفاري قبل الشروق

[eino666]

خلى بالك كويس جدا
وانت مسافر فى الطريق من رأس سدر الى ابو زنيمة
الطريق كله ملفات ومنحنيات وخصوصا بعد رأس سدر بحواى 40 الى 45 كيلو
عند حمام فرعون مسافة 35 كيلو منطقة منحنيات خطرة جدا
خلى بالك خلى بالك وربنا يوديك ويجيبك بالسلامة إن شاء الله

[the_first_knight]

أنا كنت هناك السنة اللي فاتت في شهر فبراير
أنا كنت مسافر بالعربية
بص يا سيدي : أنا أخدت كوبري السلام .. وبعد الكوبري يمين على طول لغاية شرم ( بس في تداخل شوية في مداخل المدن )
ويستحسن تسافر على طول بعد صلاة الفجر مباشرة
وخللي بالك في منطقة المنحنيات الشديدة يستحسن تكون هادي شوية
وأي استفسار ... تحت أمرك
ربنا معاك

[Ahmed Sharaf]

خلى بالك كويس جدا
وانت مسافر فى الطريق من رأس سدر الى ابو زنيمة
الطريق كله ملفات ومنحنيات وخصوصا بعد رأس سدر بحواى 40 الى 45 كيلو
عند حمام فرعون مسافة 35 كيلو منطقة منحنيات خطرة جدا
خلى بالك خلى بالك وربنا يوديك ويجيبك بالسلامة إن شاء الله

اشكرك جدا على اهتمامك ودعواتك , فعلا الواحد بيحس انة بيكلم اخواتة.

[Ahmed Sharaf]

أنا كنت هناك السنة اللي فاتت في شهر فبراير
أنا كنت مسافر بالعربية
بص يا سيدي : أنا أخدت كوبري السلام .. وبعد الكوبري يمين على طول لغاية شرم ( بس في تداخل شوية في مداخل المدن )
ويستحسن تسافر على طول بعد صلاة الفجر مباشرة
وخللي بالك في منطقة المنحنيات الشديدة يستحسن تكون هادي شوية
وأي استفسار ... تحت أمرك
ربنا معاك

أشكرك جدأ على إهتمامك , ويشرفنى اتعرف بيك , على فكرة انا من القاهرة لكن شغلى هنا فى المنصورة

[mxz911]

طب يا جماعه ممكن حد يكلمنا عن شرم الشيخ نفسها ؟

يعنى لو واحد حب يسافر بالعربيه مع صحابه شباب مثلا .. ينزل فين وكده


والاسعار ايه؟

وطبعا لو الواحد نازل مع شباب مش هيهمه أوى مكان الاقامه فاهمنى .. يعنى مش لازم حاجه غاليه .. اى حاجه والسلام :d

وبرضه لو الواحد نازل مع الاهل ينزل فين .. ويكون مكان كويس وياريت رينج الاسعار مثلا لو الواحد هينزل هناك 5 ايام

وشكرا