ما هى خطوات نقل الملكية؟؟؟؟

[HASSANSG]

انا مشترى عربية 127 موديل 85 وللأسف ماشى بـــ 3 تواكيل فكنت عاوز اعرف خطوات نقل الملكية مع العلم ان العربية تابعة لمرور الأميرية(اللى انا معرفش هى فين) وان انا ساكن فى شبرا الخيمة يعنى تبع مرور القليوبية وتاريخ الفحص 2011؟
وسؤال تانى معلش هل فيه مشكلة انى ماشى بـــ 3 تواكيل؟

[kh_talaat]

شوف يا معلم

خطوات نقل الملكية


أولا : هتروح المرور التابع له المالك السابق ( الأميرية ودة الصراحه معرفش مكانه بس اللي يسأل ميتوهش) وتجيب الآتي :-

1- شهادة مخالفات للسياره
2- شهادة اثبات ان العربية تصنيع محلي دة علشان تستفيد بالتخفيض الضريبي على الإنتاج المحلي
3- شهادة بيانات ودي هتيجبها في حاله واحده ان الرخصه تكون منتهيه


ثانيا : هتروح على المرور اللي انت تابع له وتاخد معاك كل الأوراق السابقة ورخصه العربية والتوكيلات وتطلع على الشهر العقاري اللي في المرور وتقدم الأوراق وتنقل ملكية العربية ليك


وتنزل تعمل فحص للسياره ( وطبعا يبقى معاك طفايه الحريق ) وهيفك اللوحات القديمة ويديهالك

ثالثا : هتروح على شباك تجديد الرخص وتقدم الآتي :-

1- شهادة مخالفات السيارة
2- شهادة بيانات ( في حاله واحده ان الرخصه تكون منتهيه)
3- عقد الملكية
4- رخصه السيارة
5- اللوحات القديمة

وتدفع الضريبة والتأمين وتستلم الرخصه الجديدة ومبروك عليك مقدما


صحيح كثرة التوكيلات عادي مش بيفرق في حاجه متقلقش منه

[M.Osama]

التوكيلات عادي بس لازم تطلع الشهر العقاري الاول تعمل عقد بيع مسجل عشان تقدر تتعامل مع المرور

[hic]

الف شكر وجزاك الله خير

[HASSANSG]

طيب تنصحنى انقل ملكية واعمل الكلام دة دلوقتى ولا اعملة عند الفحص؟
انا قدامى لسه سنتين وشوية على الفحص
وهل لو نقلت ملكية دلوقتى التأمين والضريبة هايروحو عليه ولا ايه؟

[kh_talaat]

طيب تنصحنى انقل ملكية واعمل الكلام دة دلوقتى ولا اعملة عند الفحص؟
انا قدامى لسه سنتين وشوية على الفحص
وهل لو نقلت ملكية دلوقتى التأمين والضريبة هايروحو عليه ولا ايه؟

سيدي الفاضل الأفضل ان تنتظر لغايه آخر شهر قبل انتهاء الرخصه عشان متعملش شهادة البيانات ودي بتكلف حوالي 70 جنية

وعادي لو عملت نقل ملكيه مش هتفرق يعني بدل ما هتبقى ماشي بالتوكيل والرخصه
هتبقى ماشي بالعقد والرخصه

ملحوظه المهم هو تاريخ انتهاء الرخصه مش تاريخ الفحص

يعني لو الفحص في 2011 والرخصه هتنتهي على 2010 يبقى كدة لازم تنقل الملكيه وتبدأ في الإجراءات السابق ذكرها في 2010


نصيحه اخيره لا تترك التوكيلات داخل السياره ممكن تصورهم وتحتفظ بالصوره في السياره والأصل في البيت في مكان امين لأن لو ضاعوا هتبقى مشكله صعبه جدا

[HASSANSG]

انا متشكر جدا يا باشا على المعلومات القيمة والنصيحة