سؤال عن البيع بتوكيل

[KiNgMaX]

ممكن حد يقولى صيغة التوكيل بتكون ازاى ( بالنسبة للتوكيل للنفس وللغير )
وايه الاحتياطات اللى ناخد بالنا منها اثناء البيع بتوكيل وبرجاء سرعة الرد

[ihab]

بص الصيغة المفتوحة بتبقى :
"البيع للنفس و للغير و توكيل الغير و التعامل مع المرور و التجديد و الترخيص"
فى هذه الحالة من الممكن عند انتهاء الرخصة تجديدها بدون نقل الملكية ( تسجيل الشهر العقارى )
و اذا كان التوكيل بصيغة:
"البيع للنفس و للغير و توكيل الغير و التعامل مع المرور"
فمن الممكن البيع و توكيل الغير فقط لحين انتهاء الرخصة و فى هذه الحالة يجب التسجيل فى الشهر العقارى و نقل الملكية فى المرور

[M_ashraf]

زي ما ايهاب باشا قالك بالظبط لكن ممكن اول واحد بيبيع اللي هو الرخصه باسمه يشيل كلمة توكيل الغير علشان اللي يشتري بعد كده يسجل على طول وده بيسموه توكيل مقفول وده علشان العربيه متتبعش 5 او 6 مرات وتفضل الرخصه باس صاحبها

[Abo_Lina]

انا لسه بايع عربية بالطريقة دي و اغلب الناس شغالة كده دلوقتي..عملت للشاري توكيلين واحد بيع و واحد ادارة..وطبعا تاخذ ورقة من الشاري مكتوب فيها بيانتكو و بيانات السيارة و وقت التسليم علشان تخلي مسؤليتك من السيارة

[KiNgMaX]

"البيع للنفس و للغير و توكيل الغير و التعامل مع المرور"

يا جماعة ازاى بس اكتب فى التوكيل التعامل مع المرور
بالطريقة دى لما الرخصة تنتهى المشترى هيروح يجدد باسمى تانى ومش هنخلص كده
بيتهيالى المفروض نكتب (البيع للنفس و للغير و توكيل الغير) بس :roll: :roll: :roll:

ياريت التوضيح

عملت للشاري توكيلين واحد بيع و واحد ادارة..

ممكن حضرتك توضع ايه توكيل الادارة ده

وطبعا تاخذ ورقة من الشاري مكتوب فيها بيانتكو و بيانات السيارة و وقت التسليم علشان تخلي مسؤليتك من السيارة

حضرتك تقصد ورقة الاستلام الى بتبقى فى اخر العقد الابتدائى

ولو حضرتك تقصدها هل لازم نمضى شهود عليها ولا إمضاء المستلم كافية :?: :?:

ولكم جزيل الشكر

[Abo_Lina]

هو لو هتعمله توكيل يبقى لازم يكون فيه حتة التعامل مع المرور-او توكيل ادارة السيارة- دي علشان يقدر ينقل ملكية و يدفع مخلفات الخ

الورقة دي اسمها اقرار استلام سيارة و دي غير العقد

ولو عايز تريح دماغك من الفيلم ده روح الشهر العقاري و سجل و خلاص..وربنا يوفقك

[ramyfawzy]

نصيحة لوجه الله

انا انصح اي واحد يحب يبيع عربيته يبيعها بعقد مسجل وبلاش التوكيل لعدة اسباب :
اولا: اذا كانت رخصة العربية سارية و اشتريت انت عربية تانية وحبيت تنقلها باسمك هتدفع حاجة اسمها ضريبة ترفيهية وغالبا بتدفع ضريبة وتلت ، ده زائد انه في المرور ما بيعترفوش غير بعقد البيع المسجل في الشهر العقاري
وثانيا: لاقدر الله لو حصل اي حاجة بالعربية اللي انت بعتها اصلا هيجيبوك انت وحلني بقى لما تثبت ان انت بايعها والقصص دي
وثالثا: في ناس والعياذ بالله محترفين في تزوير التوكيلات يعني مثلا ممكن انت تبيع العربية لواحد وتكتب فيه انه مايجددش الرخصة بتاعتها لما تنتهي وتتفاجيء انه بيرخصها باسمك او باعها لواحد تاني وحطلو الحاجة دي في التوكيل بتاعو
الأمان احسن من وجع الدماغ حتى لو رسوم التسجيل غالية ، اشتري دماغك احسن

والسلام عليكم

اخوكم / رامي فوزي

[أبو_حمزة]

سؤال محيرنى

لو أنا اللى با اشترى بتوكيل
ايه يضمن ليا ان بعد ما اشترى المالك يعمل بدل فاقد رخصة و يبيعها لحد تانى
و ساعتها يسجل وانا اخد زنبة
حد عنده رد؟؟

[ihab]

انت معاك اصل الرخصة و معاك التوكيل و العربية نفسها
و لو حصل و طلع بدل فاقد بيبقى مكتوب على الرخصة بدل فاقد
و بعدين الاصل فى المنقول ان الحيازة سند الملكية و انت معاك الرخصة و العربية و التوكيل يبقى مفيش حد يقدر يكلمك

[ihab]

و خلى بالك طبعا من حتة اقرار الاستلام انك استلمت العربية من ساعته و تاريخه و مسئول عنها فيما بعد و ما قبل هذه الساعة و التاريخ انت غير مسئول عنه
و الجزئية دى امان ليك و للبائع

[KiNgMaX]

متشكر يا جماعة على ردودكم الغالية بس دلوقتى انا بعت فعلا وبتوكيل بس مكتبتش فى التوكيل حتة التعامل فى المرور
إحنا كتبنا فى التوكيل ( توكيل للبيع للنفس وللغير والتوكيل للغير ) فقط
وعملنا كمان عقد ابتدائى اللى بيتباع فى المكتبة اللى فيه ورقة الاستلام والمشترى مضى عليها ولكن بدون توثيق فى الشهر العقارى يعنى مجرد ملينا البيانات ومضينا انما التوثيق كان للتوكيل بس فهل احنا كده سليم ولا فى ضرر عليا وشكرآ

[ihab]

اقرار الاستلام ما بيتوثقش فى الشهر العقارى بس يكون بساعة و بتاريخ
بالنسبة للتوكيل فالعربية ممكن تتباع بكذا توكيل لغاية ما ينتهى ميعاد الرخصة و ساعتها لازم تتسجل و تتنقل ملكيتها