احذر المشي عكسي !!!!

[Eng_Nissan]

المرور بقى عامل حاجه تغيظ اديلهم فتره وهي امناء شرطه بيكونوا مستخبيين في اماكن مش رئيسيه و من غيير كمين ولا بوكس واقف ومن غير اي حاجه عند الاماكن اللي ممكن يبقى فيها عكسي .!!

تيجي تاخد حته عكسي و تقولي بييس مفيش مرور هنا و ده شارع مش رئيسي و تلاقي الامين ظهرلك فجأه وطبعا عارفين مخالفتها 1200 جنيه و سحب الرخصتين و ممكن حبس !!!

انا من اسبوعين ماشي حته صغيره عكسي في اكتوبر وفي الطريق البطىء و حته مفيهاش حد اساسا لقيت الامين نازلي من عربيه ملاكي !!!! و سحب الرخص و رحت القسم كانوا هيحجزوني لتاني يوم لحد ما اتعرض على النيابه بس امين شرطه هناك سربني و لبست ال 1200 جنيه برده طبعا .

فخدوا بالكوا و متستهتروش بالعكسي حتى لو في شارع جانبي

[osama.m]

انا اتمسكت عكسي اول امبارح و دفعت خمسين بس "رشوة"
للاسف مكنش معايا فلوس فكة غير خمسينات

[kasten]

انا اتمسكت عكسي اول امبارح و دفعت خمسين بس "رشوة"
للاسف مكنش معايا فلوس فكة غير خمسينات

بارك الله فيك

[Eng_Nissan]

انا من سنه اتمسكت عكسي ومكنش معايا غير هي 10 جنيه مفيش غيرها اديتها للعسكري و مشيت

[megaman]

اهه وقعتوا تحت ايدى وليه اساسا اللى يجبرنى امشى عكسى هل مستعجل قوى ولا بوفر بنزين مفيش اى سبب يدفعنى امشى عكسى وعلى فكره العاقبه بتبقى وخيمه لو لا قدر الله دخلت فى حد مش شايفك وكسرتوا عربيات بعض او حد اتعور يا ريت محدش يمشى عكس ولو 2 متر لانه بجد غلط وخطر مش عشان المخالفه يا ريت محدش يزعل احنا اخوات وبندردش انا مره عربيتى القديمه اتخبطت جامد لنفس السبب وشكرا

[Imhotep]

فى ناس بتمشى عكس عن طريق الخطأ بسبب انه غريب.... لكن فى ناس بتستهبل.... يعنى من يومين واحد على المحور كان رايح هايبر.... بعد ما عداه الطريق الداخلى لهايبر و اكتشف هو كده.... يكملش و ياخد يو تيرن زى التاس المحترمة لآ..... راح واقف و ابتدا يرجع بضهره !!! و ايه.... قدام الكمين اللى الناحية التانية.... واحد زى ده مؤكد عايز الدبح مش بس الغرامة

[hobaz]

انا ضد المشي العكسي بس ده ميمنعش لني ساعات وللأسف بمشي في طريق معرفهوش كويس واكتشف في اخر الطريق اني مخالف وكل اللي ماشيين معايا مخالفين وهما مش عارفيين........

[dolly13]

طبعا كلنا معرضين للخطأ خاصة لو مكان مش متعود تمشى فيه
لكن اللى بيستهبل ويبقى عارف ويصر على الخطا بصراحة ده يستحق الغرامة والامين اللى ياخد منه رشوة المفروض انه يستحق الحرق

[بحري]

آخر مرة كنت راجع من بورسعيد على الطريق الدولي وعند بلطيم الطريق فيه إصلاحات ولخبطة
فضلت فترة ماشي في منتصف الطريق العكسي ومستغرب جدا من كام عربية جاية على اليمين وباقول دي ناس معندهاش دم إيه اللي يخليهم يمشوا عكسي بالسرعة دي إلى أن اكتشفت إن أنا نفسي اللي سايب طريقي تماما وماشي عكسي بطريقة رهيبة (سرعة ونور) وفي منتصف الفردة الأخرى من الطريق تماما...لغاية دلوقتي مش مصدق إن الكام كيلو دول عدوا على خير وإن ربنا سترها

[otefa]

آخر مرة كنت راجع من بورسعيد على الطريق الدولي وعند بلطيم الطريق فيه إصلاحات ولخبطة
فضلت فترة ماشي في منتصف الطريق العكسي ومستغرب جدا من كام عربية جاية على اليمين وباقول دي ناس معندهاش دم إيه اللي يخليهم يمشوا عكسي بالسرعة دي إلى أن اكتشفت إن أنا نفسي اللي سايب طريقي تماما وماشي عكسي بطريقة رهيبة (سرعة ونور) وفي منتصف الفردة الأخرى من الطريق تماما...لغاية دلوقتي مش مصدق إن الكام كيلو دول عدوا على خير وإن ربنا سترها

ههههههههههههه..................الحمد لله انها عدت علي خير يادكتر

ماهو المفروض يحطوا علامات مرورية وخطوط ارضية واضحة وبعدين يطلبوا من الناس الالتزام ودفع المخالفات للغير ملتزم

[د.محمود صلاح]

بعض الامناء الغير شرفاء بيستغلها سبوبة للأسف والناس بيعجبها كده بدل ال 1300 ج الغرامة

[abdo_pikt]

انا النهاردة دفعت عشرين جنيه كنت ركب متوسيكل صينى ولفيت تقطع نصف متر بس ومعرفش ان كده عكسى علشان كل مرة كنت بلف من نفس المكان عادى حتى كان فى عسكرى قبل كده كان بقولى لف عادى المهم لفيت وادخل الشارع ولقى ظبط مش عارف طلع منين بيقولى هات الرخاص غرامة 1200 جنيه...بيقولى اعمل الغرمة على رخصة المكنة وله رخصة السواقة... انا مش عارف تفرق فى ايه المهم سمعت 1200 قولت لزم اتصرف ده الغرمة اكتر من اليه انا ركبو وكنت فكر انى معيش فلوس فى جابى بصدفة لقيت 30 جنيه بتوع اشترك نت طلعت 20 جنيه ودهلو
مرة واحدة القى بيكلم هادى وكويس ويقولى يبنى خلى انت زى ابنى انت شكلك طيب ومحترم لو وحد تانى كنت خت منه70 جنيه .... بصو حرامى بس بضمير ونعمة الحرمية