قانون المرور الجديد .. من اجلى واجلك ..

[Terrible_DaRsH]

من شوية لسه خلصانة حلقة من برنامج البيت بيتك ..
وكانوا مستضيفين صحفى كبير ومعاه اللواء مساعد وزير الداخلية ...
واتكلموا عن قانون المرور وكل شيء ..
اول حاجة جابوها تقرير من الجيزة عن المخالفات اللى تم رصدها عن تشديد الامن ..
والله العظيم الناس بتستهبل فعلا ..
واحد ماشي عكس وبيحلف بالله ان ماخدش باله وواحدة بتتكلم فى الموبايل وبتقول انها متعرفش انه ممنوع وييجى 2000 واحد مش رابطين الحزام وكله بيحلف انه ميعرفش حاجة عن قانون المرور..
فعلا شعب مبيجيش غير بال (***)..
واتكلموا على ان التاكسيهات الجديدة اللى هتترخص هتنزل بعداد ديجيتال علشان محدش يلعب فيها و هتكون الاجرة ارخص من تاكسي العاصمة واى سواق تاكسي يمتنع عن التوصيل تاخد رقمه وتتصل ب ( 630 تقريبا ) وتبلغ عنه ...
حاجة كمان .. مشكلة الصف التانى ..
جابوا ناس من الشارع وسالوهم ليه بتركنوا صف تانى وكده ..
فكل الناس اجابت ان الشركات والبنوك اللى بيشتغلوا فيها مفيهاش جراجات ومفيش جراجات عمومية قريبة فبيضطروا يركنوا صف تانى .
راح اللواء قايل ان كل الشركات والبنوك دول ماخدوش تصريحات بجراجات من هيئة المرور عند البناء وان المشكلة دى مشكلة المحافظ والمحافظة و كل المبانى الجديدة لازم يكون فيها جراجات عمومية سواء كانت مطاعم او محلات كبيرة او مولات او بنوك او او او او او...
واتكلموا عن الرادارات الجديدة وان كل مكان هيبقي فيه ردارات ..
وجددوا اشارتين فى الجيزة وصوروا العربيات اللى بتكسر الاشارات و كانوا جايبين واحد كسر الاشارة وبيسالوه ليه كسرها فحلف انه مخدش باله !!!
وكمان موضوع الشنطة والمثلث ده لمصلحة المواطنين من الدرجة الاولى .. تخيل انك ماشي فى طريق سفر ومرة واحدة حد رمى عليك خلاك عملت حادثة لا قدر الله وم مفيش حد يساعدك ساعتها ..على الاقل هيبقي معاك شنطة اسعافات . والواحد ساعات العربية بتعطل منه فى اى مكان فالمثلث لا بد منه برده ...
فى حكاية تانية وهى الميكروباصات ...
كل السواقين اشتكوا من ان مفيش موقف لهم فى مناطق كتير جدااااااا و ده طبعا طلع من اختصاص المحافظة ورئيس الحى والمرور ملهاش دعوة بالحكاية دى ..
قصر الكلام التزم بالقوانين هتبقي فى السليم ..

[Osama_soliman]

القانون كقانون فى مجمله كويس

بس المشكلة فى التطبيييييييييييييييييييييييييييق

[mada121977]

ماهو سياده اللواء ده كل ماالغرامات تكتر نسبته فيها بتكتر ..لانه بياخد نسبه على المخالفات دى .. طيب وسيادته مادام مهتم اوى بتطبيق القانون مطبقوش ليه على عربيات الضباط ووكلاء النيابه اللى ماشيه بالفاميه والزينون ومن غير نمر طول النهار والليل ولا القانونن يطبق على الغلابه بس .. لسه جريده المصريون النهارده كاتبه خبر عن صحفى واعلامى مشهور (بدون ذكر الاسم ) اتمسك ماشى عكس والمفروض انه يتحبس بس طبعا عمل اتصالاته ودفع غرامه بس

[mclarenfi]

ماهو سياده اللواء ده كل ماالغرامات تكتر نسبته فيها بتكتر ..لانه بياخد نسبه على المخالفات دى ..

خد عندك دى كمان
انا ساكن فى شارع جانبى من شارع الهرم ،،(بين فيصل و الهرم)
جوم يا سيدى كتبو يفتى من ناحية فيصل ممنوع الدخول - جميل و هايل -
طبعا الشعب اعتاد ان النوع ده من اليفت مرفوع من الخدمة, زى اشارة المرور اللى بتبقى حمرا و الناس تتخانق معاك انت واقف ليه بدام مفيش عسكرى ياخد النمر ، المهم سيبك نرجع لموضوعنا

شوف نصاحة المرور بقوا يقفو فى مكانين
1- نصف الشارع
2- عند الخروج من ناحية الهرم
ليه سعادتك، علشان يحصلو المخالفة اللى ب 1000 و مش عرف كام جنيه و يبهدلوا شوية مواطنين محترمين فى القسم .
طيب ما توقفو امين على اول الشارع و خلاص و كده مفيش حد ممكن يضر او اكتبو يافتة زى اشارة البطل اللى جنب BTM ان الى حيمشى عكس حيدفع مخالفة و يجر على القسم
ده حرام فعلا هيا الناس معاها كام الف جنيه دلوقتى علشان تتدفعهم للمرور.
و ليه تدفع اللى خارج من الشارع طب افرض هوه مش من المنطقة و جاى من شارع جانبي طالع ناحية الهرم و ماتنيلش شاف اليافطة اللى فى اول الشارع من ناحية فيصل ،
انت عارف يا مؤمن بيلمو كام يوميا من شارع زى ده مش اققل من 100,000 جم الغربية ان حنا مش شافيين اى تطور غير فى الاشارتين اللى قال عليهم صاحبنا ، كمان و اللهى العساكر و الامناء معندهمش اى وعى .
انا كنت ماشى فى وسط و الاقى عسكرى موقف الناس و الاشارة خضرا اول ما تقفل يمشيهم و اللهى حصلت اكتر من عشر مرات.
يا جماعه احنا علشان نطبق قانون مرور جديد لازم يكون فيه توعية كاملة لكل الناس ، ابسط حاجة ابعت جواب لكل اللى عندهم عربيات و اعرفهم ليهم ايه و عليهم
و ماتقوليش ازاى ده ممكن يحصل لانه سهل و مش مكلف ، التكلفة ممكن تكون فى حدود 5 جنيه للعربية الواحده و يحملها يا سيدى عليا و ادفعها اول ما اجدد الرخصة ،
مش بعد شهرين و الا ثلاثة اققول اللى يمشى عكس يدفع الف جنية و يتبهدل ، اذا كان القائمين على القانون مش عارفين يطبقوه الناس حتعرف .

[mo7a_mo7a]

والله يظهر اننا فعلا بقينا مبنجيش بالزوق
لعل وعسي القانون ده يصلح الحال بشرط يتطبق علي الكل احنا وهم كمان

وامشي عدل يحتار امين الشرطة فيك

[ahmed elsherif]

كنت مع صاحبي امبارح علي طريق المنصوره دمياط وقفنا في لجنه والعربيه مفهاش اي حاجه الظابط مش لاقي حاجه يقولها بيقوله انا شايفك لسه رابط الحزام دلوقتي وعندك لحام في الاكصدام وفي الاخر قالوا خلاص وجب مع الناس ال موجوده طلعلله30 جنيه ومشينا والله بلد كوسه كلها

[ahm3d ham>ed]

بس هما شدين اكتر على الناس الى معاهاش رخصة
وبقت حبس بدون غرامة