وربنا زهقت ياجماعة من البلد دى

[M.Hassan47]

[OVERLINE]هاى ياشباب
انا ياجماعة عندى مشكلة خنيئة اوووى ومملة جداااا وفعلا عايز ارغى مع اى حد

انا رخصتى منتهية بقالها شهر ونص وطبعا فى مرور فيصل الجميل اللطيف السريع اللى مفيش اجمل منه قالولى ماينفعش ترخص لأنك مكملتش واحد وعشرين حتى شهاده البيانات معرفتش اطلعها المهم استنيت لحد ماكملت واحد وعشرين من اسبوع ولكن حصلت المفجأة قبل ماكمل الواحد وعشرين وهى ان البطاقة ضاعت :K_crying[1]: لكن معايا صورتها وطبعا فاكر ان الصورة هاتمشى او الرخصة الخاصة ورايح بقى داخل على الشباك وفاتح صدرى ماصدقت بقيت انا المتصرف فى عربيتى ولا يقولى واصى ولا بتاع وفاجئنى بعد مادفعت الخالفات انه ماينفعش اعمل اى حاجة من غير اصل البطاقة طب والحل بقالى شهر ونص على كده المهم رحت جبت استمارة بطاقة من القسم وقولت بدل مااستنى شهاده الأكاديمية لما تطلع لأنى لسه مخلص اهو مفيش من اسبوعين واخر سنة قولت بدل ما استنى وفى الأخر اكتب فى البطاقة طالب ولا بتاع لا انا اروح اجيب السجل التجارى بتاع الشركة بتاعتنا وجبته ويارتنى ماجبته طبعا السجل ده معمول قبل ماكمل الواحد وزفتين ومكتوب تحت وصاية والده فلازم يتعدل عشان ينفع
ورحت عشان اعدله مع المحامى ولسه هامضى قالى البطاقة راح المحامى طلعله الصورة راح قايله تانى البطاقة راح مطلعله الرخصة الخاصة بتاعتى راح قايله البطاقة تانى مكنش معاه بقى حاجة يطلعها فقاله ماتنفعش من غير اصل البطاقة وطبعا رجعت بخيبة الأمل وقولت الحمدلله على كل شئ فيها ايه يعنى لما اكتب طالب عادى وبعد كده ابقى اجددها براحتى بس اخلص ترخيص العربية ورحت رايح على الأكاديمية عشان يختموهالى على انى طالب وبكل برود قالتلى بتاعت شئون الطلبة سيبها واسئل عنها بالتليفون بعد عشر ايام مش عارف ليه صممت على موضوع انى اتصل قبل ماروح ده كأنى رايح اخطب واحده المهم عقبال مايعدى عشر ايام وكمان تقعد فى القسم 15 يوم يبقى كده شهر والرخصة منتهية بقالها شهر ونص يبقى المجموع شهرين ونص

دلوقتى انا بقى اروح شغلى ازاى وامشى بالعربية ازاى انا فضلت مستحمل الشهر ونص دول ومحترم نفسى ومش بلف بيها كتير لكن هاعمل ايه فى الأيام الجاية لو قبلتنى لجنة مرور

حد يقولى عشان انا زهقت
[/OVERLINE]

[Michael_Lanos]

بجد بجد انت حظك غريب يا مان .... اصبر بقه وامشي فى الطرق الامان ولو حصل ودخلت على لجنه اخدل بقلب جامد ولا يهمك .. هى موته ولا اتنين

[asbeats]

يا باشا انت في بلد بتعشق الروتين وبما انك معرفتش تسلك امورك وتفتح دماغك وجيبك يبقى هتفضل تشرب المر مع موظفين الحكومة اللي عندهم استعداد يلففوك حوالين نفسك عشان النسر اللي في الختم مش غاسل سنانه!!!

في اي بلد محترمة الكلام ده كله بتعمل وانت حاطط رجل على رجل ونايم في بيتك

بس هنقول ايه...

لو مهم اوي تتحرك بالعربية حاول تشوف حد معرفة في المرور يضربلك وصل ان الرخصة مسحوبة منك وتمشي بيه احد ما تطلع الرخصة ان شاء الله

[أحمد كمال]

طلع بدل فاقد من البطاقة بدون تغيير البيانات و دي مش محتاجة ختم الكلية لانها بدل فافد

فيه استمارة بطاقة ب 75 جنيه بتطلع في 3 ايام ..... العادية بتاخد 25 يوم

[M.Hassan47]

منا عاملها بدل فاقد وكمان معايا صورة البطاقة بس انا كنت عاملها ايام ماكنت فى ثانوى ودلوقتى مخلص فلازم بقى تختمها من الجهة الدراسية داحتى فى الجهة الدراسية بتقولى معندناش ختم النسر روح اختمها من الوزارة تقريبا زى ماقال الباشا النسر بيغسل سنانه وعلى فكره انا فتحت دماغى وجيبى بس فعلا ياجماعة التعليمات الجديدة ان مفيش اى حاجة بقت تنفع الا البطاقة او جواز السفر لأن الأول كانت رخصة القياده بتمشى اى حاجة
بس بجد بعد البهدلة اللى انا شفتها فى اليومين دول لو وقفت فى لجنة واى بنى ادم اتكلم معايا انا مش بعيد ااقفله على كبوت العربية او اولعله فيها عشاااان بجد خلاااص انا بقيت عايز قنبلة نووية تنزل على كل الهيئات الحكومية .

[أبو إياد]

باقولك ايه العربيه بتاعت اخويا رخصتها منتهيه من شهر 4 ياعنى بقالها شهرين وعادى جدا هو بيستخدمها وانا لو عربيتى فيها حاجه باستخدمها والدنيا عادى جدا بس لما حد يوقفك جهز الخمسنايه مع الرخصه وهو هايبتسملك ويوقلك اتفضل ياباشا

انا مش فرحان وانا بقولك الكلام ده بس البلد دى فيها حكومه

[M.Hassan47]

فعلا فيها حكومة جامده جدا عرفت تطلع منك الفلوس وانت مبسوط مش مضايق لأنك عارف ان الخمسين جنيه اهون بكتييير اوى من سحلات تانية
حسبى الله ونعم الوكيل

[Samah AbdAllah]

لاحول ولا قوة الا بالله
معلش اصبر شوية واعمل البطاقة بالشهادة بالمرة وامشى عادى كانك ناسيها وكله بيعدى بالطريقة اياها

[M.Hassan47]

مهو غصب عنى هاعمل كده مش بمزاجى انا معنديش مشكلة ماهى كلها سحلات وخلاص بس المشكلة فى الوقت