طلب حضور

[theangel]

امبارح جالي عسكري معاه طلب حضور برقم العربيه والإسم كامل والعنوان كمان ومش عارف في ايه وبصراحه مش عارف اروح ولا لأ هل طلبات الإستدعاء دي بتروح لأي حد عادي ولا لو في مصيبه بس

[amrnagy]

متابع

[kamalsalem]

انت كده حد مقدم فيك بلاغ برقم العربية... او معمولك قضية مرور (اقتحام كمين او كده) ... بس من الواضح انه في حد متابع الموضوع عشان يبعتولك في البيت يعني

انت عامل مشاكل مع حد؟

بعد كده لما يجيلك عسكري بمصيبة زي دي.. متستلمش الاعلام واديله 20 جنيه وقوله انت ملقيتنيش.... ومدام استلمت الاعلام لازم تروح.. شوف حد يبقى معاك على التليفون عشان تأمن نفسك وروح وان شاء الله خير

[theangel]

والله ابدا انا معملتش حاجه انا بس كنت عاملت حادث تصادم كده تاني يوم العيد بس والله العظيم وربنا شاهد علي كلامي ان مش انا اللي غلطان خالص انا كنت ماشي في الطريق لواحدي وفاجأة لقيت واحد راكب هوندا جاي زي الصاروخ من ورايا ودخل فيا انا موقفتش لإني كنت نازل باليل متأخر الساعه 5 الفجر ورايح مشوار قريب كنت نازل من غير رخص ولا اي حاجه علشان كده موقفتش وخصوصا اني كنت ماشي في طريق الناس بتجيب فيه ال 100 كيلوا اقل واجب ممكن بقي يكون هو اللي مقدم البلاغ علي العموم انا هروح اشوف الكلام علي ايه وربنا يستر علشان انا اللي حارق دمي ان مش انا اللي غلطان

[theangel]

طبعا ياجماعه انا روحت علشان اشوف ايه الموضوع ولقيت ان الواد قدم في بلاغ برقم العربيه بإن انا اللي دخلت فيه وغير كمان بيقول اني كان في واحده راكبه جامبي وكمان اني دخلت فيه ولفيت وكان وشي في وشه ودخلت فيه تاني وجريت وقال ايه انا كنت بقفل عليه الطريق علشان ميعديش واانا ماشي في طريق اصلا ياخد 10 عربيات جمب بعض واضح طبعا انه مكنش في واعيه
وربنا واحده يعلم إن انا مغلطش خالص وماشي في طريقي بس علشان حوار الرخص ده موقفتش علشان زي مقولت اني كنت نازل الساعه
5 الفجر يعني قولت ملوش لزمه ورحتله طلب 2000 جنيه كتعويض علشان يتنازل عن المحضر

طبعا انا مش عايز اقول حاجه اكتر من إن ربنا موجود ومش بيضيع حق حد وهو قبل علي نفسه حاجه مش من حقه وطلعني انا اللي غلطان
وانا عن نفسي اتعلمت من الموضوع ده اني لو نازل حتي اقعد في العربيه تحت البيت ااخد الرخص معايا علشان انا اتخنقت اوي من الموضوع ده وربنا يكفينا ويكفيكم شر الناس علشان بجد الناس بقت بتقبل اي حاجه علي نفسها

[maka]

ربنا يعوض عليك خير باذن الله

[bmw323]

أصلا المفروض مكنتش تدفعلو حاجة وكنت تعمل محضر قدام محضر وتاخد معاك أى ظابط معرفة بس الحمد لله أنها جت على قد كدة وربنا يستر طريقك وطريقنا جميعا والحمد لله أنك بخير

[nouranwar]

الحمد لله علي كل شئ
و حسبي الله و نعم الوكيل لو كان ظالمك فعلا

[fadod]

أنا مفهمتش الكلام كويس ..يعني إنت دفعت ال-2000 جنيه وإنت مش غلطان ؟
مجبتش محامي ليه ؟؟ مرفعتش إنت كمان قضية ليه ؟؟؟طيب إنت عندك اضرار في عربيتك

[kamalsalem]

طبعاًَ انت كده اشتريت دماغك... بس هو مين اصلاً الزمك تدفع؟ مين اثبت عليك التهمة دي؟

[Adham]

انا مرة زمان عملها معايا واحد برضة كسر اشارة و خبط فيا و طبقلي الباب الشمال والبولونيز مجرالهاش اي شيء اساسا على ما اذكر و الراجل نزل و زعقت فية انة كاسر الاشارة وداخل بسرعتة التقاطع و دخل بيني و بين العربية اللي قدامي المهم الموضوع اتلم لاننا كنا في تقاطع في شارع الطيران وانا مشيت و لقيت نفس الحوار بعد يومين تلاتة استدعاء للقسم رحت لقيتة قايل ان انا خبطتة و مشيت

الموضوع انة مأمن عالبولونيز و لازم يعمل محضر و علشان شركة التأمين تصلحهالة و ترفع عليا قضية (دة اللي قالهولي الشاويش في القسم بعد ماتحين الحتة ام خمسة التمام -لاحظ ان سنة 96 كان العرف 5 ج مش 20 ج زي دلوقتي)

انا في ثانية حسبتها في دماغي و كانت اقوالي ان هو اللي كسر الاشارة و خبطنى و نزل و اعتذر عن خطأة و قال انة مستعد يدفع تمن الاصلاح و ان انا اللي رفضت و قلتلة لا ماقلبش عوض و مشيت بناء على ذلك

و اني مستغرب جداً ان هو عمل محضر ليا بعد الكلام دة لأن في الاساس هو اللي كاسر الاشارة بسرعتة و داخل بين السيارات اللي اشارتها مفتوحه و خضراء بينما هو كانت اشارتة حمراء و هو اللي غلطان و نزل و اعتذر و ابدى اسفة

و طبعاً المحضر بالشكل دة اتحفظ و بسلامتة لبس مع شركة التأمين ان هوة اللي غلطان

[theangel]

بالنسبه للأضرار عندي الحمد لله الرفرف بس هو اللي عايز يترد علي البارد وعايز فانوس إشارة يعني حاجات بسيطه لإنه دخل في الرفرف بس يعني مش هتتكلف كتير الحمد لله ولكن انا شيلت الليله عندي وعنده وربنا عالم مين اللي غلطان العربيه بتاعت والده اصلا انا روحتلهم البيت وقولتله الحمد لله انه بخير يعني والضرر عندي وعندك ومش انا اللي غلطان ولكن مفيش تفاهم اشتريت دماغي بقي وخلاص والحمد لله علي قد كده وربنا مش بيسيب حق حد وانا لو انا اللي غلطان راضي بحكم ربنا عليا برضوا بس علشان مش انا اللي غلطان هو ده اللي مزعلني اني اشيل استهتار واحد ويبقي انا اللي غلطان بس في النهايه قدر الله ومشاء فعل

[power]

سامحني بس حضرتك كده سلبي اوى