السير عكس الاتجاه... ظاهرة!!

[goodwave]

السلام عليكم

"قدر الله وما شاء فعل"

يوم الخميس كنت نازل رايح عشاء عمل تبع الشركة بتاعتي وانا طالع من الشارع الجانبي الى الشارع الرئيسي (الطريق الدولي المؤدي الى الساحل الشمالي) كالعادة بصيت يمين وشمال وكان الطريق فاضي فعديت وش العربية وتحركت ببطء وانا انظر ناحية الشمال في اتجاة السيارات القادمة لزيادة الامان. وبعد ما اطمنت ووش العربية طلع الشارع بدور عيني الناحية التانية لقيت اللي جاي في المعاكس بسرعة وبيقطع الطريق!!! في لمح البصر كسرت الدريكسيون على الاخر لتفدي الاصطدام بوش العربية ولكنة خبطني بالاكصدام الخلفي في الناحية الشمال قدام!

الخسائر
1-وش فنوس امامي شمال
2- فانوس اشارة امامي كامل
3-شفة الرفرف اتنت
4-شفة الكبوت اتنت
5- الاكصدام اتحك والبوية طلعت

وهو لم يخدش حتى! راكب بيجو 7 راكب ملاكي وهي عربية مصفحة قطع غيارها تلاتة مليم!

نزلنا وبصيت عندي وهو بص عنده ملقاش حاجة قالي طب الحمد للة وعاوز يمشي! اتجنيت وجريت علية قلتلة رايح فين انت مش شايف عملت اية؟ قالي بكل بجاحة ما تزعقليش انت الي مكنتش باصص! نظرا لانه في اواخر الستينات فتمتالكت نفسي وقلت لة طب طالما كدة اقف نعمل محضر والناس حواليا اتلمت وقالتله انت المفروض ماتتكلمش لانك غلطان! المهم بردة بيركب العربية! وقفت قدامة قلتلة رايح فين؟ قالي حركن علشان الطريق. وفجاة داس بنزين وكان حيدوسني انا وبعض المارة وكسر الدريكسيون ودخل شارع جاببي مكسر وهرب باقصى سرعة!

طبعا علشان اجري وراة يبقى حدغدغ عربيتي ولو مسكتوه اكيد حموته من الضرب!

الناس اخدوا نمرتة ورحت عملتلة محضر وحشوف حيحصل اية!!!

من ساعة ماجبت العربية وانا حاسس ان ضغطي ارتفع وبقيت عصبي وبعد ما بخلص مشوار طويل باصب عرق وبكون تعبان مش من الحر بس من شدة الاعصاب والتوتر! الناش ماشية ببرود كانة بيقول دة معاة فرامل فلازم يقف! السير عكس الاتجاة اصبح ظاهرة قاتاة وخاصة في الشوارع الرئيسية ((الطريق الدولي المؤدي الى الساحل الشمالي)! الامن المروري غاب تماما في الاسكندرية ومنك لله يا عادل يا لبيب وحسبي اللة ونعم الوكيل!

[modux]

انا لو منك مكنتش سينتو يركب عربيتو ابدا !!!


بس حصل خير

[bishoo33]

معلش يا صاحبى حسبى الله ونعم الوكيل فى سواقيين الأجرة لأنهم مش حاسيين اد ايه الواحد تعب لحد ما ركب هذه الركوبه و أيضا لأن العقاب مش على قد الجرم
مستقبلا فى مثل هذه الحالات أول ما تنزل وقبل ما تشوف ايه الى حصل لسيارتك أفعل الأتى
1- اذهب واسحب المفتاح من سيارته وحاول أن لا تعطيه له والا ارميه على طول ايدك فى أى مكان بعيد بحيث يختفى تماما
2- لا تنرفز نفسك أذهب للأطمئنان على سيارتك دون الألتفات له
3- لو حاول أن يمد ايده عليك هدده بأنه لو فعل ذلك سيلاقى مالا يحمد عقباه بلهجه شديدة
4-قم بالأتصال بالشرطه لو حسيت أن الوضع حيخرج من ايدك
5- لا تسمح لأى أحد بأن يغير من شكل الحادث حتى تصل الشرطة
6- أهم شىء أن تحافظ على شده أعصابك ولا تتنرفز لأن فى شده الأعصاب ثقه ومكسب فى النهايه وفى النرفزه ضعف وخساره فى النهايه
7- لو لديك القدره على أخذ حقك وواثق من ذللك 1000 فى الميه لا تتردد قبل أن تحضر الشرطة والا أنتظر الشرطة
ولا يريكم ويرينا الله مثل هذه المواقف التى تؤثر نفسيا فى الواحد لفترة ليست بالقصيرة

[goodwave]

شكرا على النصائح ! وربنا يكفينا ويكفيكم شر الحوادث!

العربية كانت ملاكي واللي سايق راجا كبير اكبر من والدي ولم اتوقع منة التصرف بهذة الدناءة والحقارة!

[Nile Heart]

معلش ممكن تقهنى! هو كان ماشى عكسى على الطريق الساحلى الدولى!!!!!!!!!!!!!!

على ايه حال الشخص اللى ماشى عكسى بالمنظر ده يبقى معروف من غير ماتكلمه انه حيوان متنكر وكان لازم تنزل تكلمه وفى ايدك كوريك او شومه زى بتاعت كريم منير! طبعآ ماكانش مفروض تسيبه يركب عربيته اصلا لآن ده معناه تغيير فى وضعها عن الحادث! انت لو الدوريه كانت جت وعملتله محضر عكس الأتجاه كان هايلبس مخالفه 500 جنيه وساعتها كان هايدفعلك منهم حبه عشان يخلص

المهم قدر الله وما شاء فعل وتأكد ان فى كل مصيبه يبتليك بها الله بيبقى ليها ثواب أجل أو عاجل أو تكفير عن ذنب.
الأهم حمد لله على سلامتك وتخيل كده لو كان تاخر كام ثانيه وكنت انت طلعت بوش العربيه كله كانت المصيبه هتبقى اشد عشر مرات.

[hazem_khidr]

قدر الله و ما شاء فعل و الحمد لله انها جات علي قد كده.
المفروض انك كنت تاخد المفتاح من عربيته و كمان مفتاح عربيته سهل علي الشمال بس ما تنساش انت مفتاح عربيتك
و بعدين تتكلم بكل ثقه و صوت جامد و مش خايق و تزعق فيه طالما بالبجاحه دي و اتصل بالنجده و بهدله ما تسكتش عليه.
ان شاء الله في القسم حيجبوه طالما عملت محضر و ساعتها ينول جزاءه بقي

[Hossam_Hassan]

ان شاء الله في القسم حيجبوه طالما عملت محضر و ساعتها ينول جزاءه بقي

الأقسام مش فاضية للحاجات دى، فيه حاجات أهم و بالمناسبة دى حبيت أشارككم احصائية جامدة عملتها امبارح، تخيلوا منطقة المقطم اللى فيها حوالى نص مليون بنى أدم فيها كام رجل شرطة؟ 3 قاعدين فى النقطة و مفيش حتى عربية دورية تلف الهو اللى ليه موجود و خلى بقى اللى يتسرق يتسرق و اللى تتخطف تتخطف و سلملى على التشريفة و ربنا يسترها

[Abdallah]

لا حول ولا قوة الا بالله, سايبة.

[M_Abdallah]

متزعلش نفسك. وحصل خير.وخليك متابع شوف المحضر هيوصل لأيه.





________________
محمد عبدالله

[mada121977]

حسبى الله و نعم الوكيل , فداك يا باشا , و الله الواحد بيلاقى اشكال من النوع ده كتير و بيبقى مش عارف يعمل اييه معاهم علشان مافيش لا ضمير و لا اخلاق و لا دين و لا ذوق و تاكد من حاجه مهمه جدا و هى انك اكيد اكيد فى مصر بلد العجايب :x :x :x

[معاذ الشرباصى]

قدر الله و ما شاء فعل

ربنا يعوض عليك

كان فى مرة حادثة مميتة على اتوستراد المعادى بسبب تاكسى ماشى فى الاتجاه العكسى بسرعة عالية

و كان النتيجة التاكسة اتدمر, و عربية نقل اتقلبت, و غيرها خبطت فى عربية تانية و كذا واحد مات

يعنى الناس اللى معندهاش اى مبالاة دى, بتعمل كوارث

الحمد لله انها جت على قد كده, بس لو لا قدر الله حصل معاك كده تانى, قبل اما تنزل من عربيتك اقفل عليه بحيث ميقدرش يخرج خالص, و خد مفتاح عربيته

[aboalm]

عارف كنت وطيت على الارض بسرعه جبت طوبه كسرت له اى زجاج و هو لسه بيجرى

[goodwave]

والله قلت لنفسي كان لازم اوطي على طوبة واحدفة بيها ولو وقف حضربة ولو جري يبقى انا اصلح وهو يصلح! بس انا كنت مزهول من تصرفة لانة زي ما قلت راجل كبير ومعاة شخص عاجز في العربية!

انا قررت اجيب شومة او ماسورة واخليها معايا في العربية علشان الحيوانات اللي زي كدة بس انا إنسان عصبي بطبعي وعندي تهور اعمى عندما افقد اعصابي فوالله خايف اضرب واحد بيها اموته!!!!!!!!!!!!بس ممكن استخدمها في تكسير عربيتة :twisted:

[Islam_galal]

ربنا يسلم طريقك و لا تدع الشيطان يعرف طريقك
انا حاقولك حادثة حصلت لي من سنتين او ثلاثة يمكن تخفف عنك
انا مرة في شارع الهانوفيل كنت ماشي بسكسكة العظيمة (127) و الطريق كان لا يصلح لمرور سيارتين و كان ورائي سيارة 405 راكبها شاب بتاع 16 سنة و قاعد يحرق و يكبس ، طب يا عم اروحلك فين و الطريق مكسر و فيه رملة
و بعدين بستر ربنا شوفت طفلين (واحد تقريبا 8 سنين و و احد 4 سنين) و الولد الاكبر بتمنظر علي اخوه و راح معاقبه و عدي الشارع لوحده و فضل اخوه الـ4سنين بيعيط
انا حسيت بمشكلة (كل ده في ثواني) و حطيت رجلي علي الفرامل علشان اللي ورايا يشوف نور الفرامل لأنه الباشا روش و سايب مسافة تقريبا 0
و كما توقعت فجأة الطفل قرر يعدي الشارع و انا رحت واقف علي الفرامل و مع التراب العربيه اتزحلقت زيادة و الباشا ورايا خبط فيا و زقني كمان زيادة
المهم الباشا الصغير امامي مكنتش شايفة بس طلع اتخض و فضل و اقف امام السيارة و عشان قصير مقدرتش اشوفه
و مرت لحظه كـأنها سنة و جه راجل و شال الطفل من أمام السيارة و قاللي سليم متخافش
الباشا بيتاع ال 504 هرب و كان حيخبط الناس اللي اتلمت
وواحد قاللي انا لقطت النمرة دة عيل و لازم اهله يتربوا
بس عارف ساعتها كنت بقول الحمد لله و مش عايز حاجة من حد المهم ان مفيش بني ادم اتأذي
و للمصادفه و انا ماشي شفت الباشا بتاع ال 504 واقف في شارع جانبي و بيبص علي الخسائر عنده (الفانوس الامامي و الاشارة) و تقريبا بيقول "حاقول ايه لبابي)
الحمد لله عدد خلقه و زنه عرشه و مداد كلماته

[goodwave]

الحمد لله يا استاذ اسلام وكله إلا البني ادمين! ربنا يكفينا جميعا شر الحوادث ويسلم لنا طريقنا!

بصراحة خايف يكون السبب اني كنت مستعجل ونسيت نسيت اقول الادعية اللي متعود اقولها قبل ما اسوق!؟ :roll:

1- بسم الله الرحمن الرحيم - سبحان الذي سخر لنا هذا وما كنا له مقرنين وإنا إلى ربنا لمنقلبون.
2- بسم الله توكلت على الله ولا حول ولا قوة إلا بالله. اللهم إني أعوذ بك من أن أضل (بفتح الالف وكسر الضاض) او أضل (بضم الالف وفتح الضاض) واعوذ بك من ان أذل (بفتح الالف وكسر الذال)او أذل(بضم الالف وفتح الذال) واعوذ بك من ان اظلم (بفتح الالف وتسكين الظاء) او أظلم(بضم الالف وتسكين الظاء) وا عوذ بك من أن اجهل او يجهل علي. يستحب عند الخروج من البيت).

3- اللهم احفظني من بين يدي وعن يميني وعن شمالي ومن خلفي ومن امامي ومن فوقي واعوذ بعظمتك أن أغتال (بضم الألف وتسكين الغين) من تحتي.