إعـــــــلان

Collapse

.

,
See more
See less

إلغاء مخالفات المالك السابق - القصة الكاملة

Collapse
X
 
  • Filter
  • الوقت
  • Show
Clear All
new posts

  • إلغاء مخالفات المالك السابق - القصة الكاملة

    موضوع هام حصل معايا شخصيا واتبهدلت فيه لحد مخلصتو ... قولت اكتب اللي حصلي واكسب فيكو ثواب :)

    اغلب الناس بتشتري العربية بتوكيل من ابو 15 جنيه .. وليه الحق في البيع لنفسه وللغير وتوكيل الغير والتعامل مع المرور والالفاظ الظريفه اللي زي دي.
    طبعا لو كانت الرخصة سارية ولسه قدامها كتير على متنتهي .. يبقى التوكيل هوا الحل دائما للانجاز والتوفير.

    أنا اشتريت عربيتي من سنتين في 2011 وكان فيها سنتين رخصة ... طبعا عملت توكيل وقولت اوفر القرشين بتوع الضريبة والترخيص والعقد المسجل والكلام ده بعدين .. لسه بدري في الرخصة بقى.
    وبعد السنتين مقربو يخلصو ... عملت لنفسي عقد مسجل في الشهر العقاري وبيعت العربية لنفسي ومضيت بائع ومشتري بالتوكيل اللي معايا ... وبكده بقى معايا العقد المسجل (مهم جدا هحتاجو اوي في المخالفات)

    روحت على مرور الجيزة بين السريات ... فوجئت اني عليا 1335 جنيه مخالفات !!
    قولت ماشي ممكن اكون عملت المخالفات دي ...
    لما طبعلي تفاصيل المخالفات لقيت منهم مخالفة صغيرة من 2010 !!!!!!!!! والانكت بقى انها على اسم المالك اللي العربية بأسمه ... مع ان اللوحات كانت حاجه تانيه خاااالص ومرور الهرم مش الدقي كمان ... يعني من مكان تاني ونازله على الاسم بتاع المالك بتاعي.
    ولقيت مخالفة تانية ودي الكبيره بقى .. ب 1300 جنيه ... قبل ما اشتري العربية ب 5 شهور كاملين... مع ان اللي بايعلي جايبلي شهادة براءة ذمه مظبوطه ومختومة وكله تمام.

    أنا كان عندي استعداد استنفذ كل طاقتي وفلوس كمان .. بس مدفعهومش ... مش عشان هما مبلغ ..لا انا مبحبش اتقرطس في مليم.

    لما ساورني الشك ..ان الراجل اللي باعلي ده .. رش رشه جريئه او شرب حد شاي بالياسمين وطلعلو شهادة مفيهاش مخالفات عشان انا البسها ... دخلت لوكيل النيابة .. قاللي لا لا لا المخالفات بتتأخر سعات سنين على ماتنزل على السيستم بتاع الكومبيوتر ... دا غير ان حصل لخبطه ايام الثوره ومش عارف ايه ... فمتخافش مش هتدفع حاجه بس اعمل مخالفات مالك سابق ... وكل المخالفات هتتشال من عليك.
    قولت قشطه :)

    هحكي بالظبط والتفصيل ايه المطلوب عشان تلغي المخالفات دي وتطلع شهادة مخالفات فيها مخالفاتك انتا بس ... فيه طبعا مطبات صناعية ومشاكل ومشاوير قابلتني في الموضوع ده بس متشغلوش بالكو انا هحكي الخلاصه المفيده بس.

    ملاحظه:من الافضل طبعا انك تعمل الطلب ده من مرور الدراسة ... عشان بتاخد وقت اقل وانجز في المجهود ... خصوصا لو المخالفات تابعه لاكتر من ادارة مرور ... يعني لو عندك مخالفة من مرور الهرم ومخالفة من مرور الدقي نازلين على نفس اسم المالك ... بتاع الدقي هيشيل بتاعته بس ويقولك مليش في الباقي روحلوهم قدم طلب عندهم .. ولازم تروح الهرم تشيل بتاعتهم ... لكن في الدراسه بتشيل كله مره واحده.


    المستندات المطلوبة:
    1- صورة الرخصة
    2-صورة التوكيلات
    3-صورة العقد المسجل
    4-صورة شهادة المخالفات القديمة.
    5- بيان صرف لوحات ... في حالة وجود مخالفات على لوحات تانيه غير بتاعتك من مرور تاني.
    6- طلب مخالفات مالك سابق ... من عند المرور وطبعا الطلب بيتعمل بأسمك مش باسم صاحب العربية اللي في الرخصة.

    اللي بيحصل ان نيابة المرور بتشوف تاريخ التوكيل اللي بأسمك .. وتشوف تاريخ المخالفات .. اي مخالفة قبل التوكيل ده بتتشال لنك في الاخر عملت عقد مسجل بأسمك... دي اهم نقطه العقد المسجل وشهادة المخالفات القديمة ... اوعى حد يرمي شهادة المخالفات القديمه .... طبعا لو معاك عقد مسجل من تاريخ الشراء الموضوع بيبقى ابسط لان العربية رسمي بأسمك بس الرخصه هيا اللي مش بأسمك فبتتشال ... لكن لو معاك توكيل من سنه او سنتين مثلا ولسه عامل العقد المسجل امبارح ... ده معناه ان العربيه كل الفتره دي مكنتش بأسمك اصلا .... لكن في النيابه بيراعو ان مصر شغاله توكيلات بس اهم حاااااااااجه ان العقد المسجل يكون عليه نفس اسم اخر توكيل ساعت مشتريت و البائع جابلك شهادة المخالفات اللي انتا كده كده بتقدم منها صورة مع الطلب... لانك في الاخر اشتريت فعلا.

    لو هتعملو في ادارة المرور بتاعتك بتاخد من اسبوع ل 10 ايام عمل (لانهم بيقولو انها بتتبعت للدراسه بردو لرئيس النيابه الكلية بتاع القاهرة)
    لو هتعملو من مرور الدراسه بياخد حوالي 3 الى 5 ايام بالكتير.


    أرجو اني اكون افادتكم ..الموضوع مهم من وجهة نظري فحبيت اعرفكم ... اسف على الاطاله ... شكرا

  • #2
    بس بتاخد وقت كتير انا كان عندى نفس المشكله من كام يوم بس المبلغ كان 200 جنيه دفعتهم وخلاص علشان انجز فى الوقت
    [CENTER][SIZE=5][B][B][COLOR=black][SIZE=6][COLOR=Magenta][SIZE=7][COLOR=Indigo]اللهم ارزقنى بر والدى[/COLOR][/SIZE]
    [/COLOR][/SIZE]
    [COLOR=#0000ff] [/COLOR][/COLOR][/B][/B][/SIZE][SIGPIC][/SIGPIC]
    [SIZE=5][B][B][COLOR=black][COLOR=#0000ff]
    [/COLOR] [/COLOR][/B][/B][/SIZE][/CENTER]

    Comment


    • #3
      ربنا يكرمك و الله .. أنا حصل معايا الموضوع ده من 3 سنين .. و فعلا اللي اشتريت منه العربية كان محامي و أول ما دخل على بتوع النيابة أخدوه بالحضن و ادوه براءة الذمة و أنا كنت معاه و فرحت ان الموضوع خلص بسرعة و معرفش ان أنا هلبس بعد كده.

      بعدها بفترة رحت أنقل ملكية لقيت عليها 800 جنية مخالفات .. و كلها من قبل ما أشتري العربية بسنتين .. دخلت لوكيل النيابة .. اسمه محمد بدر .. كان في نيابة الزقازيق .. و كلمته بذوق و بالمنطق .. قلت له معنى ان حضرتك مديني ورقه ببراءة الذمة في تاريخ معين .. ان قبل التاريخ ده المفروض اني متحاسبش على المخالفات .. قال لي أصل المخالفات بتتأخر .. قلت له انا معنديش مشكلة ان المخالفات تتأخر اسبوع .. شهر .. انما سنتين كتير جدا .. اتنرفز و قال لي هو اخر مالك هو اللي بيدفع المخالفات .. قلت له ازاي يعني .. قال لي بقول لك ايه من الاخر انت اللي هتدفع المخالفات دي يعني انت اللي هتدفعها .. حسبي الله و نعم الوكيل.

      المهم كلمت مستشار كلم مدير وكيل النيابه ده و رحت تاني يوم دفعت 50 جنية بس.

      [CENTER][B]القران الكريم بجودة صوت عاليه جدا[/B]
      http://www.nilemotors.net/Nile/230790-a.html[/CENTER]

      Comment


      • #4
        المشاركة الأصلية كتبت بواسطة kar!m مشاهدة المشاركة
        ربنا يكرمك و الله .. أنا حصل معايا الموضوع ده من 3 سنين .. و فعلا اللي اشتريت منه العربية كان محامي و أول ما دخل على بتوع النيابة أخدوه بالحضن و ادوه براءة الذمة و أنا كنت معاه و فرحت ان الموضوع خلص بسرعة و معرفش ان أنا هلبس بعد كده.

        بعدها بفترة رحت أنقل ملكية لقيت عليها 800 جنية مخالفات .. و كلها من قبل ما أشتري العربية بسنتين .. دخلت لوكيل النيابة .. اسمه محمد بدر .. كان في نيابة الزقازيق .. و كلمته بذوق و بالمنطق .. قلت له معنى ان حضرتك مديني ورقه ببراءة الذمة في تاريخ معين .. ان قبل التاريخ ده المفروض اني متحاسبش على المخالفات .. قال لي أصل المخالفات بتتأخر .. قلت له انا معنديش مشكلة ان المخالفات تتأخر اسبوع .. شهر .. انما سنتين كتير جدا .. اتنرفز و قال لي هو اخر مالك هو اللي بيدفع المخالفات .. قلت له ازاي يعني .. قال لي بقول لك ايه من الاخر انت اللي هتدفع المخالفات دي يعني انت اللي هتدفعها .. حسبي الله و نعم الوكيل.

        المهم كلمت مستشار كلم مدير وكيل النيابه ده و رحت تاني يوم دفعت 50 جنية بس.

        طبعاً انت مش غلطان

        لكن فى بلدنا :
        لا للمنطق و العقل
        نعم للواسطه و الكوسة
        [SIGPIC][/SIGPIC]
        https://www.facebook.com/groups/SWIFTCLUBINEGYPT/

        Comment


        • #5
          انا اتبهدلت وطلع عين اهلي مع ناس تسوى ولا متسواش ... مش عشان الفلوس بس كانت كتير
          انا شايف واحد قال دفعتهم وخلاص .... انا لو كانو ماتو مكنتش هدفعهم ... الا طبعا لما استنفذ كل محاولاتي

          هيا كبرت في دماغي ومعايا الحق ... وكنت حالف مهدفعهم عشان انا ممكن اصرف ال 1300 جنيه مواصلات ومشواير ... بس مدفعش مليم متقرطس فيه من غلطة موظف ولا سيستم ولا وكيل نيابه ... ده قصدي

          والمفروض محدش يسيب حقه بعد كده على اد ميقدر طبعا :)

          اكيد فيه ناس كتييير مش بتدقق او مستعجله ... وبتدفع ... واكيد فيه اللي بيدفع الف و اتنين ... فيه ناس بالنسبالهم دي مش مبلغ يعني .... وكله في كرش الحكومه كدهو من غير اي حق

          دا غير العساكر والامناء اللي ماسك الدفتر واحيانا بياخدك مخالفه حقد وغل مش اكتر ... او بيتسلى وهوا واقف ... كل دا لازم ينتهي بقى
          كفااااااااااااايه عك يا حكومه احنا مش بنلاقي الفلوس في الشارع

          Comment


          • #6
            الحمدلله انك خلصت الموضوع
            واكيد انت دلوقتى فى قمه السعاده مش عشان 1300 عشان محدش عرف يقرطسك فى النظام الزباله ده
            انا حاسس بيك
            روح بقى عاوزينك تعشيهم عشوه جامده فى البيت ......خليهم هما كمان ينبسطوا
            Wael Kamel
            سبحان الله والحمدلله والله اكبر

            wael_kamel سابقا

            Comment

            Working...
            X