ماهي الشوارع الممنوعة علي النقل؟

[Some_One99]

بافكر جديا في شراء دودج رام وباعمل دراسة للمزايا والعيوب وحتي الان الموضوع معقول

المعلومة اللي ناقصاني ايه الشوارع الممنوع فيها سير النقل؟ انا مثلا اعرف كوبري اكتوبر والمحور ...فيه ايه تاني جامعة الدول مثلا مسموح ولا لأ ...شارع النصر ...كورنيش النيل وهل ممنوع من قبل 8 ل 8 مثلا ولا ايه ؟


وشكرا

[Ahmed Nouh]

اعتقد جوا القاهره كله ممنوع بالنهار , بس اللى متأكد منه صلاح سالم كمان كله ممنوع

والغرامه الفورى 50 جنيه لو اتمسكت

[FunnyMickey]

شوف ياباشا
بحكم شغلنا
واننا عندنا عربيه نقل سوزوكي
فاقدر اقولك ان مصر كلها ممنوعه للنقل
ماعدا الشوارع الجانبيه
والفضاء الخارجي

ممكن في اي حته في اي وقت طاللما طلبت مع الظابط او الامين او العسكري او الطابيه او الحصان
يوقفك
بيوقفك
والحجه
سير في الممنوع
عالدائري ممنوع
في رمسيس ممنوع
وسط البلد ممنوع
طريق مصر اسكندريه ممنوع
لدرجه ان فيه مره كنا رايحين امبابه
ونازلين نفق كده في شارع التحرير بيودي علي امبابه
والعسكري وقف السواق
بيقوله ممنوع
راح السواق نازله من العربيه
وقاللو
يعني اروح منين
العربيه مبتعرفش تعوم
حنزل النيل عشان اعدي الناحيه التانيه
حعدي ازاي
قاللو معرفش هوا ممنوع وخلاص
يهديك يرضيك
مفيش ابدا
ومعداهوش
وخلانا نلف تاني ونرجع
ورحنا بعد الساعه 9
يلا حسبي الله ونعم الوكيل

[Some_One99]

الدائري ممنوع؟!!! مش هوه ده اللي عاملينه عشان النقل يمشي منه بره القاهرة

[FunnyMickey]

لا ياباشا

ليك مواعيد فيه
من الاخر كده بعد الساعه 10 لحد الساعه 8 الصبح اعمل اللي انتا عاوزه
ولو ظابط رخم بردو حيقولك ممنوع

[Ahmed Galal]

طاب أنا باشوف النص نقل و النقل فى الحتت ديه على طول (جسر السويس-النزهة-جوزيف تيتو-موقف العاشر-المطرية-الحلمية)

[FunnyMickey]

ماشي زي الفل
بس بجد الناس دي طول النهار بتدفع في رشاوي عشان تعدي

والله انا مره كنت واخد بضاعه من مدينه نصر لرمسيس
اتنين وقفوني
واحد في الحي السابع
وواحد في ميدان رمسيس

العسكري الاولاني
قلتله تعالي عاوز ايه
امسك وهات الرخص
ورحت مديله 20 جنيه

بتاع ميدان رمسيس بقي امين شرطه
قلت حطلعله ال20 جنيه
يرسم عليا دور الشريف

المهم بقوله يافندم مالعربيات معديه اهي
قاللي وانا بقي حقعد اوقف كل العربيات ولا ايه

هات الرخص وبتاع
المهم قلتله ياعم ده احنا جيرانك هنا في ابو الجوخ وبتاع
قاللي طيب ياعم عشان خاطرك بس

واحنا واقفين في الشمس والدنيا حر
ومجبتلناش حتي بيبسي ولا شاي

قلت في سري اه ياابن التيييييييييت
وخد 20 تانيه
اما الواحد اتخنق

وحاجات كتير من دي بقي

[Mzeid]

طيب أنا لو معايا دودج رام أعمل ايه ؟

[أحمد كمال]

طيب أنا لو معايا دودج رام أعمل ايه ؟

هتمشي ترش

مفيش مشي على كوبري اكتوبر و لا المحور و لا المعادي و لا الزمالك .

[3ateef]

انا اول مرة اعرف حكاية ان النقل ممنوع فى البلد...
انا كنت فاكر النقل اللى هى العربيات النقل والمقطورة والحاجات المبالغ فى حجمها ده...

مشكورين على الافادة...

[FunnyMickey]

طب معلش يعني
مانا بششوف ناس مرخصاها اتوبيس خاص
متعملها كده وخلاص
هيا دي عربيه نقل
متعتبرش عربيه نقل طبعا

[HeMa_LanCeR]

طيب ممكن اعرف بس الدودج دي حمولتها قد ايه وانا اقولك مواعيدك بالظيط

[mramzy]

ياسيدى الفاضل خلاص النقل مابقاش ممنوع بعد الحكم اللى خادوا من 3 شهور بنقض قرار محافظ القاهره بعدم سير النقل
وحكموا بعدم دستوريته وعلشان كده بتشوف النقل والنقل بمقطورة فى طريف النصر ورابعه وفى كل مكان
والدودج رام بتعامل نقل بس فى السرعات زى الاتوبيس الخاص

[3ateef]

شكرا على التوضيح يا استاذ رمزى..

[FunnyMickey]

ياسيدى الفاضل خلاص النقل مابقاش ممنوع بعد الحكم اللى خادوا من 3 شهور بنقض قرار محافظ القاهره بعدم سير النقل
وحكموا بعدم دستوريته وعلشان كده بتشوف النقل والنقل بمقطورة فى طريف النصر ورابعه وفى كل مكان
والدودج رام بتعامل نقل بس فى السرعات زى الاتوبيس الخاص

يااستاذ رمزي باشا
الكلام ده في القانون وبس
علي الورق
امال احنا طالع عينيننا ليه
ويبقي راجل بقي سواق اللي يقوله القانون مش عارف ايه
ياباشا دي بتبقي ناس علي الله كلها
ومش حمل ظابط شرطه يحبسه ولا يبيته ليله في الحجز

ابتسم ياباشا انت في مصر