أختبار القيادة ....

[mohamed_88sk]

أنا يا جماعة زي ما بعضكم عرف قصتي في كورس القيادة تبع الحكومة ما علينا عشان ضغطي بيعلا لما أفتكر
المهم أنا أساسا بعرف أسوق بس المشكلة أني ماجربتش حرف ال s قبل كده وكل ما أروح أخدوه في مدرسة القيادة يقولولي محدش حيعمل s النهارده
محدش فاكر كانت بتتعمل أزاي يقولي ....

ومحدش عنده أي حاجه عن الأشارات عشان بس أفتكر أنا عارفها بس مش عارف حاسس أني أتلخبطت وقلقان
وبفكر أروح أمتحن بكرة من غير ما أجرب الs في المدرسة عشان متهيألي الفلوس حتروح عليا من يوم الدفع لحد 3 شهور وأنا بقالي شهرين ونص دافع
وهم الشهادة لله أدوني حصة أشارات وكنت بجاوب فيها بس كل حاجه طارت (زيي شعري اللي بيطير بالظبط)..

[mohamed_88sk]

أقصد دافع فلوس مدرسة القيادة ولازم أكون تبع المدرسة عشان أنجح زي ما بيقولوا
ومعنى أن الفلوس تروح عليا يعني أدفع تاني ما يقارب500 جنيه وأعيد المشاوير دي تاني.

[أبو ياسين]

متقلقش الموضوع بسيط جدا
حرف الs سهل و مفيهوش اى حاجه

[Akram]

ايه حرف الـ S ده ,
ايه المقصود بيه ,
انا حاسس كإن الكلام ده مش على مصر .

[mohamed_88sk]

ياريت بجد يا abozaky
مش عارف أروح من نفسي ولا أية.
حرف الs يا أستاذ akram
اللي هي العساكر اللي بتمشي وسطها بالوش و بالضهر.

[sss]

متقلقش خالص من الموضوع دة , انا لما رحت اعمل الاختبار مكتش في مدرسة المرور و لا حاجة و كنت لسه متعلم من شهور قليلة و يوم الاختبار رحت بدري عشان اشوف الوضع و ادرب نفسي "لاني كنت فاكر الموضوع صعب" وكمان كان معايا عربية و العياذ بالله لادا يعني الموضوع مكانش سهل خالص و لما شفت الاختبار قعدت اجربه كتير في حتة فاضية وكل مرة مكنتش بانجح وفي الاخر كنت هامشي و ارجع في يوم تاني لكن على اخر لحظة قررت اعاند و دخلت اخر واحد تقربيا وعديت الاختبار بمنتهى السهولة اهم حاجة الثقة و انك ما تبالغش في الدوران خاصة وانت راجع و على فكرة ما حدش بيستعجلك ياعني خد راحتك و ياريت تروح بعبية وشها مش عريض و يا سلام لو كان فيها باور هاتسهلك الموضوع خالص وربنا يوفقك

[BomBom]

ايه حرف الـ S ده ,
ايه المقصود بيه ,
انا حاسس كإن الكلام ده مش على مصر .

+100000000000000

[mahamedaraby]

والله احسن حاجه وصدقنى هتنجح هتنجح باذن الله

خد معاك عربيه سوزكى ماروتى ان شاء الله تاجرها

عربيه صغيره جدا وهتاخد الاختبار فى منتهى السهوله

[mokhtar]

انا لسه مطلع الرخصه من اسبوعين على فكره وانا رايح اعمل الاختبار مكنتش سوقت فى حياتى الا مرتين بس كنت مدرب مع واحد شغال فى المرور بعربيته معاه قراطيس رصها وعلمنى ازاى اعدى ..
كنت خايف من انى العربيه بتبطل منى لانى مش واخد على الدبرياج وخاليف برضه انها تنط منى لانى مش متعود على البنزين ...الراجل قاللى خليك لى الدبرياج بس ودخلت الامتحان على عربيه المرور شاهين والحمد لله نجحت ..هوعايز شويه ثقه بالنفس ...وربنا يوفقك

..mokhtar..

[mohamed_88sk]

طيب أنا بقول واحنا في الأمتحان أخليني عالسلانسيه يعني أشيل رجلي من الدبرياج العربيه تتحرك ولما أدوس عليه العربيه تخنق وتهدي ؟؟ أيه رأيكم ..
بس بجد ممكن أجيب عربيه من بره ؟؟ أصل معنديش في مصر ولو كده يبقى ءأجر ماروتي ..
أنا بسوق طول عمري أوتوماتيك وباور وكنت بسوء مانيوال بس ولا مرة جربت ال s ...

[islamnabil]

ماتضمنش السلانسيه بتاع العربية
يعني ممكن تبطل منك لو ال Rpm واطي
احسن حاجة خليك على الاول

[وائل السويفي]

والله احسن حاجه وصدقنى هتنجح هتنجح باذن الله

خد معاك عربيه سوزكى ماروتى ان شاء الله تاجرها

عربيه صغيره جدا وهتاخد الاختبار فى منتهى السهوله

+1000000000
وربنا يوفقك

[mohamed_88sk]

ربنا يباركلكم كلكم يا جماعة خلاص ربنا يسهل أشوف حد معاه ماروتي أعمل عليه براشوت
لو مكانش يبقى عربيات الأختبار وخلاص.
بس محدش عنده حاجه للأشارات ؟؟