موقف غريب فى لجنة على الطريق!!

[SeiffoZ]

واحد صاحبى يا جماعة بيحكيلى ...
من حوالى إسبوع كده كان راجع بعربيته لبيته على 2 بليل كده ...
المهم بص شاف إن فى لجنة على الطريق ..
راح كالعادة مهدى ووقف لهم ..
المهم جه أمين شرطة و قاله (بصوت تنح):- الرخص .
صاحبى إدهاله و قال : إتفضل .
المهم الأمين فضل يبص فيهم كده و شكله كده إتبسط و قام دور وشه و قال بصوت عالى :- بتاعت والده يا سيادة اللواء.
فجأه ظهر من بين الظلام الدامس رجل فى العقد الخامس من العمر .. من أصحاب الكروش الكبيرة . مرتدى بالطو على طراز فيلم ماتركس يخبئ البدلة العسكرية و بما فيها الرتبة.
المهم اللواء ده جه و قال لصاحبى:العربية دى بتاعت مين؟؟؟!!
رد صاحبى و قال:- بتاعت بابايا ...
رد اللواء:- و سايقها ليه؟؟
صاحبى رد:- عادى يعنى واخدها فى مشوار ...و انا إبنه يعنى دى عربيتنا.
اللواء قال:- ورينى توكيل الإدارة بتاعك؟؟
صاحبى إتخض و قال: إيه توكيل الإدارة ده حضرتك؟؟؟
قاله:- ماينفعش تسوق عربية حد من غير مايعملك توكيل إدارة ... و دى من غيرها جريمة ... و غرامة ...
صاحبى قال:- أنا معرفش أى حاجة عن الموضوع ده ..
اللواء قال:- طيب كده هتأخذ الإجراءات القانونية .. و بص تانى فى الرخص .. و قال:- هعديهالك المرة دى .. سماح المرة دى ... إطلع ...
صاحبى مشى ...
بس حد يقوللى إيه موضوع توكيل الإدراة ده... يعنى معرفش أسوق عربية أهلى يعنى؟؟

[MoDyBeNz2008]

انا سمعت عنه قبل كدة كان اتعمل عليه موضوع قبل كدة هنا في المنتدى هحاول اجبهولك علشان تقراه

[civilpharaoh]

فعلا لازم تعمل توكيل ادارة في اي مكتب شهر عقاري وبيتعمل في خمس دقائق بالظبط وهي صيغة محفوظة عندهم

[wesam_salom]

ده عبط
ممكن تسوق اى عربيه بتاعت والدك او اخوك او اختك طالما نفس الاسم
التوكيل ده لة بأسم والدتك او مراتك لانك مش هتمشى بالقسيمه ولا بشهاده الميلاد
بس هما تلاقيهم كانوا شاربين حاجه
ولا اللوا ده مراته ضارباه قبل ما ينزل
وعاوز يتلكك فلما ملقاش سبب قال يعديك ويعملها بجميله
وصاحبك طبعا قعد يشكر الباشا

[mostafabakry]

كلام صحيح 100%
توكيل إدارة لقيادة السيارة و تمثيل مالكها امام وحدات المرور في انهاء اي امر خاص بالسيارة سواء كان والدك او اخوك او اي حد مش لازم قريبك
انا نفس المشكلة اكنت بتقابلني و فعلا والدي عملي توكيل ادارة في الشهر العقاري و ماشي بيه مع الرخصة

خلي بالك احيانا في ظابط بيغلس و يستعبط فيها و يقولك ما فيش حاجة اسمها توكيل ادارة لازم تأمين علي سائق بس بتعدي طالما انت سليم و مش عامل مخالفة

حاول تعمل التوكيل دا و اشتري راحتك

[3mr Farrag]

الموضوع ده لسه كان في دماغي....
لأن كذا مره حصلت معايا و مع صحابي....
و العربيه عندي بأسم والدتي...
يعني اخليها تعمل توكيل ليا و لي اختي و بالمره والدي علشان احيانا بياخدها :wacko:

دا ايه الهبل ده....و كمان عربيات قرايبي لو باخد حاجه منهم

هي الناس ديه هبله و لا هبله....
يعني في حد بيسرق عربيه بالرخصه بتاعتها!!!!!!!!!!!!!!

[mostafabakry]

بس الغريب في الموضوع سيادة الللواء دي
معقولة لواء حته واحدة في لجنة و الساعة 2 بالليل
كويس انه عدا من الناس دي احيانا بيكونوا نصابين و بيستغلوا الناس علي انهم لجنة مرور حقيقة و هما اصلا شلة حرامية

حصلت عندنا من فتره قريبة بس كانوا شوية امناء شرطة من المرور و طلعوا بعربية من المرور واشتغلوا من حوالي الساعة 1 بالليل لغاية الساعة 6 الصبح و ماخلوش عربية تعدي الا و تدفع مخالفات ردار و كان معاهم دفتر مخالفات و طبعا استغلوا حكاية المخالفات الفورية
لغاية ما عدي بالصدفة واحد شغال في المرور و كشفها و اتفضحوا و كانت مسخرة

[alfa_we]

لا يا جماعة التوكيل دا ضرورى
حصل موقف مشابه للموقف دا مع واحد صاحبى وكان واخد عربية ابوه ورخص العربية اتسحبت بسبب موضوع التوكيل دا
بس انا اعرف انهم بيسئلوا عليه فى الطرق السريعة بس
على فكرة هوا مش بيطول فى عمله و بحوالى 15 جنيه حاجة زى كدة

[M.Osama]

كلام مظبوط 100%

وبيسألو عليه دايما علي الطرق اللي بره البلد.. اللي لو حد سرق عربيه مثلا وجه يهرب بيها حيهرب علي طرق السفر

انما جوا البلد عادي

[MohaMed_Refaat]

دة شغل هبل واستعباط حتى لو دة صحيح لانى مش حقعد لما استلف اى عربية من اى حد يعملى توكيل ادارة مش شرط حتى عربية حد من العيلة عندنا ممكن تكون عربية واحد صاحبى او زميلى اجيبة يعملى توكيل دة شغل قلة ادب واستعباد للناس

دة انا اعرف عندنا فى طنطا فى ناس بتمشى من غير رخص اساسا ومرة ابن واحد من التقال عمل حادثة فى شارع مهم فى طنطا وخبط واحد ومكنش معاة رخص ولا عمللوة حاجة وسابوة طبعا مهو بابى بتاعة عمل اتصالاتة ولا كانة عمل حاجة وناس تمشى قانونى وجى يقولك توكيل ادارة عـــــــــــــــــجــــــــاااااااايــــــــــــــ ـــــــــــــــــــــب

[Rafraf]

بلد متخلفه! و هتفضل كدا طول عمرها

بدل ما ياكلوا الغلابا و يحسنوا المستشفيات راحين يتنططوا على الرخص

ياعم اسم ابويا و لا امى فى الرخصة!! هو فى حد سارق عربية بيقف فى لجنة و كمان يطلع رخص!! و لو سارقها هيسرق عربية ابوه؟؟

والله بلد متخلفه و انا طول عمرى ماشى بـ عربية والديتى و عمرى ما اتمسكت لحد دلوئت!!

بصراحة حاجة مستفزة جدا يعنى خلاص خلصوا مشاكل البلد فاضل الرخص عشان نبقى احسن دولة فى العالم!

[SeiffoZ]

الموضوع ده طلع بجد يعنى !!!!
طب فيها مشكلة لو أخذت بطاقة مامتى و صورتها (مكتوب فيها إسم الزوج) ..
و هو الشهر العقارى ده فين؟؟

[M.Osman]

على فكرة انا كدا دماغى اتقلبت ...!!!

انا الوالد عامل الفيرنا بأسمه مع انى اللى بسوقها على طووول .. و بعدين ؟
شكلى هعمل التوكيل ده و اريح نفسي ...

بس دا بأسم ابويا يا ناس و رخصة السواقة فيها اسمى يعنى مش محتاجة عالم صواريخ عشان يحس ان العربية مش مسروقة !!!!

تــــــــــــــــــــــــخلف

[theking2690]

انا والدى علشان يريح دماغى من الموضوع ده كاتب عربيتى بأسمى بس لأنى لسه مكملتش 21 سنه فمكتوب فى الرخصه اسمى + بولاية والده

[D . a .\ AYMAN]

الموضوع ده صحيح تماما ... ممنوع قانونا قيادة أي سيارة ليست مملوكة من راكبها إلا بتوكيل خاص رسمي بذلك من مالكها المسجل أسمه في رخصة قيادتها

لكن بصراحة انا عمري ماشفتهم بيغلسوا على الإبن اللى العربية بإسم أبوه أو الأخ لأن الإسم بيكون واحد ... دي أول مرة أشوف واحد بيغلس في القصة دي