اسوأ انواع قائدي السيارات

[MoToRiZeR]

انا رايي الشخصي ان اللي يعرف يسوق في مصر يعرف يسوق في اي حتة .. رالي .. اوتوكروس .. او حتي سباق اللنشات اللي في مارينا اليومين دول

اصل خلينا واقعيين .. احنا بنمشي علي طرق متنفعش تمشي عليها خيل حتي .. جميع انواع الحفر و المطبات و البلاعات .. و العربيات عندنا مستحملة و كتر خيرها .. الواحد بيبقي جايب عربية صغيرة و عاملها عربية العيلة لأن اصلا العربيات عندنا غالية و ده المتاح .. بس الاهم من كل ده .. الناس اللي سايقة نفسها .. زي مثلا :

1- سائق ميكروباص شايف ان من حقه يقف في وسط الشارع و ينزل و يطلع الناس و بعد كدة يطلع كمان من الشباك يشتمك لأنك مستعجل يعني الدنيا مطارتش و الله يحرفك

2- سائق تاكسي كفران من سواقين الميكروباص و شايف ان انت عيل ابوه جابله عربية فرحان بيها و الله يحرفك

3- سائق اتوبيس يفضل يزنق عليك لحد ما تطلع عالرصيف احسن ما تنزل تحت الاتوبيس .. بعد كدة يدلدل دماغه من الشباك و يقولك شتيمتين ملخصهم انك حمار و الله يحرفك

4- رجل عجوز جدا سايق عربيته و مدايق من الزحمة اللي مكانتش موجودة قبل كدة و ان ده زمن ازرق و الله يحرفك برده

5- شاب مفيم العربية و مشغل راب علي سماعات 4 مليون وات و ماشي ياخد غرز .. شتمتموا .. كلمتوا .. حدفتوا بالطوب .. نزلت من العربية كلتوا قلمين .. هو مش معاك اساسا متحاولش

6- سواقة الستات .. يا خبررررررررر اسووووود بلاش ونبي دول بالذات .. الاقيلك واحد واخدة الشمال و نايمة عالمحور الصبح .. ماشية علي 60 مستريح .. اجي جنبها اشوف في ايه خير لا تكون دخلت في غيبوبة و هي سايقة ولا حاجة .. الاقيها بتأكل ابنها الصغير ! و مرة العربية و هي مركوتة يا عالم .. واحدة جت شالتلي الشنطة كلها طبقتها و خدت في سكتها كام اكصدام علي مرابة علي فوانيس لعربيات تانية

7- بلاش اتكلم عن عدم استعمال الاشارات .. و بلاش اتكلم برده عن الناس اللي بتدي اشارة يمين و تمشي شمال و بعد كدة تطلع دماغها من الشباك بقولك ( انا مدي اشارة يا بني ادم ! )

ده غير الناس اللي ماشية في الشارع .. مش هعلق علي ان مفيش التزام باماكن العبور او بالاشارات لأن دي تبقي قلة ادب مني يعني .. بس اصل لا العربيات ماشية ولا هما بيعدوا !

يعني يمكن مصر من البلاد القليلة اللي تنفرد بأمكانية فقدانك لحياتك و انت بتعدي شارع عادي جدا !

و فيه ناس كدة بتبقي غريبة .. تحس و هما بيعدوا انهم طالبين الشهادة .. داخلين ينتحروا فيك .. و الله قبل كدة واحد معدي قدامي في جامعة الدول .. بيعدي و هو بيشرب من ازازة و طول ما هو بيعدي بيشرب و مغمض عينه .. يا جبروتك يا جدع !!

[M_ashraf]

انت ليه نسيت العربيات الكارو و الحنطور
دي مصيبه تانيه
انا مره كنت ماشى و واحد بعربيه كارو لقيته داخل عليا والحمار خلاص
كان هيبوسني.... قمت قافل الازاز وال حمار خبط في الشباك
ومره تانيه... واحد بعربيه بيجرها حصان الحصان هاج و فلت من الراجل وكنت هخبط فيه
والسبب ان الراجل كان عمال يكربجه
وعديت منه باعجوبه
ولما نزلت ازعق قام مزعقلي هو اني كنت ماشي في وشه
وحسبي الله

[محمدايهاب]

dehumanizerأنت طالب في كلية أيه؟

بس فعلا أنت نفس أفكاري بالطبط و بنفس الترتيب و نفس الصياغة و كمان اكتر حاجة في حياتي بكرها في السواقة استخدام اليد بدل الإشارات بكون عاوز اقطع ايد الشخص ده

[توفيق طة]

و فيه ناس كدة بتبقي غريبة .. تحس و هما بيعدوا انهم طالبين الشهادة .. داخلين ينتحروا فيك .. و الله قبل كدة واحد معدي قدامي في جامعة الدول .. بيعدي و هو بيشرب من ازازة و طول ما هو بيعدي بيشرب و مغمض عينه .. يا جبروتك يا جدع !!

ههههههههههههه والله انت حكاية زى ما تكون زى الكامبرا الخفية !!!!

من الأشكال دى كتير مش حضارة سبع آلاف سنة .. بس انت نسيت الموتسيكلات البلياتشو وحركات البهلوانات الله يكون فى عونا بصراحة احنا بنسوق العربية وروحنا على كفنا حسبنا الله ونعم الوكيل ..

شكرا لك أخى الفاضل موضوعك عشرة على عشرة :shock:

تحياتــى لك

[أبو عبدالله]

لا حول ولا قوة الا بالله

[الريس]

والحمار خلاص
كان هيبوسني.... قمت قافل الازاز وال حمار خبط في الشباك

:D :D :D :D :D :D :D

[youssef_sallam]

طب انا حقولكم على حاجة انا كنت مسافر من فتره المانيا فى شغل المهم هناك بقى عالم تانى إحنا و الله مش عايشين هناك لو عايز تعدي الشارع فى مكان واحد بس و هو اللى فية خطوط بيضاء على الأسفلت بالعرض ( مش موجوده عندنا ما تحاول تفتكر )و لو قولت انا هعدى من اى مكان غير ده يبقى انت مجنون و مالكش دية و اي واحد سايق لو خبطك مش مسئول انت الغلطان
و لو لقيت الخطوط البيضاء اللى بقول عليها حتكون موجوده فى إشارة و ساعتها ملكش دعوة بالعربيات بص على الوان الإشارة اول ما تكون اخضر للمشاه ( ليك) تبقى اهبل لو بتيص على العربيات اللى جاية علشان كلة وقف خلاص مفيش واحد فتك جاي من بعيد عامل فيها معهوش فرامل .... يعنى تعدى وانت مغمض
و لو الخطوط دية فى تقاطع صغير او فى مكان ما فيهوش إ شارة .... و الله يا رجالة اول ما تنزل من على الرصيف و رجلك تلمس الخط الأبيض تحس إنك كنت بتتفرج على فيلم فيديو و حد عمل Pause العربيات كلها وقفت مستنيا سعادتك تعدى
كنت بكون مبسوط قوى و اقول جوايا يا عالم يا هبل
حبيت اجرب حاجة لقيت عربية نقل كبيرة بمقطورتين ( موجودين منهم عندنا اللى بيمشوا من غير سواق دول) المهم لقيتها جاية بسرعة و انا روحت نازل و الله لمست الخط الأبيض برجل و التانية على الرصيف لسة ( قولت احسن يطلع حظي وحش و السواق يكون من شارع فيصل مصري الجنسية او يكون عندة حد مصرى فى شجرة العيلة .... لقيتة داس فرامل و وقف فجاء انا رجعت على الرصيف تانى من الخضة بس هوة صمم و قالى ده طريقك
ناس مجانين صحيح
طبعا مش هما المجانين :shock:

[eng_mkhalaf]

التوك توك أنتم نسيتة - وكمان الناس اللى بتتمشى وتعدى الشارع كأنة بيعدى فى الجنينينة بتاعت بيتة مش بيعدى شارع الهرم

[Abdallah]

يا اخوانا فين النقد الايجابى ؟؟؟
فين الحلول, حضراتكم بتحكوا قصص كلنا مرينا بيها بس طالما بننتقد يبقى نقدم حلول, يا ريت نسمع رأى كل شخص فينا يمكن نلاقى عند حد مننا حل سهل التنفيذ ودعونا نبدأ بأنفسنا.

[youssef_sallam]

الحل فى رأيي (( التربية و التعليم )) هما دول يا جماعة اساس نجاح و ضياع اى دولة
تعليم كويس يعنى :: ثقافة و أخلاق إلتزام و حضر و ادب و أحترام
تعليم بايظ : يبقى انت اكيد فى مصر

[Heshaam]

باختصار اسوأ أنواع قائدي المركبات عموما هو اللي ميعرفش هو ليه في المكان ده وإيه اللي ليه وإيه اللي عليه.

وبخصوص النقد الإيجابي؛ أعتقد إن الموضوع ده ممكن يكون مفيد:

http://www.nilemotors.net/Forum/viewtopic.php?p=93553&highlight=#93553

[الصاوي]

يا اخوانا فين النقد الايجابى ؟؟؟
فين الحلول, حضراتكم بتحكوا قصص كلنا مرينا بيها بس طالما بننتقد يبقى نقدم حلول, يا ريت نسمع رأى كل شخص فينا يمكن نلاقى عند حد مننا حل سهل التنفيذ ودعونا نبدأ بأنفسنا.

الحلول

سائق ميكروباص شايف ان من حقه يقف في وسط الشارع و ينزل و يطلع الناس و بعد كدة يطلع كمان من الشباك يشتمك لأنك مستعجل يعني الدنيا مطارتش و الله يحرفك

1.إلغاء الميكروباصات من الشوارع و إعدام سواقينها حرقا حتى لا يكرروها تاني

سائق تاكسي كفران من سواقين الميكروباص و شايف ان انت عيل ابوه جابله عربية فرحان بيها و الله يحرفك

2.علشان سواق التاكسي ميبصش البصة دي نخزقلوا عينيه أو نكتب على عربياتنا : متبصليش يا عبيط دي جاية بالتقسيط

سائق اتوبيس يفضل يزنق عليك لحد ما تطلع عالرصيف احسن ما تنزل تحت الاتوبيس .. بعد كدة يدلدل دماغه من الشباك و يقولك شتيمتين ملخصهم انك حمار و الله يحرفك

3.حل الأوتوبيس و الستات حل مزدوج هو المثل القائل لا تمشي ورا هيئة ولا حمارة سايقة

رجل عجوز جدا سايق عربيته و مدايق من الزحمة اللي مكانتش موجودة قبل كدة و ان ده زمن ازرق و الله يحرفك برده

4.نخصص حارة لمن هم أكبر من 60 سنة و نسميها حارة العواجيز

شاب مفيم العربية و مشغل راب علي سماعات 4 مليون وات و ماشي ياخد غرز .. شتمتموا .. كلمتوا .. حدفتوا بالطوب .. نزلت من العربية كلتوا قلمين .. هو مش معاك اساسا متحاولش

5.ده بيسموه الشاب البوب و كل حاجة ليها دوا الا الهيافة دواها التقدم في السن أو حادثة مريعة بعيد عنك

ده غير الناس اللي ماشية في الشارع .. مش هعلق علي ان مفيش التزام باماكن العبور او بالاشارات لأن دي تبقي قلة ادب مني يعني .. بس اصل لا العربيات ماشية ولا هما بيعدوا !

6.هما اللي غلطانين أصلا؟؟ و يمشوا ليه من أساسه؟؟ و رأيي إلغاء عقوبة القتل الخطأ و تبقى حاجة عاملة زي عدد المحاولات في الفيديو جيم و تبقى على الرخصة بعدد معين لما تخلصوا تروح تشتري محاولات تاني من المرور و كل ما تموت أكتر تاخد نقط مجانية

[Dr Ahmed]

ههههههههههههههههههههههههههههههه

[tarekkasaby]

هو انت نسيت بتوع الدليفرى دول كمان حكايتهم حكاية بيستمتع بالغرز و تخبيط مرايات الخلق

[ezshereef]

المشكلة أصلا إن محدش علمنا قواعد المرور. كل واحد فيكو يفتكر هو إتعلم قواعد المرور منين هيلاقي نفسه لقطها شوية من والده شوية من أصحابه و شوية من التليفزيون. يعني مفيش مصدر الناس إتعلمت منه الأول و بعدين بقوا يخالفوها.... إحنا بلدنا أغلبها جهلة يعني أميين .... دول ما إتعلموش في المدارس أصلا يا ترى هيهمهم إيه هيه قواعد المرور و يحاولو يتعلموها .... انا شايف إن إحنا مشكلتنا الجهل و الفهلوة.