الحقوا الجمعية المصرية للتأمين التعاونى

[mohamed_berlitz]

السلام عليكم ورحمة الله وبركاتة

انا ياجماعة زى ما انتوا عارفين ان شاء الله حستلم عربية قريب
وبقالى اسبوعين بسأل على موضوع التأمين دة وسألت وياريتنى ماسألت روحت الجمعية المصرية للتأمين التعاونى اللى مشتركة معاها المنتدى وفعلا لقيتها جمعة نضيفة وشكلها امين وكل حاجة والناس قالولى هناك ان النسبة 1.7 من قيمة العربية قولتلهم ممكن 1.6 قالولى ماشى وقالولى ان الجمعية استثمارية وبقالها 8 سنين لحد كدة حلو قوى قوى قوى
المهم ركبت الاسانسير وانا فى غاية السعادة لقيت واحد ماسك ملف كدة قولت اسألة انت مشترك مع الجمعية اللى فوق دية وانفجرت الصاعقة
قالى انهم نصابين قولتلوا اية اللى حصل بس . قالى انا مشترك معاهم والعربية حصلها حادثة كلفتة فى التوكيل 10000 جنية قولتلوا طيب الجمعية طبعا اديتلك التعويض . قالى ادتلى 945 جنية راح شطح فيهم طبعا وقالهم ازاى .قالولوا انت صلحت حاجات زيادة قالهم دية الحادثة قالولوا لا المقايسة بتقول التقدير مش كدة وان تقدير المقايسة 945 جنية فقط ولو عايز تشتكى عندك الهيئة العامة للرقابة على التأمينات روح اشتكى .
المهم قالى ان الجمعية بتظبط فعلا وبتعوض بس لحد 700 -1000 بالكتيير لكن زيادة عن كدة انسى حيقولوك مقايسة ونيلا . يا الا تروح لمركز خدمة تباعهم وطبعا هما مظبطين معاهم اللى هو اردىء تصليح واردىء خامات اللى هو لذق وخلاص . لكا تقولى توكيل وتروح تصلح وطبعا التوكيل بيقطم الوسط انننننسسسسسسسسسسى

اما بالنسبة للشرق للتأمين فطبعا هى حكومة بس اعرف واحد بيتعامل معاهم من 30 سنة وماشاء الله ممكن يبقى فى روتين بس التعويض بيتصرفلك صح ولو حتى من التوكيل

عموما يا جماعة انا احترت خالص ومش عارف اعمل اية
انا مستنى ردودكم وشكرا

[mohamed_berlitz]

اية يا جماعة محدش مهتم ولا اية

اية يا جماعة محدش رد يعنى ولا علق انتوا مذهولين ولا اية
عموما انا سألت ابو غالى قالى انة هو بيأمن على العربية بنسبة 2.5% والغريب هنا انة قالى انة بيتعامل مع الدلتا للتأمين ومع الجمعية المصرية للتأمين التعاونى فروحت حاكيتلة الحكاية بتاعتى اللى قولتهالكوا قبل كدة وقالى فعلا دة بيحصل مع اى شركة تأمين بس شركات التأمين بتكش دايما من التجمعات يعنى ابو غالى مثلا بيتعامل بالالاف العربيات فهما بيخافوا انهم يقصروا معاهم علشان ممكن التعاقد يتلغى ودة طبعا حيخسر الجمعية كتيير
وقالى لكن انت لو رايح لوحدك ممكن يعملولك مقايسات بقى تقطم ظهر العميل يعنى الحاجة اللى تتصلح ب 10000 جنية تتصلح 900 جنية زى ماحصل لاخينا
عموما بما ان المنتدى لسا ما اثبتش وجودة للجمعية يعنى من الاخر اشتراكات المنتدى فى التأمين اكيد اقل بكتييييييييييييييييييييير من ابو غالى اللى بيتعامل بالالافات فأنا قررت انى ادفع 1% زيادة عن المنتدى واتعامل مع ابو غالى واهو التعامل حيبقى معاهم علطول وهما اللى حيصلحوهالى فى توكيل ابو غالى لو حصل حاجة لقدر اللة لغاية لما المنتدى انشاء اللة يثبت وجودة بالاتحاد واننا نبقى كتيييير ونخلى اى شركة تأمين تخاف انها تزعل اى عميل علشان ماتخسرش تجمع المنتدى اللى حيكون جامد انشاء اللة فى المستقبل القرييب
وشكرا

[amrrashed]

كنت عاوز اسأل سؤال هوا كام واحد فى المنتدى مشترك مع الجمعية المصرية للتأمين ؟

1) عمرو راشد

مين تانى ؟ برجاء الرد فالموضوع هام جدا

[boody2]

بص حضرتك

انا معايا لانسر 2007 و مامن عليها في شركة التامين التابعة لبنك التمويل المصري السعودي و عربيتي اتخبطت من ورا و الكصدام اتكسر و كلمت الاستاذ شريف الي هو نا مامن معاه و قالي وديها التوكيل و انا حبعت مندوب يصورها و يعمل مقايسة و يبدءوا تصليح فورا ز و بالفعل اتصلحت و غيروا الاكصدام الخلفي و دهنوا الامامي كمان و بعد كدة اتكلفت العربية 2000 جنيه و بعتلهم الفاتورة و فعلا كان معايا شيك بالمبلغ في خلال اسوعين. و هما كويسين في معاملتهم قوي . و لو عايز نمرة الاستاذ شريف ممكن اكتبهالك هنا و ممكن كمان تجرب تامين كونتكت هو صحيح عالي بس انا سمعت انه مضمون قوي و ربنا ما يحويجناش للتامين يا رب

[معاذ الشرباصى]

كونتكت فعلا هو احسن بس اغلى تأمين فى مصر

[mohamed_berlitz]

2 بس اللى ردوا

فعلا يا جماعة الموضوع مهم جدا وفى 100 واحد قراءوا الموضوع ومفيش غير 2 بس اللى كلموا ممكن اعرف لية ؟؟؟؟؟؟؟؟؟؟؟؟؟؟؟؟؟؟؟؟؟؟

[fady]

انا مامن في الجمعيه بس لسه مجربتهمش في اي حاجه

[memo_hefnawy]

محمد باشا الكلام إللى بتقولوا ده خطير و لو ثبت حقيقته فسيكون لنا وقفه مع تلك الجمعية

إحنا هانتأكد و نتقصى حقيقة الأمر و من بعد ذلك نقرر بناء على ما سيكون عليه الموقف

[mada121977]

انا كمان مامن تبع الجمعيه دى .... ربنا يستر :| :|

[مهندس محمد صلاح]

ياشباب .. اللى عاوز يخدم فى الموضوع ده لازم تكون اجاباته وملاحظاته بالنسبة لشركات التأمين واقعية ومفيدة لصالح الزملاء .. العملية مش كلام وخلاص بدون تجارب .. يعنى مثلا انا لما اقارن بين ثلاث او اربع شركات تامين فلازم احط امامى بعض النقاط الهامه اللى حاقارن على اساسها .. منها :
1- حادفع كام نسبة مئوية من تمن العربية كتأمين
2- حادفعه مرة واحدة ولا اقساط شهرية
3- لو عملت حادثة وده مربط الفرس .. والعربية متكومه جنب الرصيف فالتصرف حيكون ازاى .. حانقلها انا لحد التوكيل او ورشة الاصلاح وعلى حسابى الخاص ولا التامين حيقوم بالمهمة دى كلها ويبعت لى ونش ولما يبعت لى ونش حيبقى على حساب مين انا ولا التامين
4- شركة التامين بعد الاصلاح حتدفعنى حاجة ولا كله عليها
5- مين حيحاسب التوكيل او ورشة الاصلاح انا ولا التامين قبل ما استلم عربيتى

وهكذا ياشباب لازم تبقى المقارنة مجديه مش كل ما نسأل واحد عن الشركة الفلانيه يقوم يقول اه والله دول ناس محترمين قوى او بصراحة هى ممتازة .. انا مالى ومال انهم محترمين ولا لا انا بهمنى المصلحة اللى تفيدنى الناس كلهم محترمين والكلام يبقى عملى ومن واقع التجارب وده الغرض من المنتدى انك تلاقى اجابة وافية على سؤالك
انا مثلا قبل ما اامن عملت مقارن بين ثلاثة شركات


1- غبور
2- الجمعية المصرية للتامين التعاونى
3- كونتاكت

1- غبور ( التوكيل ) : المبلغ اللازم دفعه 3% من ثمن السيارة - يتم دفعه مرة واحدة عند التعاقد - فى حالة حدوث حادثة لا قدر الله تقوم سيادتك بمسئولية نقل السيارة الى التوكيل اما بالاسكندرية او ابو رواش ايهما اقرب الى مكان الحادث كفانا واياكم شر الحوادث - يقوم التوكيل بالاصلاح ولا تتكلف سيادتك ولا مليم وعيبهم انهم بيتأخروا جدا لتسليمك العربية والمدة ممكن تعدى الشهرين حسب الخسائر فى السيارة وحجمها.
العنوان : اما ابو رواش الكيلو 28 مصر اسكندرية الصحراوى / تليفون 025390760 او 27 شارع السلطان حسين - الاسكندرية / تليفون 034815551

2- الجمعية المصرية للتأمين التعاونى : المبلغ اللازم دفعه 2% من ثمن السيارة - يتم دفعه مرة واحدة عند التعاقد - فى حالة حدوث حادثة لاقدر الله تقوم سيادتك بمسئولية نقل السيارة الى المكان او الورش التى سيتم الاتفاق معك عليها وسيتكفلوا هما المصاريف كلها ولن تتكلف سيادتك ولا مليم - وفى حالة تصميمك على الاصلاح بالتوكيل تقوم سيادتك بارسال السيارة الى التوكيل على حسابك وتتابعها حضرتك لحد ما تخلص وبعدين تحاسبهم انت من جيبك وتذهب للتامين يديك شيك بالمبلغ بناء على الفاتورة اللى معاك.
العنوان : 115 شارع العباسية / تليفون 026748689 اوالاسكندرية 9 شارع احمد عرابى بجوار جامعة سنجور بالمنشية / تليفون 0103649933

3- كونتاكت : المبلغ اللازم دفعه 4 وربع % من ثمن السيارة للنظام البرتقالى و4 ونص % من ثمن السيارة للنظام الازرق - يتم دفعه على اتناشر قسط شهرى - فى حالة حدوث حادثة لاقدر الله تقوم سيادتك بالاتصال بهم يرسلوا اليك ونش ياخد العربية التوكيل مباشرة ويتم الاصلاح ولا تتكلف سيادتك ولا مليم بالاضافة الى انهم يقوموا بارسال سيارة ليموزين لنقلك من مكان الحادث انت واللى معاك من مرافقين الى اى مكان انت عاوزه على حسابهم - ده بالنسبة للنظام ابرتقالى - يزيد علية ارسال سيارة تبقى تحت امرك ثلاثة ايام لحد ما تدبر حالك ده فى النظام الازرق برده على حسابهم - يعنى الفرق بين البرتقالى والازرق هو عربية ثلاثة ايام تبقى تحت امرك - اضف الى ذلك انك فى حالة الاعطال وليس الحوادث تتصل بيهم يقوموا يبعتوا لك ونش يودى العربية للورشة اللى سيادتك عاوزها والاصلاح على حسابك طبعا وعلى فكرة انا عملت البرتقالى وده مش بمزاجى لكنهم اشطرتوا عليا البرتقالى لان ترخيصى اسكندرية ومش معقول كل ما حتعطل حيبعتوا لك ونش يودى لك العربية ورشة سيادتك طبعا .. دى كانت وجهة نظرهم
العنوان : 1 شارع العزيز عثمان - الزمالك / تليفون 0100774335 الاستاذ اسلام

انا لست منحازا الى اى شركة معينة ولا تهمنى اى شركة فيهم لكن تهمنى انك تلاقى اجابة وافيه ومفيدة تستفبد منها لما تسأل
وربنا يوفق الجميع وانا دائما تحت امر الجميع

[ahmed1981]

Re: 2 بس اللى ردوا

فعلا يا جماعة الموضوع مهم جدا وفى 100 واحد قراءوا الموضوع ومفيش غير 2 بس اللى كلموا ممكن اعرف لية ؟؟؟؟؟؟؟؟؟؟؟؟؟؟؟؟؟؟؟؟؟؟

السبب إن الي بيقرأ المشكلة ممكن يلاقي نفسه معندوش فكرة عن الموضوع
فبيمتنع عن الإفتاء بدون علم حتى لا يضلل أحد
وهذه ميزة وليست عيب
وقلة الردود نتيجة إن الناس الي عاملة تأمين عددها قليل
وإن شاء الله الي عاملين تأمين هيفيدوك

[MohabSaeed]

انا من الناس الى قريت الموضوع ... وللاسف معنديش معلومات اقدر افيد حد بيها ... لكن حبيت اسجل مشاركتى ... لاستوضاح مشكلة الجمعية التعاونية ...؟؟ علاشان انا كنت نصحت ناس يشتركو فيها .. هو لسة محدش اشترك ولا حاجة .. الحمد لله .. بس حابب اعرف مدى صحة الكلام .. هل فعلا مش بيدو تعويض كامل ؟؟؟

[Nile Heart]

الحقيقه انا كنت على وشك التعاقد مع الجمعيه من حوالى شهر . ماحدث انى ذهبت لهم وقاموا بعمل معاينه للسياره ثم فوجئت بمندوبهم يتصل بى بعد يومين ويطلب مقابلتى لآن "الوثيقه جاهزه!!" وهو ماكان غريبآ بالنسبه لى لآنه لم يحاول قبلها اخبارى بقيمة الوثيقه (قيمة السياره التقديريه) أو المبلغ المطلوب. المهم اننى قابلته وفوجئت ان الورق مجهز للتوقيع والدفع (كده خبط لزق)! والآغرب ان السياره تم تقديرها ب 90 الف (يعنى اعلى من الحقيقه ب 13 الف على الآقل) وكان مطلوب منى ان ادفع 1450 جنيه وقتها!

لما سألت المندوب عن القيمه دى وهل سيتم فعلا ردها اذا حطمت العربيه بعد يومين فقاللى "لآ.. ساعتها بيبقى فلا مثمن هو اللى بيحدد قيمة العربيه!!!" يعنى بيعترف بالمغالاه فى القيمه التقديريه عشان يعلوا التأمين! فى الأخر طلبت مهله لقراءة العقد وعرضه على المحامى الخاص بى.

المفاجأه انى قبل ما أديه للمحامى قريته بنفسى ولقيت بند واضح وصريح فى صفحه 2 كما يلى:

ُثانيآ: الفصل الثانى - المسوليه المدنيه:
الحد القصى لمسؤلية الجمعيه عن اية مطالبه أو جملة مطالبات نشأت عن حادث واحد 10000 جنيه مصرى ويجوز زيادة الحد الآقصى للمسؤليه مقابل قسط اضافى


مش فاهم والله!! يعنى هو فيه حد اقصى للتعويض! و10 الف بس!! يعنى ادفع 1450 عشان حد أقصى 10 الف!؟
ده نسبه التامين على كده 14% مش 2%!!

ادى الجمعيه!

[وائل عطية]

ياريت نراجع حسابتنا تاني بخصوص موضوع التأمين دا !!!!!!!!!!!!!!!!!!!

[eng/muhamad]

لو الكلام ده صحيح دى تبقى كارثه