حكايتي مع التامين

[AlmAhAtmA]

التامين
كلمه بتحمل كل معاني الامان و التفائل
لكن يا تري شركات التامين في مصر بتقوم بالدور ده

يا ريت نتشارك خبراتنا مع شركات التامين

انا تاميني مع كونتاكت علشان العربيه من عندهم
الناس محترمه و مؤدبه و لطيفه و لكن و اه من ولكن

العلامه اتسرقت
عملت محضر
اتصلت بكونتكت
المستندات اتبعتت
اتصلت بكونتكت تاني
المستندات اتبعتت تاني
اتصلت بكونتكت تالت
اتصلت بكونتكت رابع
اتصلت بمركز الخدمه
العلامه وصلت
اتصلت بكونتكت خامس
اتصلت بكونتكت سادس
اتصلت بمركزالخدمه تاني
ركبت العلامه
دفعت الفلوس من جيبي
اتصلت بكونتكت سابع
حسبي الله و نعم الوكيل
اتصلت بكونتكت ثامن لكن المره دي علشان اطلب اني الغي عمليه استرداد تمن العلامه و انا دفعتها من جيبي و حسبي الله و نعم الوكيل
تفاصيل المكالمات اللي فوق دي انتوا عرفينها دوخيني يا لمونه

و علي راي اللي قال
العنكبوت عشش علي الحيط و سرح علي الغيط

احلي حاجه ان انا كلمتهم قلت لهم ان انا مش عايز حاجه و شكرا
في خلال نصف ساعه ظهر الفارس علي حصانه الابيض

و احنا اسفين يا فندم و المره الجايه و الكلام اللي انتم عارفينوا ده

شاركوني تجاربكم

[TAG_Turbo0]

ههههههههههههههههه
كل ده علشان علامه

انا بصراحه مليش تجارب مع شركات التأمين خالص

[محمدايهاب]

حصل معايا حاجة مثل كده حصل إنهم أتأخروا في بعت الفاكس بالموافقة لمركز الصيانة و بعد عدة مكالمات و بعد اما المركز قفل و رجعت فاضي و أنا في الميروباص عائد وصلني الإعتزار بعد خراب مالطا

[Abdallah]

طالما الموضوع كدة يبقى ايه فايدة التأمين بقة ؟؟

[PAYOO]

ممكن نتكلم عن الجانب الإيجابي للتأمين وشركات التأمين ؟ وللا الموضوع ده فقط للعيوب والمشكلات ؟؟

لأني بصراحه ماعنديش أي مشاكل في التأمين مع "الجمعيه المصريه للتأمين التعاوني" ولا حتى شوفت وأنا هناك حد بيشتكي أو عنده مشكله

وأنا ليه أكتر من تعامل مع الجمعيه من خلال الوثيقه وأترددت عليهم كتير وبصراحه شركه كبيره كل يوم بتثبت أنها الأجدر في السوق المصريه

ومعلش بقى يا جماعه أنا مع "الجمعيه" دي ماشوفتش ربع مشكله ومش هاقدر أشارك في الحكايات المؤسفه لشركات التأمين

وإن كنت أطالب الزملاء الأعضاء بالكتابه والمشاركة والتعليق في هذا الموضوع لكي نعرف جميعا ما هي عيوب الشركات التي تأخذ وتلهف فلوسنا لكي نتجنب هذه الشركات المضله

وأخيرا

[marq=right:46414c145e]لنا الله[/marq:46414c145e]

[AlmAhAtmA]

المشكله يا بايو ان انا ما باليد حيله
انا واخد العربيه من كونتاكت و ما فيش مفر

المشكله هي عدم الصراحه
يعني قالوا لي فيه عربيه بدل عربيتك لو التصليح اكتر من 3 ايام
و خدمات ايه و تسهيلات ايه
و كله في الاخر كلام

الناس مش فاهمه انهم بيقدموا خدمه
و اهم حاجه في الخدمه رضا العميل

يا فرحتي بالكول سنتر

انا الهوايه الشمال اتكسرت علي الطريق الصحراوي
و عملت زي ما همه قالوا بالضبط
كلمتهم و بعت الصور و الرخص بالميل

و قالوا لي الاحد علشان الاجازات

يعني ما فيش اي اعتبارات للسيفتي لو الازاز ده طار مثلا او اي حاجه
و ما فيش اعتبارات للبيزنس لو بدل الهوايه العربيه كلها مثلا ولعت او حد حدف جواها حاجه
اما العميل فله الله

انا قررت اني انزل اعمل الهوايه علي حسابي برضه لاني مرتبط بشغلي ولازم اسافر النهارده

[PAYOO]

أنا من رأيي أنك لازم تشتكي في الهيئة العامة للرقابة على التأمين وتبعت لهم لحد ما يحققوا في الشكوتين بتوعك وتبلغ إدارة كونتكت بالكلام ده عشان يعرفوا إن الناس مش بتسكت على حقوقها

وياريت تجمع كلامك كله في موضوع واحد وتسجله عندك في ملف وتبدأ تنشره في كل حته وأولهم الموقع بتاعهم عشان الناس تعرف الحقيقه

مش كفايه انهم بياخدوا أعلى نسبة تأمين في مصر لا وكمان بيقدموا خدمة نص كم

وربنا معاك

[Sherif Khalifa]

يعني قالوا لي فيه عربيه بدل عربيتك لو التصليح اكتر من 3 ايام

انا اعرف ان الخدمة دة عليها فلوس ازيد بتشترك فى العضوية الزرقاء بدل البرتقالى
انت كدة مشترك فى حاجة مش بتستفيد بيها
غالبا دخلوك فى العضوية البنفسيجى :)

[memo_hefnawy]

تجربتى مع كونتاكت :

أنا كمان شارى معاهم عربيتى بعد ما إستلمت ب 3 أسابيع تقريبا و الحمد لله واحد الله يسامحه خابطلى الباب بتاعى

طبعا إتعكننت و الكلام إللى إنتم عارفينه بس قدر الله و ماشاء فعل

المهم ولا صورت ولا عملت محضر ولا أى حاجة ...سجلت نمر الراجل و إتصلت بكونتاكت رد عليا بكل أدب و قالى إوصف الأضرار و إبعتلى بالفاكس الرخص و رقم العضوية و بلغنى هاتروح التوكيل إمته

و فعلا روحت التوكيل خلال 24 ساعة كان مهندس التأمين معاين العربية و موافق على الحاجة

التوكيل بطئ لأن عنده ضغط المهم فضلت العربية 3 أسابيع مركونه فى التوكيل لحد ما إتعملت طبعا أنا بتابع بالتليفون مع مهندس فى التوكيل لحد ما قالى خلصت كلمت كونتاكت مرتين 3 عشان أئكد عليهم إنى أروح أستلم ....المرحله دى بقه هى إللى كانت مش أد كده
روحت أستلم المهندس قالى لسه مش بعتوا الموافقه قولتله و بعدين قالى مش هاتخرج بالعربية إلا ما يبعتوها
فضلت مع الراجل كثر خيره هو إتصل بيهم مرتين لحد ما بعتوا فى آخر وقت و مش دفعت نكله بالرغم إن التوكيل بدل ما يسمكر الخبطة إللى مساحتها لا تتخطى 30 سم مربع غير طبلة الباب بالكامل

المهم بما أن العربية هاتتصلح أكثر من 3 أيام باعتولى عربية ....
سألونى عايزها إمتى و مانيوال ولا أوتوماتيك و عايزها تيجيلك ولا هاتروح تاخدها

لو هاتجيلك بتوصلك و بتدفع ديليفرى مش فاكر 20 جنيه أو أقل مش متذكر

المهم الراجل وصلها لحد تحت الشغل عندى و العربية بتفضل معايا على حسابهم لمدة 3 أيام و لو عايز أمد أدفع أنا

كانت لانسر 2006 عامله 10000 كم مانيوال 1300

دى تجربتى مع كونتاكت

ونفس الكلام حصل مع صديق ليا و أكثر من مره معاهم

[AlmAhAtmA]

قدر الله و ما شاء فعل
ان شاء الله ما احتجشي التامين

انا مش مزعلني اني دفعت
انا اللي زعلني اني حاسس اني مخطئ في حق نفسي

لكن بعد كلامك واضح ان الناس كويسين وانه سوء حظ معايا مش اكتر

الحمد لله

[معاذ الشرباصى]

لأ هو فعلا يا استاذ ادم بتوع كونتاكت معروف انهم الاحسن حاليا على الساحة التامين, بس غاليين

يعنى مبتدفعش ولا مليم مع اى وكيل, مبتعملش محضر غير فى الحوادث الكبيرة لا قدر الله, و بيهتموا جدا بخدمة العملاء

لكن ده ميمنعش ان مفيش حد كامل, و للاسف اول غلطة حقيقية اسمعها عنهم كانت مح عضو معانا فى المنتدى

ان شاء الله ميبقاش فى تقصير منهم, و متحتجش التامين خالص

[hamtle97]

ياريت ياجماعة حد يحط صورة وثيقة للتأمين ويشرحهالنا
علشان نفهم جقوقنا وواجباتنا ايه
شكرا

[baher]

موش عارف ليه في مصر ديما في اختلاف على كل شيء ناس تشكر وناس ننذمر وللأسف مفيش جميعه او هيئه لحمايه المستهلك تحكم المواضيع وتقيم اداء الشركات وتوجه الزبائن ولنا الله