ايه حكاية مؤقتة القاهرة دي؟

[OlaOsman]

أكتر من مرة اليومين دول ألاقي عربيات ماشية عليها لوحة مكتوب عليها مؤقتة القاهرة.. معنى كده ان كل دول مش لاقيين لهم في المرور؟؟

يعني انا لو استلمت السيريون كمان أسبوع و لا حاجة هابقى انا كمان مؤقتة القاهرة؟

[vet mitcho]

اظن لان كل دول مستنيين النمر الجديدة
اكيد في المرور بقالهم فترة واقفين التعامل بالنمر القديمة وبيدو بدالها مؤقتا نمر مؤقتة لغاية ما الجديد ينزل
وفعلا امبارح شفت كذا عربية بالنمر الجديدة
يعني بعد فترة كل النمر المؤقتة دي هتبقى الستايل الجديد

[r0xer]

لا مش مؤقتة لإن اللوحات الجديدة نزلت..مؤقتة دي كانت قبل اللوحات الجديدة ما تنزل مكنش في لوحات فكانو بيحطولهم نمر مؤقتة.

يعني أتطمني.. ومبروك عليكي السيريون مقدماً.

[limo]

ده نمر نزلت الشهر الى فات علشان مفيش نمر فى المرور ملاكى او وقفوا الملاكى لحين نزول النمر الجديده
ايجارها فى اليوم جنيه
بتكون لمده شهر قابل للتجديد شهر اخر لغايه ما تستلمى النمر الجديده
وبستلمى بدل الرخصه تصريح مؤقت لمده شهر

[OlaOsman]

يعني أيه إيجارها؟ هي كمان بتتأجر؟

[MEDO_AHMED2]

لالا دى نمر عادية نزلت الشهر الى فات لان فى مرور فى اماكن معينة معندوش نمر فبيوزعو النمر دى لحين صدور النمر الجديدة وقريب مش هتكون موجودة

[جمال]

يعني أيه إيجارها؟ هي كمان بتتأجر؟

طبعا بتتأجر , وكل النمر بتتأجر
لو بصيتى فى بنود المبالغ المدفوعة للترخيص ( ده لو عرفتى تفهمى منها حاجة )
فيه بند كان زمان قيمته 20 ج عبارة عن ايجار نمر
يعنى النمر لاتباع انما تؤجر وكل النمر كده حتى الجديدة بس ايجارها 100 ج

[aif]

لالا دى نمر عادية نزلت الشهر الى فات لان فى مرور فى اماكن معينة معندوش نمر فبيوزعو النمر دى لحين صدور النمر الجديدة وقريب مش هتكون موجودة

مش الشهر اللي فات بس .. دي من زمااااااان.... من سنين يعني .... لكن الأيام الاخيرة زادت عشان ما كانش فيه نمر في المرور ... واعتقد ان ايجارها بيبقى في حدود 30جنية شهريا من المرور ... لو كانت متوفرة عندهم ... لكن يمكن يكون زاد ايجارها لأن معلوماتي قديمة شوية

[MEDO_AHMED2]

الله اعلم اسف لو معلوماتى غلط

[NaderNabil]

هي فعلا نزلت بكثرة خلال الشهر اللي فات و اللي قبله....بسبب عدم وجود نمر جديدة...فا بيدوا مؤقته لمده شهر أو اتنين لحين مجئ النمر التانية الجديدة....وطبعا النمر المؤقته دي الصاجة و مكتوب عليها بخط اليد

الغريبة بقي اني باشوف عربيات الاقي مكتوب عليها مؤقت مش مؤقتة ....حاولت أفهم ليه مذكر مش مؤنث ملقيتش أي سبب غير ان اللي بيكتب ملهوش فيه...

[جمال]

الغريبة بقي اني باشوف عربيات الاقي مكتوب عليها مؤقت مش مؤقتة ....حاولت أفهم ليه مذكر مش مؤنث ملقيتش أي سبب غير ان اللي بيكتب ملهوش فيه...

هى فعلا مؤقت مش مؤقته لان المقصود هو الترخيص ( ترخيص سير مؤقت )
وليس نمرة مؤقته

[Ahmad Allawy]

معلومة بس..
علي حد علمي ان لحد دلوقتي النمر الجديدة دي لم تطبق في القاهرة الا في مرور مدينة نصر بس..
مش كل المرور يعني.
حد يعرف معلومات تانية..؟؟

[جمال]

معلومة بس..
علي حد علمي ان لحد دلوقتي النمر الجديدة دي لم تطبق في القاهرة الا في مرور مدينة نصر بس..
مش كل المرور يعني.
حد يعرف معلومات تانية..؟؟

كلامك صح , هى دى المعلومة المتوفرة حاليا
ولكن سيتم التطبيق تباعا فى القاهرة و الجيزة , ثم الاسكندرية , ثم باقى المحافظات

[Ahmad Allawy]

ربنا ييسر ان شاء الله..
بس المهم.. هل اروح مخصوص اغير النمر.. ولا استني لما الرخصة تخلص و انا باجدد اغيرها..؟؟
و هادفع عليها كام..؟؟ انا سمعت ان في 100 جنيه,,
ايه الكلام..؟؟!!!

[NaderNabil]

هى فعلا مؤقت مش مؤقته لان المقصود هو الترخيص ( ترخيص سير مؤقت )
وليس نمرة مؤقته

طب ازاي نفس النمر دي بلاقيها مؤقتة مش مؤقت....!!!!! و كمان المؤنثة أكتر من المذكر

انا اللي مدايقني مش كون انها مذكر أو مؤنث....لكن التضارب اللي حاصل....كل واحد بيكتب اللي علي مزاجه...