اخيرا خدت الرخصة .. ولكن ؟

[Miss_Pharma]

الحمد لله بعد صراع مرير وقاسي ..
خدت رخصة القيادة الكويتية ..
ولكني مش عارفة اسوق فعلا .. يعني اخري اسوق في حتة فاضية .. معنديش الجرأة انزل اسوق في الشارع وامشي بسرعة اكتر من 40 ..

اعمل ايه ؟
ياريت تفيدوني بجد ايه الخطوات اللي اعملها عشان اتعود اسوق في الشوارع لوحدي ..
لاني بجد طلعت جبانة جدا ..

[dr.nemo]

لو تعرفي تسوقي في غير اوقات الذروة
او حتى في طريق فاضي حبتين لحد ميتكون لديك ثقة بالنفس يبقى كويس قوي
لو مازلت خايفة ممكن تخلي واحدة زميلتك قديمة شوية في السواقة
تبقى راكبه معاكي لحد ما تبقي احسن علشان الخبرة مهمة جدا

معلش السواقة بتبقى صعبة شوية في الاول لحد ماتخدي على ابعاد العربية بعد كده حتبقى تعود

بس متنسيش ان السواقة ممارسة يعني لازم تسوقي كتير علشان تبقى احسن
خليك ديما في اليمين ومتحاوليش التخطي غير لما تبقى متحكمة كويس في العربية وابعادها
يعني لو العربية اللي قدامك وقفت ... تقفي وتكشفي الطريق الاول لحد ميفضى خالص تتخطيها
متشغليش نفس بالمرايات وتنسي الطريق اللي قدامك.....
بالليل او الصبح بدري او ايام الاجازات لفي بالعربية قدر المستطاع
ومتطلعيش الطريق السريع دلوقتي خالص
ولازم تجمدي قلبك شوية امال لو كنت بتسوقي في مصر دلوقتي كنت عملتي ايه والخوف ده لانك لسه مش متحكمة كويس في العربية
ومتستعجليش على السرعة في المرحلة دي خالص
ربنا معاكي وحيوفقك ان شاء الله

[wesam_salom]

اهم حاجه

جمدى قلبك واعرفى ان محدش بيتعلم من غير ما يسوق

وطبعا لازم تبدأى فى اوقات فاضيه يعنى الفجر او الصبح بدرى

واحده واحده ان شاء الله هتلاقى الموضوع سهل

وممكن كمان تقدرى تسوقى فى مصر بس ده لسه بدرى عليه
لان اللى بيتعلم السواقه فى الخليج بيكتشف ان مصر فى حاله حرب على الطريق

[gomha]

السلام عليكى أختى العزيزة من واقع خبرتى فى السواقة لمدة 15 سنة سواء فى مصر او السعودية
1-اجعلى دائما عينك قبل ايديك يعنى تشوفى (تطالعى )الاول ثم تحركى ايديك

2-ألتزمى فى السرعة ولا تجعلى الاخريين يجعلوكى عصبية وتتصرفى بسرعة وذلك يودى الى الخطأ

3-فى التحرك الامامى عينك للامام اجعلى مسافة بينك وبين السيارة
الامامية

4-فى التحرك الخلفى عين للخلف وعين تشوف الجزء الامامى والدخول
شمال او يمين استخدمى المرايا الجانبية وضعى الاشارة قبل فترة مناسبة حتى يحذرالسائق الخلفى انصحك بوضع استكر على باب الشنطة بوجود اطفال فى السيارة حتى لايقم الاخريين بالضغط عليكى لزيادة السرعة

5-لاتلبسى جزمة عالية او تكون قاعدة ناعمة يفضل الحذاء الرياضى حتى تتعودى على السواقة

6-يفضل ان تكون السيارة الاولى لكى تكون اتوماتك ودة حتى تنتبهى
للطريق وتكون حجم صغير اقترح الكورلا لنعومة فى القيادة

7-عند الملفات خفضى السرعة حتى لاتسيح السيارة منك وخصوصا فى الامطار اليومين دول واذا ساحت السيارة لاتستخدمى الفرامل بقوة لان ذلك سوف يؤدى لاقدر الله الى ان تنقلب السيارة

8-اعتبرى كل الاخريين لايسمعوا ولا يشوفوا ولا يفهموا

9-عند التوقف فى الاشارة لاتتوقفى مرة واحدة لان ذلك سوف يؤدى ان لحادثة من الخلف بل كل اشارة تقابلك قومى بتهدئة السرعة بفترة طويلة عشان السائق الخلفى يهدى سرعتة كمان

10-اعرفى ان الاشارة ليست حائط اسمنت لذلك عند التحرك من التوقف تطالعى يمين ويسار ذى ما تكونى تمشى على رجلك

واتمنى لكى التوفيق

[Samir Elshahawy]

عام سعيد لكل اعضاء نايل موتورز الكرام

و ألف مبروك لكي سيدتي علي الرخصة

1- قودي سيارتك بحرص و انتباه لكل من حولك
2- لاتسرعي و التزمي بالجانب الايمن من الطريق
3- أستخدمي اشارات الانتظار طوال الوقت لتنبيه السيارات التي خلفك
4- أتركي مسافة مناسبة بينك و بين السيارة التي أمامك
5- قبل الدخول في أي ملف أو تغيير الاتجاه ألقي نظرة سريعة علي المرايات الجانبية للتأكد من خلو الطريق من أي سيارة قادمة خلفك
6- أستخدمي الأشارات الضوئية قبل الملفات و عند تخطي السيارات التي أمامك
7- لا تحاولي تخطي أي سيارة امامك في المرحلة الحالية و أن أضطرتك الظروف لذلك فتاكدي من خلو الطريق أمامك و خلفك
8- حاولي قدر المستطاع ان تبتعدي عن الشوارع المزدحمة و القيادة ليلا في تلك الفترة حتي تستوعبي أبعاد سيارتك و تكتسبي خبرة الطريق
9- تذكري ان القيادة فن و ذوق و اخلاق فلا تتعصبي أو تسمحي لأحد ان يعصبك اثناء القيادة و اعطي كل تركيزك للطريق و لاتنشغلي عنه بأي شئ اخر مثل التليفون أو الحديث مع أحد
10- في البداية أستعيني بمن له خبرة في القيادة كي يكون بجانبك لتستفيدي من توجيهاته و نصائحه و كي ينبهك الي أخطائك أولا بأول حتي تكتسبي ثقة في نفسك و في سيارتك

و ربنا يوفقك و يبعد عنك و عنا جميعا شر الطريق

[Miss_Pharma]

شكرا لكل النصائح ..
والله استفدت منها كتير ..

من الحاجات الاساسية اللي بتضايقني ابعاد العربية ..
يعني اوقات كتير باخدها بالبركة وادوس بنزين سنة سنة .. عدت يبقى خير وبركة , سمعت صوت حكة في الرصيف .. بروح راجعة وعادلة نفسي ..
مبقدرش فعلا اقدر الابعاد ولا في ركنة ولا في دوران ..

كمان موضوع ال u turn لما بيكون عريض وواخد عربيتين جنب بعض ..
مثلا لو هلف u- turn شمال وواقفة فيه مستنية الشارع يفضى وجاتلي عربية جنبي " يميني " .. يعني كده انا اللي جوه وهاخد اللفة على الضيق والعربية اللي جنبي هي اللي بره وهتاخد اللفة على الواسع .. ساعتها بقى انا منهارة واعصابي بايظة ..
وبحس ان العربية اللي على يميني دي هتاكلني وهي بتلف ..

هو فعلا الموضوع عايز ممارسة ..
ربنا يسهل ان شاء الله ..