سؤال بالنسبة لترخيص السيارات الجديدة

[mohamed_berlitz]

السلام عليكم ورحمة اللة وبركاتة

يا جماعة انا انشاء اللة حستلم عربيتى خلال ايام وكنت سمعت من بعض الزملاء ان فى مشكلة عند الترخيص
انا تابع لمرور مدينة نصر وبصراحة خايف لما اروح ارخص يركبولى نمر قديمة او نمر معوجة يخلى منظر العربية وحش مع العلم ان العربية زيرو
واللة مش عارف اعمل اية وهل اى حد جرب الحكاية دية
ياريت يا جماعة اللى جرب يقولى اعمل اية لحسن انا الموضوع دة قلقنى ومخلينى ابص لاى عربية جديدة مع نمرها وبأمانة بلاقى فضايح

وشكرا لكل من سوف يهتم

[Nader]

اولاً الف مبروك مقدماً على العربية.

ثانياً انا مسمعتش عن مشاكل لوح عن قريب في مرور مدينة نصر خاصاً، بس لو عاوز بمر جديدة يبقى مش هتاخدها غير بالفلوس للاسف "رشوة يعني" حتى العاملين مش بيطلعوا نمر جديدة لما يجي يعرض عليك النمر غير لو شاف في ايدك فلوس :shock:

[zorooo1986]

--------------------------------------------------------------------------------


انا مرخص من مرور مدينة نصر بص انا بردو كنت قلقان وانت بترخص هتلقى موظف قاعد على المكتب هيقولك تعالى اخلصك كل حاجة ممكن تغمزة بعشريناية ولا حاجة يجبلك نمرة زيرو لكن انا روحت لامين الشرطة الى فى الشباك قولتلة مليش بركة غيرك وكدة وادينة 10 ج ادانى نمرة لسة جاية من المصنع اية لوكس
وربنا معاك
طارق

[sokasoon]

• الف مبرووووووووك لاسيارة الجديدة
  
  انا لما رخصت خدت النمر واحدة كانت سليمة وكويسة
  
  والتانية كانت معجة مش ومظبطة فخدتهم الاتنين
  
  لخطاط ظبطهم ودهنهم وركبتهم وبعدين النمر
  
  مش بتزود ولا بتنقص من ثمن العربية

[sokasoon]

حذف للتكرار

[hazem_khidr]

هيا بتبقي حظوظ علي فكره و يمكن مفيش غير نمر قديمه بس ممكن تعمل زي ما نادر قالك كده و تدفع عشرين جنيه ولا حاجه و تخليه يشوفلك نمر مميزه شويه مش لازم تكون جديده و لو شكلها وحش تاخدها عند السمكري يستعدلها و لو فيها اخرام اقفلها بمعجون حديد و رشها من اول و جديد و حتبقي كويسه ان شاء الله.
انا بصراحه ببص علي الرقم المميز مش اللوحات الجديده.

[sokasoon]

• يا حازم انت مش هتشترى خط فودافون
  
  النمر اهم حاجة ماتكونش سهلة باردة اختار رقم رزل
  
  ملعبك كده ماحدش يعرف يلقطو بسرعه احسن

[hazem_khidr]

و الله يا وليد كتير بيقولو كده بس انا ببقي مبسوط لما يبقي رقم عربيتي سهل.و لعلمك بيعرفو يلقطو اي رقم سهل او ملعبك الا بقي لو طامس رقم منهم بس دا يبقي حرام

[Ashraf A.Kader]

استاذ محمد0
اولا الف مبروك علي العربية الجديدة
ثانيا انا سمعت عن موضوع نقص النمر في مدينة نصر من اكثر من صديق ولكن الموضوع اتحل
ثالثا انا لسه مرخص عربيتي الثلاثاء الماضي(منذ يومين) بس في شبرا واعطوني نمرتين (زبالة) ولكن ارسلتهم للخطاط ودفعت 10 جنيه عملي لوحتين زي الفل ولما ركبتهم للعربية كانوا تحفة فلا داعي للقلق من هذا الموضوع
ومبروك مرة ثانية

[mohamed_berlitz]

بجد يا جماعة المنتدى دة احسن اكتشاف ليا فى حياتى لان فى المنتدى اكتشفت انى امتلك العديد من الاخوات اللى بيخافوا فعلا على بعضهم وبينصحوا بعض وبيطمنوا بعض وبيرسموا الابتسامة والسعادة على اى فرد يطلب المساعدة
يارب يخليكوا ليا فعلا ويزيد من خيرات هذا المنتدى الجميل

[ahmed1981]

بجد يا جماعة المنتدى دة احسن اكتشاف ليا فى حياتى لان فى المنتدى اكتشفت انى امتلك العديد من الاخوات اللى بيخافوا فعلا على بعضهم وبينصحوا بعض وبيطمنوا بعض وبيرسموا الابتسامة والسعادة على اى فرد يطلب المساعدة
يارب يخليكوا ليا فعلا ويزيد من خيرات هذا المنتدى الجميل

والجميل إن كل الأفادات دي لله
مفيش مصلحة تقريبا منعرفش بعض تقريبا
كل ده لله فقط
ربنا يبارك في هذا المنتدى

[Nader]

يا حازم انت مش هتشترى خط فودافون

النمر اهم حاجة ماتكونش سهلة باردة اختار رقم رزل

ملعبك كده ماحدش يعرف يلقطو بسرعه احسن

ايوة انا عملت كدة، بعدين انت بتتصرف يا عم حازم ، احنا غلابة.

[Nader]

ممكن تعمل زي ما نادر قالك كده و تدفع عشرين جنيه ولا حاجه و تخليه يشوفلك نمر مميزه شويه

شايلني زنب الراجل بقى

[hazem_khidr]

ممكن تعمل زي ما نادر قالك كده و تدفع عشرين جنيه ولا حاجه و تخليه يشوفلك نمر مميزه شويه



شايلني زنب الراجل بقى

هو انا كنت حقوله كده بس انت رديت الاول ف انت تشيل الذنب بقي مش حشيله انا :lol: :lol:

[Abdallah]

فعلا النمر المميزة بتبقى ظريفة ولكن بتجيب وجع الدماغ وفى حاجة اكتشتفها ان العسكرى لما بيكون دفترة ناقص بيفتكر اى رقم ويكمل باقى المخالفات الناقصة عليه وطبعا مفيش اسهل من الرقم المميز يفتكرة والكلام دة عن تجربة شخصية ...
فى حاجة اسمها تصنيع النمر, بمعنى انك بتعمل طلب تصنيع للنمر دى وبتدفع باين 30 جنيه او حاجة وطبعا الكلام دة لو نمرك قديمة ومتبهدلة وبيسلموك نمر بنفس رقمك جديدة تماما.