الطريق من القاهره الى الزقازيق

[Dr_Smart]

لو سمحتو يا جماعه عايز اعرف ضروري الطريق من القاهره ( مصر الجديده او جسر السويس ) للزقازيق واخبار الطريق ايه يعني ممكن اروح بالعربيه ولا اشتري نفسي واروح مواصلات ؟ واخبار الطريق بكره هيكون زحمه اوفر ولا ايه عشان اجازة شم النسيم ؟

وشكرااااااا جزيلا

[drahmd]

بص ياباشا هتطلع اسماعيليه صحراوي هتدخل مدينة العبور الطريق الرئيسي بتاعها هتمشيها لحد آخرها هتلاقي كارته هتدفع اتنين جنيه وهتدخل اجباري يمين وتفضل ماشي علطول لحد ماتلاقي كارته تانيه هتعديها وهتمشي شويه هتلاقي صينيه وفيه دخله يمين ماتاخدش الدخله اليمين ابدا لف كمل طوالي في الصينيه بعدين هتمشي شويه هتلاقي صينيه برضو هتفضل مكمل ف طريقك علطول ماتلفش فيها وهتمسك الطريق ده طوالي لحد ماتلاقي كوبري هتطلعه وتكمل بعد الكوبري خلي بالك خليك ماسك يمين عشان الطريق الشمال مدغدغ لحد ماتلاقي مزلقان هتعديه وتفضل مكمل علطول هو ده مزلقان الزقازيق ياسيدي وخلي بالك لأن السواقه في الشرقيه حمّاري وخلي بالك من المقطورات ماتفتحش لان الطريق بعد الكوبري وحش وخلي بالك من المطبات من اول ماتعدي الصينيه التانيه خليك ماشي هادي عشان مليان مطبات وتوصل بالسلامه بس ابقى قولي قضيت شم النسيم فين ف الزقازيق ولو في اي استفسار انا تحت امرك

[mahmoud_magdy]

في طريق تاني
انا اعرف اولو بس لكن ممشيتش فيه قبل كدا
1 - هتمشي لحد اسماعيليه الصحراوي وتاخد او يوتيرن وتلف وترجع وتاخد طريق يمين مكتوب عليه الزقازيق ومعرفش الباقي بصراحه
2 - في حالة لو عاوز تاخد مواصلات يبقى هتروح لحد موقف العاشر وممكن تركب من جسر السويس لحد موقف العاشر ومن هناك تسأل على عربيات الزقازيق وتركب من هناك
شكرا

[drahmd]

في طريق تاني
انا اعرف اولو بس لكن ممشيتش فيه قبل كدا
1 - هتمشي لحد اسماعيليه الصحراوي وتاخد او يوتيرن وتلف وترجع وتاخد طريق يمين مكتوب عليه الزقازيق ومعرفش الباقي بصراحه
شكرا

ده طريق الهايكستب من مدينة السلام ونصيحه بلاش منه عشان هيبقى زحمه وفيه كمين في السلام رخم ورادارات وممكن يفتشو العربيه حصلت معايا مره قبل كده ومن ساعتها مابمشيش فيه خليك في العبور اسهل واسلك واقصر كمان.

[Dr_Smart]

الف شكر للردود يا جماعه

طيب يا دكتور تفتكر الطريق ده كويس بالنهار بكره ولا هيكون زحمه ؟ والطريق مسافة كام كيلو تقريبا من العبور ؟

وايه اخبار اماكن الخروج في الزقازيق بقى ؟ يعني مطاعم وكافيهات وكده ؟

وربنا يكرمك يا باشا والف شكر

[drahmd]

لا ياعم هيبقى رايق هيبقى حلو ان شاء الله الزقازيق من مخرج العبور حوالي 40 او 45 كيلو.

أماكن خروج في الزقازيق بص الزقازيق بصفه عامه كمدينه مش حلوه ابدا بس عايز مطاعم في مؤمن هناك في فلل الجامعه وفي كنتاكي ع البحر بس صراحه عايز مطعم حلو روح اورينتال ده في امتداد شارع القوميه الرئيسي بعد ميدان القوميه وفيه كمان مطعم هوت برجر في فلل الجامعه المطعم ده خطير بس دخلته هتتوهك شويه عموما المطاعم والكافيهات كلها في شارعين هم طلبه عويضه والقوميه وامتداده بص طلبه عويضه مفيهوش اكتر من الكافيهات فيه كافيه اسمو اليكس لما تنزل من مسجد الفتح على شارع طلبه عويضه هتلاقيه على شمالك ده جامد وقعدتو حلوه اوي وفي واحد تاني اسمو كازابلانكا ده فيه بلياردو وبلاي ستيشن وفيه مطعم وقعده حلوه كازابلانكا ده هتلاقيه جنب اورينتال علطول بصراحه أنا لاأحبذ انك تقضي شم النسيم في الزقازيق اطلع اسكندريه احسن بس ان كان ولا بد فأنا قلت لك أحسن كافيهات في الزقازيق ولو عايز اي استفسار عن اي حاجه قول انت جيت ف منطقتي

[drahmd]

نصيحه عشان ماتتضايقش ماتقعدش في كافيه المواردي ولا ليالي الحلميه ولا جار القمر بتاتا عايز تجرب جرب بس على مسؤوليتك بقى بالذات بالذات لو معاك حد من الجنس اللطيف يعني دي نصيحه مجرد نصيحه يعني

[Dr_Smart]

والله يا دكتور مش عارف اقولك ايه الف الف شكر والله انت اخر جدعنه

[medosaat]

تحياتى

انا سجلت مخصوص فالموقع عشان اشكر كل الى شارك فالموضوع بجد استفدت كتير واخص بالشكر
</B>drahmd على معلوماته القيمه وفعلا الطريق زى ما وصفه من العبور انا كنت هناك امبارح ومشيت على وصفته مفيش تعديلات جوهريه فالطريق وبيكون مكسر فعلا بعد الكوبرى وزحمه من بعد الساعه 4 عصرا وسواقتهم وحشه زى ما قال خصوصا النقل والنص نقل وبالنسبه للكافيهات انا رحت طريق الكورتيش من اوله هناك فيه شارع موازى ليه اسمه شارع مدير الامن ( عشان مدير الامن ساكن فيه ) هو شارع راقى الى حد ما وفيه كافيه ومطعم جامد اسمه صلاح الدين على الكورنيش مباشره اسعاره حلوه وقعدته حلوه محترمه وكلها كابلز الحمد لله قضيت يوم حلو بس الزقازيق بصفه عامه مش مكان روش وزحمه جدا بالنهار تحياتى للجميع ربنا يجزيكم كل الخير دنيا واخره ويفتح عليكم ومن اوسع ابوابه