الرخصة ومرور عبود

[sasatony]

السلام عليكم عودة حميدة بعد فترة غير وجيزة بسبب وقوع المنتدي
المهم
انا الحمدلله معايا رخصة سواقة بس اخويا مش معاه رخصة
المهم احنا من شبرا وروحنا عشان نطلع رخصة ليه
نزلنا في اليوم ده الساعة 8الصبح(احنا حاليا في الهرم) وصلنا المرور الساعة 9ونص جبنا الورق وخلصناه ومكنش ناقص غير ان اخويا يختبر المهم قاعدين في الساحة من الساعة10لحد الساعة 11الاربع مستنين اللجنة الي هتختبر الناس وكان طابور طويل من العربيات المهم جت اللجنة وحطت الاقماع وبدء الاختبار والاختبار سهل جدااا زي الي انا اختبرته في الجيش بالظبط المهم اخويا اختبر وطلع الرخصة وكنا قلقانين من اختبار الاشارات طلع من حظنا الحلو ان الممتحنين بتوع الصبح ملهمش اختبار اشارات لكن بتوع بعد الضهر ليهم اختبار اشارات
المهم كنا فوق في الشباك الموظفة كانت بتلكك وكانت عاوز شهادة التخرج واخويا يقولها البطاقة مكتوب فيها محاسب وكارنيه الشغل مكتوب فيه محاسب يعني هبقي دبلوم تجارة او مش مخلص والشغل كاتبي كده وخلاص الخلاصة انها خدت 10جنيه في جيبها وكلو كان بيدفعلها عشان يخلص
المهم جينا بقي للعذاب بجد وهو التصوير قعندنا حوالي ساعة لحد مااخويا اتصور وطلع في كوسة يعني الي عارف حد يتصور الاول وهكذا المهم ان هو اتصور وقعنا نص ساعة لحد مااستلم الرخصة
الخلاصة ان الاختبار سهل ومش محتاج واسطة لكن العاملين هناك محتاجين واسطة او ضرب بالنار فيهم عشان نخلص من الهم ده
ودي كانت تجربتنا مع مرور عبود

[want_better]

مبروك الرخصة
وياريت الناس فعلا تسيبها من وهم أن لازم تروح مع واسطة علشان تتطلع رخصة
الواحد يتوكل على الله ثم يحاكي الاختبار أكتر من مرة في أي مكان قبل مايروح ومش لازم اقماع ممكن يحط أي حاجة مكانها (وحد صاحبي كان بيحط اكياس القمامة - أنا اسف - )
المهم ان فعلا الفرق بين أبو واسطة وأبو من غير الوقت
والحمد لله على كل حال

[sasatony]

مبروك الرخصة
وياريت الناس فعلا تسيبها من وهم أن لازم تروح مع واسطة علشان تتطلع رخصة
الواحد يتوكل على الله ثم يحاكي الاختبار أكتر من مرة في أي مكان قبل مايروح ومش لازم اقماع ممكن يحط أي حاجة مكانها (وحد صاحبي كان بيحط اكياس القمامة - أنا اسف - )
المهم ان فعلا الفرق بين أبو واسطة وأبو من غير الوقت
والحمد لله على كل حال

كلامك صح وانا كنت بقنع اخويا اننا نروح ونسيبها علي الله بس كنت قلقان شوية بس الحمدلله ربنا كرمنا وطلعت الرخصة من غير مساعدة

[PRO-DRIVE]

تقريبا نفس اللي حصل معايا هناك :) بس انا قعدت ساعتين عشان اتصور :(

[أشرف فتحى]

طب يا مصطفى لما انت جى شبرا مش كنت تقول عشان نعمل معاك الواجب؟!!!!
ياراجل دحنا فيرناويه زى بعض وانا اساسا ساكن قدام المرور يعنى كنت بدل الانتظار تيجى تشرب عندى شاى على مييجى عليك الدور
عموما مبروك لاخوك على الرخصه.
وبأكد على كلامك ان مرور عبود من اسهل ادارات المرور فى اصدار رخصه القياده ومش محتاج اى واسطه وبالنسبه للموظفين بتوع المرور معروفين فى كل مكان ان للاسف معظمهم بيمشى بالجنيه
يعنى طلع الورقه ام عشره تخلص على طول

[sasatony]

طب يا مصطفى لما انت جى شبرا مش كنت تقول عشان نعمل معاك الواجب؟!!!!
ياراجل دحنا فيرناويه زى بعض وانا اساسا ساكن قدام المرور يعنى كنت بدل الانتظار تيجى تشرب عندى شاى على مييجى عليك الدور
عموما مبروك لاخوك على الرخصه.
وبأكد على كلامك ان مرور عبود من اسهل ادارات المرور فى اصدار رخصه القياده ومش محتاج اى واسطه وبالنسبه للموظفين بتوع المرور معروفين فى كل مكان ان للاسف معظمهم بيمشى بالجنيه
يعنى طلع الورقه ام عشره تخلص على طول

حبيب قلبي ياغالي
انا اساسا من شبرا وعلي طول هناك انا ساكن في شارع الترعة قدام الجراج شارع محمود حلمي ده الشارع بتاعنا بجد مش هزار
وانا بنزل شبرا علي طول ممكن نظبط سوا يوم
وممكن تكون انت سمعت عن عمي
انا عمي اسمه علي توني لو تعرفه يعني
واحلي سلام للشبراوية

[mo7a_mo7a]

وكنا قلقانين من اختبار الاشارات طلع من حظنا الحلو ان الممتحنين بتوع الصبح ملهمش اختبار اشارات لكن بتوع بعد الضهر ليهم اختبار اشارات

ازاي يعني؟

علي اساس ان اللي بيطلعوا رخص الصبح مش محتاجين الاشارات!!!


لك الله يا مصر
لك الله يا مصر
لك الله يا مصر

[أشرف فتحى]

ازاي يعني؟

علي اساس ان اللي بيطلعوا رخص الصبح مش محتاجين الاشارات!!!


لك الله يا مصر
لك الله يا مصر
لك الله يا مصر

اولا اذيك يا دكتور
والله العظيم جيت على بالى اول ما الموقع اشتغل
بالنسبه لإمتحان الاشارات
مرور شبرا مرور متميز مفيهوش ولا امتحان اشارات ولا كمبيوتر
يعنى انا لما روحت امتحن مكانش معايا عربيه ورحت متأخر فكانوا خلصوا الاشارات فجيت مستأذن الظابط انى امتحن قياده وبعدين ابقى امتحن اشارات
قام قاللى بص بما اننا فى رمضان مش هانمتحنك اشارات يلا يا عم هه
وللأسف معرفتش اتصرف فى عربيه
قمت رحت تانى يوم وقلت خلاص خلى عندك ذوق وامتحن اشارات (وواثق قوى من نفسى) وبالفعل امتحنت وكان الامتحان عباره عن لوحه فى مكتب الظابط وسألنى على علامتين صعبين جدا
ممنوع استخدام اله التنبيه
ممنوع الانتظار
ايه رايك بقى؟

[PRO-DRIVE]

ازاي يعني؟

علي اساس ان اللي بيطلعوا رخص الصبح مش محتاجين الاشارات!!!


لك الله يا مصر
لك الله يا مصر
لك الله يا مصر

هو اللي انا فهته يوم ما كنت هناك انا الراجل اللي بيمتحن اشارات مبيجيش بدري تقريبا

فا لما الدنيا بتتزحم بيقوموا ممشيين الناس !! مع اني كنت رايح مذاكر :@

[أشرف فتحى]

حبيب قلبي ياغالي
انا اساسا من شبرا وعلي طول هناك انا ساكن في شارع الترعة قدام الجراج شارع محمود حلمي ده الشارع بتاعنا بجد مش هزار
وانا بنزل شبرا علي طول ممكن نظبط سوا يوم
وممكن تكون انت سمعت عن عمي
انا عمي اسمه علي توني لو تعرفه يعني
واحلي سلام للشبراوية

خلاص وانا مستنيك!

[AhMeD EzZ]

الف مبروك يا باشا الرخصة لاخوك
و مش كنت تقول انك رايح مرور عبود دول كلهم حبايبي من اول تامر بدوي رئيس الوحدة كلها
و بعدين دة الشبراوية طلعو كتير في المنتدي

[Karim_Mohy]

يا مرحب بالشبراوية وبالزائرين تنوروا شبرا000فعلا مرور عبود مش صعب بس اللي يخنق العطلة اللي علي الفاضي000و برضو تحس هناك وانت بتمتحن بالحالة المزاجية اللي عليها الظابط او الفني سواء في الاشارات او السواقة000وبعدين يا ساساتوني اللي بتحكي عليه من وقت يعتبر انجاز000اومال تعمل ايه لو رحت في الزحمة000بس عموما الف مبروك علي الرخصة

[sasatony]

الف مبروك يا باشا الرخصة لاخوك
و مش كنت تقول انك رايح مرور عبود دول كلهم حبايبي من اول تامر بدوي رئيس الوحدة كلها
و بعدين دة الشبراوية طلعو كتير في المنتدي

المرة الجايةبقي ياباشا بعد 10سنين وعليك خير

اما بخصوص شبرا فاالشبراوية كتير جدا فعلا سواء في المنتدي او في اي مكان انا في الهرم والمنطقة بتاعتنا اغلبها من شبرا فبحس اني مش خرجت من شبرا خالص
وقريب احنا نعمل حدود لشبرا ونكتب جمهورية شبرا العظمي

[sasatony]

يا مرحب بالشبراوية وبالزائرين تنوروا شبرا000فعلا مرور عبود مش صعب بس اللي يخنق العطلة اللي علي الفاضي000و برضو تحس هناك وانت بتمتحن بالحالة المزاجية اللي عليها الظابط او الفني سواء في الاشارات او السواقة000وبعدين يا ساساتوني اللي بتحكي عليه من وقت يعتبر انجاز000اومال تعمل ايه لو رحت في الزحمة000بس عموما الف مبروك علي الرخصة

من نحية المزاج فدي حقيقة فعلا هناك العالم بتتعامل بمزاجها مش حسب قوانين ولوائح(اغلب المصالح الحكومية في مصر كده)
وبعدين انا حسيت بالوقت انه كتير عشان انا مطلع رخصتي من مرور الجيش فمكنش فيه عطلة ولا اي حاجة نهائي
تقريبا عملت كل حاجة في ساعة واحدة بس مش اكتر والله

[shekoz]

انا من شبرا و فعلا يوم مروحت اعمل الرخصه فمرور عبود جيت امتحن اشارات لقيتهم بيقولوا كلو ناجح اشارات و كلو ينزل يمتحن تحت .. و لما نزلت امتحن تحت بجد شفت العجب و الغريب ان اكتر واحد خد تاجيل كان اسبوع بس!! .. انا كان معايا واسطه بس بجد انا ندمان انى روحت بواسطه لانى يعتبر كنت احسن واحد بالنسبه للناس اللى كانت بتمتحن ساعتها و من غير وسايط اكيد كنت هعدى ...
و أحلى سلام لشباب شبرا