هل ممكن اجدد رخصة العربية بتوكيل؟؟

[elrasy]

هل ممكن اجدد رخصة العربية بتوكيل؟؟

وهل غلط من الناحية القانوينة انى مسجلش العربية باسمى وامشى بالتوكيل (مع العلم ان التوكيل غير قابل للالغاء, لان مكتوب فية لة حق البيع للنفس و للغير).


مع العلم ان:
- توكيلى اول توكيل.
- العربية مرور ورخصتى الخاصة مرور تانى.

[aif]

ممكن طبعا
تروح المرور اللي العربية مترخصة فيه وبالتوكيل ده كأنك انت صاحبها لأنك وكيل عنه
بس الرخصة ح تطلع باسم المالك الاصلي مش باسمك

ولو ح تخلي العربية معاك فترة طويلة يبقي احسن انقل ملكيتها
اما لو ناوي تبيعها علي طول يبقي مش مستاهله نقل الملكية
ونصيحة لو قررت تنقل ملكية انقلها وجدد في نفس الوقت من المرور اللي انت تبعه حسب عنوانك في البطاقة بس خلي بالك مافيش نمر في مرور القاهرة كله

[محمد ابراهيم 1]

توكيلات السيارات نوعين
بيع لنفسه وللغير
وفيه توكيل اداره
لو التوكيل اللى معاك مكتوب فيه انه توكيل اداره والتعامل امام وحدات المرور المختلفه واستلام وتسليم اللوحات المعدنيه وخلافه يبقى ممكن ترخص بيه
لكن لو توكيل بيع وده بيبقى مكتوب فيه
البيع لنفسه وللغير وتوكيل الغير فده مينفعش انك ترخص بيه لكن عشان ترخص يبقى لازم تسجل وتنقل ملكيه وتطلع الرخصه بإسمك

[أبو ياسين]

خد بالك احيانا بيحتاجو مع التوكيل صوره بطاقه صاحب العربيه
مالك العربيه الاصلى

[tutankhamoun]

هل ممكن اجدد رخصة العربية بتوكيل؟؟

وهل غلط من الناحية القانوينة انى مسجلش العربية باسمى وامشى بالتوكيل (مع العلم ان التوكيل غير قابل للالغاء, لان مكتوب فية لة حق البيع للنفس و للغير).


مع العلم ان:
- توكيلى اول توكيل.
- العربية مرور ورخصتى الخاصة مرور تانى.

بص يا أستاذ أحمد
مين قال إن التوكيل غير قابل للإلغاء ؟؟؟؟؟؟؟؟؟؟؟؟؟
التوكيل قابل للإلغاء طبعا .............. هذا قانونا
أما من ناحية هل هذا يحدث ........... لا أظن
و الأفضل لك تحويل السيارة بإسمك
و ضع هذه النقطة في الإعتبار
لو لم تستطيع أن تجد لوحات معدنية في قسم المرور التابع له حضرتك ........ أنتظر قليلا حتى لا تصاب بالصداع من جراء عدم وجود لوحات و عدم قدرتك على قيادة السيارة
و شكرا

[MMamdouh]

مش العربية عليها لوحات؟؟ لو مرورك مفيهوش لوحات حتمشى بالنمر اللى معاك لحد ما يبقى عندهم لوحات

اننا مرور البساتين و لسة ماشى بلوحات مرور مصر الجديدة

MMamdouh

[elrasy]

بص يا أستاذ أحمد
مين قال إن التوكيل غير قابل للإلغاء ؟؟؟؟؟؟؟؟؟؟؟؟؟
التوكيل قابل للإلغاء طبعا .............. هذا قانونا
أما من ناحية هل هذا يحدث ........... لا أظن
و الأفضل لك تحويل السيارة بإسمك
و ضع هذه النقطة في الإعتبار
لو لم تستطيع أن تجد لوحات معدنية في قسم المرور التابع له حضرتك ........ أنتظر قليلا حتى لا تصاب بالصداع من جراء عدم وجود لوحات و عدم قدرتك على قيادة السيارة
و شكرا

انا سألت و اتأكدت ان التوكيل المكتوب فية لة حق البيع للنفس والغير لا يلغى الا بوجود الطرفين.

[hazem_khidr]

ما ينفعش تروح ترخص بالتوكيل
التوكيل اللي معاك توكيل للبيع لنفسك و للغير فقط
ساعه ما الرخصه تخلص لازم تروح المرور و تجيب شهاده مخالفات و تسجل العربيه باسمك لانك لو ما روحتش لازم ترجع للمالك يرخصهالك و ساعتها ممكن ياخد منك الف او اتنين و يبتزك و لو ما عملتش كده و عدي شهر الحكومه بتبقي جنحه و قضيه تبديد لوحات ممكن توصل فيها من شهر لتلات شهور حبس

[aif]

بص يا أستاذ أحمد
مين قال إن التوكيل غير قابل للإلغاء ؟؟؟؟؟؟؟؟؟؟؟؟؟
التوكيل قابل للإلغاء طبعا .............. هذا قانونا
أما من ناحية هل هذا يحدث ........... لا أظن
و الأفضل لك تحويل السيارة بإسمك
و ضع هذه النقطة في الإعتبار
لو لم تستطيع أن تجد لوحات معدنية في قسم المرور التابع له حضرتك ........ أنتظر قليلا حتى لا تصاب بالصداع من جراء عدم وجود لوحات و عدم قدرتك على قيادة السيارة
و شكرا

التوكيلات الخاصة اللي محدد فيها موضوع البيع زي توكيل بيع السيارة او توكيل بيع شقة او ارض لا يمكن الغاؤة الا بموافقة الطرفين .... اللي ممكن تلغيه بدون شروط هو توكيلات المحامين والادارة وما شابهها
والا كان كل واحد باع النهاردة بتوكيل وتاني يوم يلغية ويبيع لغيره وهكذا .... وانت عارف النصابين عندنا اكتر من الهم علي القلب

[ihab]

بالنسبة لتوكيل العربية اللى ممكن تجدد بيه الرخصة بيبقى منصوص فيه على الاتى :
البيع للنفس و الغير و توكيل الغير و التعامل مع المرور و تجديد الرخص
و التوكيل لا يتم الغاؤه الا بتوقيع الطرفين و حضورهم فى الشهر العقارى

[MMamdouh]

و ممكن تجدد عن طريق الانترنت لو معندكش فحص و الرخصة تجلك لحد البيت و تسدد اما بكارت ائتمان او عند الاستلام

MMamdouh

[moudy2002]

طيب سؤال معلش يا رجالة
انا سجلت العربية بأسمى فى الشهر العقارى ودفعت حوالى 750 جنية
المهم العقد دة عملتوا من حوالى 5 شهور ولسة مرحتش انقل ملكية واغير النمر فى المرور لانى مش فاضى لوجع القلب والاجراءات ...

سمعت من اخ انه لو عدى شهر على العقد المسجل وما ما نقلتش ملكية العربية بأسمى فى المرور فا العقد يعتبر لاغى ولازم اسجلة تانى وادفع تانى لانى مضيت بايع و مشترى .

وسمعت رأى اخر انه مش مشكلة العقد لو فات علية شهر طالما الرخصة سارية معايا وان كل الى هحصل هدفع ضريبة وربع لما اجى انقل ملكية بأسمى يعنى حوالى 100 جنية غرامة اكن الرخصة انتهت ودفعت ضريبه تأخير ..

مش عارف انه رأى هو الصح ؟؟؟

حاجة تانية معلش طبعا ازمة النمر منتشرة فى ادارات المرور كله فممكن امشى بنمر مرور الشرطة الى العربية اصلا تباعها وانا تبع مرور مدينة نصر

بس السؤال هنا هل هطلع رخص العربية بأسمى ولا همشى بتصريح لغاية ما يجى نمر
ولو همشى بتصريح هيبقى مككتوب فية اسمى ولا اسم المالك بتاع العربية الى اصلا رخصة العربية لسة بأسمة ؟؟
معلش طولت عليكوا

[ramyfawzy]

على حسب علمي مافيش الكلام ده لانك اساسا اشتريت العربية وسجلتها كمان فمش هتعمل عقدين
وكمان مادام الرخصة سارية فمافيش ضريبة وربع ولا الكلام ده
موضوع الضريبة ده لما تبقى اصلا العربية مترخصة بأسمك ورخصتها خلصت وماجددتهاش ساعتها بقى تدفع
لو رخصة العربية اللى معاك خلصت بتجيب شهادة بيانات وتوديها للمرور
لو مافيش نمر في المرور ممكن تمشي بالنمر اللى معاك بس ساعتها هيدولك تصريح مؤقت مدته 3 شهور بأسمك طبعا
واي خدمة

رامي (ابو احمد)

[moudy2002]

شكرا جدا يا ابو احمد
وعلى فكرة انا قريت قبل كدة انك ساكن جنب سوق السيارت فكدة نبقى جيران ياباشا
انا ساكن فى الشارع الى على نصيتة الجامع (محطة الجامع ) فى السويسرى ب
ويسعدنى طبعا اتعرف على حضرتك اى وقت
شكرا جارى العزيز

[ramyfawzy]

اي خدمة يا باشا ويسعدني انى اتعرف عليك في اقرب وقت ممكن
نظبط كده الامور ونتقابل ان شاء الله

رامي (ابو احمد)