ازاى اروح من المنصورة لمدينة نصر

[dr_baby]

عايزة اروح من المنصورة لمدينة نصر؟ازاى بدون سيارة معى
يعنى اركب مواصلات ايه
وياريت كمان اروح لمدينة نصر من الجيزة أو المعادى ازاى برده دا على أساس انى عايزة اشترى حاجات من أى فرع كارفور وانا اعرف ان فيه فرع بالمعادى وبالجيزة بس مشوارى أساسا فى مدينة نصر وانا من المنصورة
اروح من المنصورة للمعادى اقرب ولا الجيزة وبعدين اوصل لمدينة نصر بعد كدا ازاى؟
يارب يكون حد فهم حاجة منى ويقدر يساعدنى

[lordnykon]

من المنصورة لمصر طبعا ميكروباص هينزل فى مكانين 1-رمسيس(ده أفضل) 2-موقف عبود .
المهم من رمسيس حضرتك هتركبى سرفيس بيقول (رابعة-أول عباس-أول مكرم) حسب ما حضرتك رايحة هتقوليله هتنزلى فين .
علشان تروحى الجيزة افضل حاجة تركبى الى رمسيس و من هناك تركبى مترو خط الجيزة .
لكن كارفور اللى فى الجيزة ده على مصر-اسكندرية الصحراوى(قبل البوابة علطول) متهيألى صعب يتراح ليه مواصلات.
هو الموضوع مش ايه الأفضل تروحى الجيزة أو المعادى الأول و بعدين مدينة نصر ولا لأ .....هو كارفور واحد على دائرى المعادى و التانى على الصحراوى الصعوبة فى المواصلات.
أكيد فيه حد هيفيد حضرتك أكتر منى.

[هيثم]

شوفى حضرتك انتى غالبا هتدخلى القاهرة من اسكندرية الزراعى يعنى على موقف عبود قبل الموقف ف محطة اسمها الموسسة هتطلبى من السواق انك تنزلى الموسسة ( ف حالة الميكروباص البيجو السوبر جيت لو هتركبى قطر هتنزلى ف رمسيس على طول ) لما تنزلى الموسسة هتلاقى نفق ارضى هتعديه للناحية التانية عشان توصلى محطة المترو و لما نوصل المترو هنقطع تذكرة ( بجنيه او جنيه الا ربع انا مش فاكر) هتركبى تقريبا 5 او 6 محطات وهتنزلى رمسيس ( محطة حسنى مبارك بلغة المترو و كل عربية مترو فيها خريطة للخط موضح عليها اسكاء المحطات وترتيبها ) المهم بعد ما نوصل رمسيس هتطلعى من المخرج بتاع مسجد الفتح (الجامع الكبير اللى ف ميدان رمسيس ) طب هتوقليلى اعرف المخرج ازاى ( قبل سلم كل مخرج هتلاقى لوحة متعلقة على الحيط بتقولك المخرج ده هيطلعك فين بالضبط) طلعنا وادينا ضهرنا للمسجد هتلاقى ميكروباصات و اتوبيسات كتير هتركبى اى حاجة رايحه مدينة نصر على حسب المكان اللى انتى رايحها بالظبط .

بالنسبة لكارفور انا طبعا مش عارف ليه كارفور بالتحديد ...... بمعنى ايه ....... مدينة نصر مثلا فيها هايبر ماركت زى كارفور بالظبط و فيه تخفيضات بردو اسمه سبينس ( الموجود بسيتى ستارز ) وده هيكون اقرب و احسن وممكن تركبيله من امام مسجد الفتح اللى ف رمسيس هتر كبى ميكروباص ( اول مكرم او اول فخرى ) ولما تنزلى هتساءلى اى بنت واقفة على المحطة سيتى ستارز منين هتشاورلك عليه هتمشى حوالى 6 دقايق لما توصلى( طبعا هتخشى من بوابة المول عشان فيه بوابات للفنادق) هتركبى السلم نزولا للدور تحت الارضى هتلاقى سبينس قدامك ..... جميل كده طب لو ما لقيتش مكرم او فخرى يبقى هتركبى اول عباس ومن مكان نزولك هتركبى اول مكرم او فخرى.


طب حنفترض ان حضرتك مش عجبك الكلام ده كله ومصرة تروحى كارفور ....... اوكيه مفيش مشكلة بس هنتعب شويه ..... الحاج كارفور له 4 فروع واحد ف اول طريق مصر اسكندرية الصحراوى وبعيد جدا ...... والتانى ف مدينة العبور و ده بردو مقرف ف المواصلات والتالت تحت الانشاء ف بداية طريق القاهرة السويس والرابع اللى عليه الكلام ف المعادى على الدايرى وده هنروحه كالاتى....................... بردو من قدام مسجد الفتح هنركب ميكروباص موقف العاشر من رمضان ( وخدى بالك عشان فيه ف نفس المكان الحى العاشر مدينة نصر وده لو ركبتيه هتروحى حته تانيه خالص) لما نوصل موقف العاشر هنلاقى كوبرى حديد هنعديه للناحية التانيه ونركب ميكروباص حلوان ونقول للسواق كارفور هننزل على الطريق هتلاقى كارفور قدامك هتعدى الناحية التانية ( بس خدى بالك عشان العربيات بتبقى جايه طايرة ) بعد ما تخلصى هتقفى على الدايرى ف عكس اتجاه الذهاب وانتى ورزقك مع الميكروباصات ولما توصلى موقف العاشر من رمضان هتلاقى هناك عربيات لرمسيس او رابعه او مكرم عباس فخرى واما تخلصى ف مدينة نصر هتركبى ميكروباص رمسيس من عكس اتجاه الذهاب ولما توصلى رمسيس هتركبى المترو ( اتجاه شبرا ) وهتنزلى محطة كلية الزراعة وبعدين ميكروباص او تاكسى لعبود.

طب لو افترضن انك هتدخلى القاهرة من موقف العاشر من رمضان ( السلام ) يبقى الموضوع سسسسسسسسسسسسسسهل عندك ميكروباصات حلوان لكارفور وعندك ميكروباصات رمسيس وعندك لمدينة نصر رابعة عباس مكرم فخرى


بالسلامه ان شاء الله