عاوز افهم ازاي هعمل الرخصة ؟!!

[SNIPER_333]

دلوقتي ياباشا في واحد عاوز يبيع عربيته لواحد
بس الرخصة باسم ورثة فلان فلان ( اللي هوا ابو الشخص البائع )
+ بنفس الوقت هينقل مكان المرور من مكان لآخر + يجدد الرخصة ويثبت الموتور علي الرخصة لأنه استيراد مستعمل !

المهم انه الحمد لله عمل الحوارات دي بس الرخصة طالعة بالاسم القديم للمالك بتاعها ..(ورثة فلان .)
يعني الرخصة طالعة

والسؤال هو
ايه اللي ناقص عشان تتحول اسم الرخصة من ورثة فلان .. الي اسم المشتري ؟

في ناس بتقول حاجات بس مش واضحة اوي عن الشهر العقاري / مبايعة / وووو
وفي ناس تانية بتقولك لالالا اسال محامي وحوارات
وبصراحة انا جالي حول

ان شاء الله ازاي ننقل الملكية وبعديها تغير الرخصة وهل يستلزم فحص ولا لأ؟.
ياريت اللي عنده خبرة ومعلومات يفيدنا ... وجزاه الله كل خير

[Nader]

الورثة هيعملوا توكيل لواحد فيهم وهو الي

هينقل الملكية للمشتري الجديد .... او تلم الورثة

كلهم ويروحوا الشهر العقاري يمضوا واحد واحد

طبعاً حل غير عملي.

بعدين تاخد العقد من الشهر العقاري تروح على قسم

المرور الذي يتبع سكنك وترخص.

بالنسبة للفحص فهتلاقي تاريخ الفحص مكتوب على

الرخصة القديمة بس لو هتنقل ملكية هتفحص.

[SNIPER_333]

بالظبط يا اخي الحبيب نادر باشا
اللي قدرت اترجمه ان الرجل البائع المفترض انه معاه توكيل
وكل شوية يقولي هسجل لك ؟ يقولي في الشهر العقاري يقول أه وهو معاه صورة بطاقتي
فالي متوقعه انه معاه توكيل وهيروح يعمل عقد بيع في الشهر العقاري وبكده يبقي نقلي الملكية
تاني حاجة م الراجل لسه فااااااااحص
هفحص انا تاني طالما عاوز ارخص وانقل ملكية ؟

[Nader]

لو هتنقل باسمك يبقى هترخص وتنقل ملكية

او الراجل يعمل لك توكيل بيع للنفس وللغير

التوكيل دة بيكون غير قابل للالغاء من قبل

البائع وتمشي بالتوكيل والرخصة القديمة

لو الرخصة لسة سارية وانت مش عاوز تفحص

دلوقتي.


هو في حاجة تانية كمان انك ممكن تسجل بس

متمضيش كمشتري في العقد وبالتالي تقدر

تمشي بالعقد والرخصة القديمة، يعني هتكون

مسجل في الشهر العقاري بس مش مرخص العربية

باسمك.


غير كدة لو هترخص يبقى هتفحص.

[جمال]

طالما هتنقل ملكية وتطلع الرخصة باسمك يبقى لازم تفحص حتى لو السيارة لسه فاحصة امبارح

[SNIPER_333]

الله ينور يا شباب
طيب دلوقتي الراجل بيقول انه رايح يسجل لي ..
ده معناته اني لازم ابقي معاه ؟
ولا مش ضروري وهو اخذ صورة بطاقته ( واضح اني جاهل اخر حاجة )

[جمال]

ممكن يسجل فى عدم وجودك وفى الحالة دى بتاخد عقد البيع المسجل و تمشى بيه لحد اول تجديد وتفحص وتجدد باسمك
لو رحت معاه ووقعت مشترى يبقى لازم تنقل ملكية فى خلال فترة معينة ( اعتقد شهر )

[SNIPER_333]

ع افتراض اني مرحتش مع البائع
لكن عاوز ارخص باسمي
اطلع بالعقد( اللي لسه مسجله الراجل) - علي المرور- ومعاي الرخصة القديمة
عشان اخضع للفحص وبعديها ان شاء الله يغيروا الرخصة صح ؟

[وحش التجارة]

الكلام الى السادة الافاضل ده هو صح الصح المشكلة تكمن فى وجود قاصر فى الورثة


فلو مفيش قاصر فزى ما السادة قالو ولو فيه قاصر لازم القعد يتوافق عليه من المجلس الحسبى عن طريق لجنة مشكلة يعنى الرد فى حدود اسبوع او اكثر

ربنا يسهلك وميكنش فيه قصر فى الورثة

[SNIPER_333]

يارب استر ... هو الراجل شغاللي في متقلقتش وانها بتاعته هو ووو
ادعولي يا اخواننا تخلص علي خير عشان انا علي اخري خصوصا انه بيركنها تحت قريب من بيتي فصباح الاستفزاز :d

[tmz9111]

ربنا يوفقك

[Nader]

انت مش لازم تكون موجود معاة وهو بيسجل لانن

انت مش هتمضي على العقد علشان لو اتاخرت في

الترخيص هتدفع غرامة دة لو كنت ماضي كمشتري.

بس انصحك روح معاة مفيش حاجة مضمونة في الزمن دة.


بعد ما تخلص تسجيل في الشهر العقاري هتدفع فلوس

للتسجيل طبعاً حسب موديل السنة والـcc بتاع العربية.


صور العقد وخلي معا الصورة ممكن تحتاجها ف يوم من

الايام وخد الاصل والرخصة واطلع على المرور هيعملوا

ملف جديد باسمك وطبعاً هياخدوا منك اصل العقد والرخصة

القديمة وهيدولك رخصتك الجديدة بعد ما تكون فحصت طبعاً.

[SNIPER_333]

جزاكم الله كل خير ياشباب

نادر معلش تقصد ايه ب

بعد ما تخلص تسجيل في الشهر العقاري هتدفع فلوس

للتسجيل طبعاً حسب موديل السنة والـcc بتاع العربية.

للتسجيل طبعا حسب موديل السنة وال cc ده في الشهر العقاري ؟
يعني المصاريف نظامها ايه ؟
خصوصا انها موديل 83

[Nader]

اقصد انك وانت بتسجل في الشهر العقاري

هيطلبوا منك رسوم وضريبة حسب سنة

صنع السيارة، يعن مثلاً لو 128 موديل

83 ممكن تكون الضريبة في حدود 60

جنية وكل ما يكون الموديل احدث كل ما

تدفع اكتر.

[SNIPER_333]

سؤال غبي :
علي اعتبار ان الرجل هو اللي هيسجل ...فده معناته انه هو اللي هيدفع ؟

تاني حاجة !!!
هوندا سيفيك 83 هاتش باك
بجد اتخنقت من قلة المعلومات اللي موجودة عنها يمكن عشان قديمة جدا
بس فين اصحابها يتكلموا عنها ؟ موضوعات عن مميزاتها وعيوبها ووو
محتاج لمساعدتكم

صاحبها مش مهتم بيها من جوه يعني الصالون والتابلوه في الضياع ومحتاج اكيد لسمكرة ووو
ومن غير كاسيت ولا اي رفاهية غير صندوق تترزع فيه وتسوق
وكده
عاوز لو امكن اعرف اماكن وحدود الاسعار للحاجات دي من اول المرايات والفرش
و اكيد محتاجة شبكة خارجية
لحد الرش والدهان الخارجي

منتظر آرائكم واقتراحاتكم