الى فايد

[جمال]

مسافر من الاسكندرية الى فايد
ماهو احسن طريق عن طريق القاهرة ام الطريق الساحلى وخلى بالكم انا بقول احسن مش اقصر
وياريت حد يوصف لى الطريق من الاسماعيلية الى فايد ( نادى القوات المسلحة ) بالتفصيل علشان مش عايز اتوه او الف بدون لازمة ودى اول مرة اروح فايد
وشكرا مقدما

[جمال]

ايه يا جماعة هتسوبونى اتوه ولا ايه ؟؟؟

[هيثم]

توصل بالسلامه ان شاء الله
الحقيقه انا معرفش الطريق الساحلى من اسكندريه الى بورسعيد كام كيلو
بس من بورسعيد الى اسماعيليه حوالى 80 ك فضلا عن احتمال التاخير عشان حضرتك هتخرج من الجمرك فى بورسعيد و العربيه هتتفتش من قبل رجال الجمارك ( ممكن القصه ديه تاخد وقت وممكن لا ) ومن اسماعيليه الى فايد 25ك تقريبا.

اعتقد ان حضرتك لو مشيت القاهره صحراوى او زراعى و مع الاشارات للدائرى و منه الى طريق القاهره اسماعيليه وبعد العاشر من رمضان ب 20ك تقريبا حضرتك هتدخل يمين (وصله ابو سلطان ) وفى قبل مدخل الوصله ب 1ك تقريبا بوابات و اكيد فى علامات ارشاديه قبل الوصله . تقريبا حضرتك هتمشى فى وصله ابو سلطان 20ك و فى اخرها هتلاقى طريق متقاطع مع الوصله ( طريق الاسماعيليه السويس الصحراوى ...... لان فى طريق تانى موازى للقناه مباشره ) اليمين اجبارى حضرتك هتدخل يمين فى نهايه الوصله و هتمشى حوالى 10ك هتلاقى سور قاعده فايد الجويه بدا يظهر على يمينك ومع نهايه السور هتلاقى نفسك فى فايد . بعد نهايه السور ب 3 ك تقريبا هتلاقى زى صينيه صغيره هتبص شمالك هتلاقى طريق متقاطع عموديا على الطريق اللى حضرتك ماشى فيه هتلف و تدخل الشارع ده و فى نهايه الشلرع هتلاقى البحيره فى وشك هتدخل يمين وبعد 2 ك تقربيا هتلاقى نادى اداره النوادى ق م وفى مجموعه نوادى غيره خاصه بالجيش بردو ممكن تسال اى حد او تبص على اليفط اللى قدام كل نادى والشارع ده و اللى قبله تقريبا هما الشوارع الرئيسيه فى فايد ( مطاعم كافيهات الخ ) و لو حضرتك حبيت تروح اسماعيليه هترجع من نفس الطريق بس هتكمل على طول ومش هتدخل وصله ابو سلطان ومن اسماعليه لفايد سهله جدا بس معتقدش انى هقدر اوصف الشوارع جوا الاسماعليه مضبوط ( عليك وعلى رجال المرور)

بالسلامه ان شاء الله

[جمال]

شكرا لردك
انا رحت بالطريق الساحلى الدولى و رجعت من الطريق اللى حضرتك وصفته
وفى اول فرصة سأصف حالة الطريق ان شاء الله