إعـــــــلان

Collapse

.

,
See more
See less

الرشاوى المطلوبة لتجديد الرخصة المضروبة

Collapse
X
 
  • Filter
  • الوقت
  • Show
Clear All
new posts

  • الرشاوى المطلوبة لتجديد الرخصة المضروبة

    ترددت كتير قبل ماكتب الموضوع, لأن تقريبا كلنا عشناه و عارفينه كويس, بس فى الاخر حبيت اكتبه لغرض واحد فقط, انى افضفض باللى جوايا عشان ارتاح, انا كنت شارى عربيتى من سنه و نص كدة و الرخصة كانت لسه فاضل فيها سنه و كام شهر كده, طبعا مشيت بيها كده لحد ما قربت تخلص, و أبتديت رحلة العذاب, العربية كان فيها موتور جديد, بأسمى و الحمد لله, بس كان معايا توكيل, قبل الرخصة متخلص بيومين رحت الشهر العقارى
    1- علشان اعمل عقد بيع مسجل و علشان الساعة كانت 4 , و مكانش ينفع اخد اجازة , و الرخصة خلاص حتخلص و يدخلونى فى قصة شهادة بيانات, طلب منى الموظف 125 جنيه زيادة علشان يخلص, يا إما فوت علينا بكرة, بعد الفصال فى الرشوة الاولى دفعت 320 و المفروض كانوا 225, يعنى 95, وعامل الامن 10 جنيه علشان دخلنى من الباب, يعنى 105, و حنجمع المبلغ كلة فى الاخر

    انا كنت مضطر اتعامل مع 3 وحدات مرور (المرور اللى تابع للبطاقة اللى حرخص فيه, و المرور اللى فى الرخصة, و مرور الدراسة عشان ورق الموتور)

    نيجى بقى للخطوه التالية
    2- رحت المرور اللى العربية تبعاة اسأل عن ورق الموتور, واطلب يحولوة للمرور اللى انا تبعه,وعلشان مدفعتش فى الاول بعاتنى اسأل فى الدراسة على الورق
    طبعا رحت الدراسة, ولما سالت قالى هات رقم الصادر, مع انى اساسا رايح اخد منه رقم الصادر, أضطريت اطلع اول 10 جنيه علشان يفتح الدفتر و يدور, طبعا من غيرها مكنتش حوصل لأى حاجة خالص مالص, المهم ادانى رقم الصادر و قالى ورقك فى مرور الوايلى, ده اللى الرخصة تبعه, طب انا جيت ليه هنا ! مش عارف الصراحة

    3-رجعت تانى مرور الوايلع علشان اشوف الحكاية, شاف الورق وبعدين قالى استنى شوية كده على جمب, أخدت بالى انه بيخلص بس للى بيدفع, طبعا دفعت ال 10 التانية و لقيت الدنيا مشيت و الورق طلع و قالى انت عاوز تبعته فين, قلتلة المقطم, عملى الطلب بعد ما صورتلة الورق و اللذى منه وق الى يومين تلاتة و حتلاقيه هناك( دى نكته كبيرة على فكرة, كان قصده شهرين تلاتة , ده لو انا متصرفتش)
    المهم قلت بالمرة بقى اخلص شهادة المخالفات, كنت لاقى نفسى ساعتها, لو حد فيكم راح مرور الوايلى حيبقى عارف الغرفة المجاورة للنيابة, اللى بيطلعوا منها شهادة المخالفات عاملة ازاى, صعب جدا او مستحيل تدخل او تخرج منها غير بطلوع الروح, فى اليوم ده من شدة الزحام واحد اتسرق منه 9000 جنيه, راجل كبير للأسف الحرامى مش بيرحم ظروف حد , المهم بأعجوبة اديت الرخصة للموظف اللى على الشباك و قالى بالنص ساعه ساعتين, انت و حظك, طبعا مرت الساعات و انا اعد برة و اليوم ده كان سبت و حر جدا, وشوية و ابتدوا يسلموا الشهادات, انى اعرف ادخل حتى علشان اسمع اسمى, ابدا, المهم اديت عسكرى بتاع وكيل النيابة 5 علشان يشوف الرخصة راحت فين, فا قالى انها عليها مخالفة و راحت الخزنة و حيندهوا عليا فى الاخر, لما ندهوا عليا لقيت المبلغ 31 جنيه و مفيش احكام, مش عارف بجد يعنى ايه, المهم دفعت 35 و قالى استنى بقى فالشمس بره لحد مننده اسمك
    بعد نص ساعة شوى فى الشمس الشهادة طلعت و سلموهالى و مشيت و انا كلى امل انى مرجعش المرور ده تانى و أخلص كل حاجة فى مرور المقطم حبيبى الرايق الفاضى( الجملة دى تحتوى على العديد من الاحلام و الاوهام و الخيالات و التراهات)

    ...
    حشتغل شوية و حكملكم الحكاية

  • #2
    اهم حاجة انك تفضفض عشان ترتاح لان دى مهازل كلنا عارفينها..... حسبنا الله و نعم الوكيل

    Comment


    • #3
      معلش العنوان مش مفهوم بعد ما قريت القصة ,

      الرشاوى المطلوبة ===== مفهومة :(
      لتجديد الرخصة المضروبة=== مش مفهومة , هي الرخصة سليمة ولا مش سليمة .....
      [color=blue]
      مع تحياتي ,,
      [size=+2] [font=DecoType Thuluth] أكــــرم [/font] [/size][/color]

      Comment


      • #4
        انا كنت زيك كده ...باتبهدل وتطلع عنييه و عنين اللي جابوني ..لحد ما جه يوم جميل و نسيبي عرفني على واحد "مخلصاتي"
        بيقبض 50 جنيه و هو اللي بيتبهدل بدلاعنك
        لسه عاملي ترخيص العربية الجديده و رخصة القيادة الخاصة
        مجرد اني رحت المرور على الإمضاء و الإستلام
        [CENTER]قال تعالى " [FONT=&quot] وَاتَّقُوا يَوْماً تُرْجَعُونَ فِيهِ إِلَى اللَّهِ ثُمَّ تُوَفَّى كُلُّ نَفْسٍ مَا كَسَبَتْ وَهُمْ لا يُظْلَمُونَ [/FONT]" 281 البقرة
        [/CENTER]

        Comment


        • #5
          اطالب بتقنين الرشاوى
          مصر هتفضل غالية عليا
          -------------------------------
          الديك الحلبي هايفضل يدن لغاية ما يتدبح

          Comment


          • #6
            انا متشوقة اعرف الباقى ها وبعدين
            [SIGPIC][/SIGPIC]

            Comment


            • #7
              المواضيع دي مش جديدة ......... ربنا يرحمنا و يصبرنا

              بس بصراحة أسم الموضوع جامددددددددددد

              Comment


              • #8
                التقيل جاى فى السكة يا شباب , و بعدين الرخصة مش مضروبة بمعنى انها مزورة , مجرد قافية, بس وانا بفحص لقيت ديجيت فى رقم الشاسية مكتوب غلط (2 بدل 1) و طبعا التفاصيل جايه فى باقى الحكاية, ويا أستاذ محمد باشا الشامى انا دورت على المخلصاتى ده , بس بجد مفيش, و ظروف ورق الموتور و البيانات اللى غلط فى الرخصة مكانتش تسمح غير انى انا اللى اخلصها
                المهم بقى نيجى للى حصل
                4- رحت بعد 3 ايام المرور اسأل على ورق الموتور, مفيش طبعا ورق موتور, قالى انه بيقابل المندوب فى مرور الدراسة صدفة( ورب صدفة خير من الف ميعاد) المهم اديتة ال10 جنية علشان يحاول يتصرف ويجيب الورق, على وعد انه لو جابه ليه الحلاوة تانى
                5-بعد اسبوع رحت تانى اسأل وقالى انه قابل مندوب الوايلى بس للأسف المندوب مجابش الورق معاة( يا حلاوة على اليومين تلاتة) قلتلة طب انا رخصتى خلصانة و شهر السماح قرب يخلص شوفلى اى حل, اخدك و نروح الوايلى نجيب الورق, قالى انا حبعت معاك عسكرى بس بشرط تودية بعد كده الدراسة يجيب ورق من هناك و تجيبة تانى, قلتلة ماشى, بعد حوالى نص كده كنا فى الطريق , وطبعا مرديتش ادى العسكرى حاجة غير لما جاب الورق و استحق عن جدارة ال 10 جني الخامسة, وفطرنا و شرنا الشاى و رحنا الدراسة جبنا الورق و طلع عينى و رجعت المقطم تانى فرحان بالورق
                افطر بقى و اكمل شغل و احكيلكم باقى اللى حصل

                Comment


                • #9
                  6- طلعت للمندوب اللى عنده الورق بعد مركنت العربية, طبعا كان مستنى حق الخدمة الجليلة اللى عاملها فأديتة ال10 تانى, و بعت معايا العسكرى للموظف علشان يديله الورق على شرط انى اققوم بالواجب مع الموظف هو كمان,
                  7-الموظف خد ال 10 هو كمان و قالى هات طلب الفحص والدوسية و تعالى, فعلا اشتريت كل الورق و رجعتلة ختملى ان الافراج موجود على ضهر الفحص و قالى انزل افحص عند المهندس
                  8- دخلت العربية الجراج و أخد العامل 5 جنيه تمن الدخول (المفروض 2 ) و أديت العامل بتاع البصمة برده 5 جنيه علشان يسأل فيا, مع انه مكانش بيعمل حاجة خالص (مرور المقطم فعلا فاضى و جميل)
                  9- دخلت على المهندس بالفحص و البصمة فأكتشف ان أخر رقم فى أرقام الشاسية 2 بدل 1 (يا ليلة سودة) مش عارف بقى الحل ايه, كتب على ضهر الفحص خطاب لمهندس مرور الوايلى انه يتأكد من الرقم و قالى اطلع اختم من رئيس الوحدة ( نقيب محترم جدا على فكرة) و أطلع على المهندس اللى فى الوايلى و هات معاك كمان شهادة بيانات, ختمت و رحت للمهندس قالى هات فحص قديم من الملف, رحت مدى 5 جنيه للموظف علشان يطلع الملف, وأخد البطاقة رهن وادنى الفحص القديم, رحت للمهندس كتبلى الرقم المظبوط و ختملى و قالى اختم من البيه رئيس الوحدة, ختملى هو كمان
                  10- رحت بقى اطلع شهادة البيانات, موال كبير قوى على فكرة, طلب و تصوير كل الورق و التوكيلات و اققف طابور طويل و استنى
                  ثم أدفع ال10 جنية للموظف, واستنى لما الملف يجى, طبعا مش حيجى غير لما اروح للعسكرى و اديله ال 5 جنيه علشان يدور و يطلع الملف, و ارجع تانى , و يبعتنى الخزنة ادفع الضريبة ب سنة و ارجعله تانى علشان يخلى المدة 3 سنين و ارجعلة تانى استنى يكتب البيانات و اكتشف فى الاخر المفاجأة, كتبلى الرقم غلط تانى (ده مصمم بقى) كنت حعيط, بس انا بطلت عياط من زمااااااان, خليته يصلح الرقم وقلتلة يختم عليه مرضيش, قولت فى سرى على الله يرجعونى هناك, و قالى ارجع الشباك اللى ورا بقى علشان استلم, كله بالطابور, طابور زنب محترم, تقريبا بيخلونا نكفر عن سيئاتنا, الحمد لله اخدت الشهادة و رجعت للمرور بتاعى تانى
                  حكملكم فى اققرب وقت...

                  Comment


                  • #10
                    اسم الموضوع يصلح لان يكون اسم كتاب تاريخى

                    Comment


                    • #11
                      المشاركة الأصلية كتبت بواسطة human12 مشاهدة المشاركة
                      اطالب بتقنين الرشاوى

                      Comment


                      • #12
                        طالما انت عمال تدفع , كنت شوف حد مخلصاتى زى Mshamy ما قال ومش شرط يكون شخص عادى , ممكن يكون ظابط و خليه يروح معاك و ادفع مره واحده بدل ما انت ممشيها بالقسط .

                        انا عارف ان كان عندك مشكله ملخبطه بس كل حاجه فى اى مرور بتخلص كده , رشوه او واسطه + رشوه .

                        بس انا شفت اكتر من مرور , زى مرور فيصل الحبيب مشفتش , اول ما تدخل جوه تحس ان الدنيا غيمت وهتمطر , كنت عايز اصور وافضحهم .
                        [CENTER]
                        [FONT=times new roman (arabic)][SIZE=4][COLOR=#800080] " بسم الله , الحمد لله , سبحان الذى سخر لنا هذا وما كنا له مقرنين وإنا الى ربنا لمنقلبون "
                        [/COLOR][/SIZE][/FONT][/CENTER]

                        Comment


                        • #13
                          للأسف يا باشا معرفش حد من النوع المخلصاتى , او يمكن فى حالتى مكانش ينفع حد يلف اللفة دى كلها, بس عموما انا كنت مستعد ادفع اى فلوس قصاد انى اخلص, ولعلمك ده مش بمزاجى او مزاج حد, لو مدفعتش بجد مش حتخلص حاجة, المهم قربنا نخلص اهوه, نيجى بقى لما رجعت للمهندس
                          11- خلصت يا باشا كل حاجة, وادى الورق و ادى 20 جنيه كمان علشان نخلص بقى, بص فى الورق و قالى تمام, بس انت معاك طفاية, قولتلة معايا, قالى طب و المثلث, مرديتش اكذب و قلتلة معييش و قمت مطلع كمان 10 جنبة, راح الراجل ختملى و مضالى و قالى فك النمر و اطلع بقى سلم,
                          12 - سلمت النمر و اشتريت النمر الجديدة وسلمت الورق للمراجع و فوقيه 10 جنيه لما قالى فيه ختم ناقص , فا طبعا ال10 جنيه تغنى عن الختم , بس فقالى روح اققعد فى الاستراحة
                          13- الرخصة جت و معاها البطاقة و إذن صرف اللوحات الجديدة و المفاجئة بقى (رقم الشاسية غلط تانى), اظاهر انى منحوس, او هما بهايم (سوررى للبهايم), قلت للعسكرى قام فاكك التغليف و شال الرقم بالموس مش عارف ازاى و رجعها تانى و خد 5 جنيه بس
                          14- رحت بإذن استلام النمر للمندوب و سلمتهولة و نزلت استنى العسكرى يجيب النمر, و لأنه كان واخد قبل كده, مديتوش حاجة
                          15- الراجل اللى بيركب النمر بديله 5 جنيه قالى متنفعش با بيه, هات 5 كمان, و لما سألته هى دى اكرامية و لا دى حاجة مجبور عليها, قالى لا طبعا مش مجبور ولا حاجة و خلى عنك خالص, بس هات ال 10 جنيه, اديتله طبعا, هى حتيجى عليه
                          بس و خدت العربية و روحت نمت فى البانيو لأنى كنت فى حاله ميئوس منها
                          السوأل بقى بالرشاوى دى كلها يا ترى كمية الذنوب اللى اخدتها قد ايه, و يا ترى لو انتم مكانى(اكيد كنتم مكانى ) بتعملوا ايه؟
                          على فكرة معنديش مانع اتحاسب على اللى عملتة بس بشرط كل اللى اتعاملت معاهم هما كمان يتحاسبوا, ده لو حتفرق مع البلد و لو حيصلح من حالها... لو بقى

                          Comment


                          • #14
                            أنا بروح وفي إيدي أمين شرطة متقاعد بيخلصلي أي حاجة وبديله ١٠٠ جنيه في إيده وكبيرة لما بيرش على كل الناس ١٠٠ جنيه كمان
                            والحمد لله رخصت العربيه في ٤٠ دقيقة من ساعت ما ركنت قدام المرور لحد ما مشيت بالعربيه والنمر راكبه عليها (مرور النزهة -أنضف مرور في مصر-)

                            والرخصة في ساعة واحده وبدون إمتحان إشارات (مرور مدينه نصر)
                            [img3]http://img21.imageshack.us/img21/3957/28138510150332809507433.jpg[/img3]

                            Comment


                            • #15
                              لاحول ولاقوة الا بالله.........
                              [CENTER][COLOR=darkred][SIGPIC][/SIGPIC][/COLOR][/CENTER]

                              [CENTER][SIZE=2][COLOR=darkred]I don't know the key to success, but the key to failure is trying to please everybody[/COLOR][/SIZE][/CENTER]

                              [CENTER][SIZE=4][COLOR=darkred][URL="http://www.nilemotors.net/Nile/149529-a.html"]Alfa = BMW = Toyota[/URL][/COLOR][/SIZE][/CENTER]

                              [CENTER][SIZE=3][COLOR=darkred][URL="http://www.nilemotors.net/Nile/157435-splitfire.html"]الحقيقة وراء SplitFire[/URL][/COLOR][/SIZE][/CENTER]

                              Comment

                              Working...
                              X