أرجو مساعدتي في ترشيح سيارة مناسبة للمبلغ اللي معايا .. وشكراااااا

[TransParancy]

بسم الله الرحمن الرحيم

ياريت ياجماعة ترشحولي عربية تكون كويسة ومناسبة للمبلغ اللي معايا

انا معايا 17 وممكن يوصلو ل20 إن شاء الله

انا لقيت اعلان عن فورد اسكورت 2 باب موديل 89 ب17 بس قالولي حاجتها غالية جداا ومش اقتصادية خالص

انا ماليش أوي في العربيات ومعرفش الأنواع عشان كدا مش عارف اجيب ايه بالفلوس دي

يعني انا لقيت اعلانات للريجاتا في الرينج اللي انا بتكلم فيه دا بس معرفش بردو الريجاتا حلوة ولا لأ

ياريت تساعدوني بقى وتقوليلي عربيات وموديلات تكون مناسبة للسعر

وألف شكر مقدماً

[ahmdmagdy]

لو انت لسه جديد في عالم السيارات انا ارشحلك ممكن لادا2107 او 128 او 131 او ريجاتا كلهم ممتازين و صيانتهم سهله و قطع غيار رخيصه

[hero_hamada]

حضرتك اللادا هتستحمل جدا وهتلاقيها بالسعر ده
وكمان الريجاتا حلوة
والريتمو كمان تقريبا نفس السعر

[AMA]

بص يا سيدى بما إنك لسه جديد فى العربيات فأحب أقولك أنك عايز عربية أكيد أستهلاكيه شوية و دا هيكون أقل من 1600 سى سى عشان سحب البنزين
بالنسبه للماركات النادرة حاول تجنبها لأنها هتكون فى قطع الغيار غاليه جدا حتى لو فانوس او حاجة حصلت هتغيرها بسعر يعتبر الضعف دا غير سعر إعادة البيع يعنى لو عايز تبيعها هتخسر أكتر من 6 ألاف جنيه
أنا من وجهة نظرى بالـ17 ممكن تجيب فيات 131 و هتكون حالتها كويسة جدا أو لادا 2105 أو ممكن تجيب ريجاتا على 15 ألف إلى 17 ألف
أو تجيب بالـ20 ألف لادا 2107 موديل قديم يعنى أوائل التمنينات

[TransParancy]

ألف شكر ليكو ياجماعة .. بس أكتر حاجة انتو قولتوها وتنفع معايا هي الريجاتا وبعدها الـ31 بس هل دول فعلا سعرهم كدا ؟
لاني بشوف ناس بتطلب اكتر من 23 في العربيات دي !!
وبالنسبة للادا فانا ركبتها كتير لانها كانت عربية البيت 2015 بس كانت مشكلتها إنها تقيلة جداً في الدركسيون
لكن لو هي المشكلة دي في العربية القديمة بس أنا معنديش مشكلة اجربها تاني بس المهم متكونش اللادا عموما كدا تقيلة لأني بردو لسه بقول يا هادي في السواقة
+
في عربية بردو اسمها دايو تيكو عاملة 18 ألف موديل 96
بس دي 800 سي سي طبعا دي متستحملش مشاوير صعبة وسفر صح ؟

[TransParancy]

AMA

طب ممكن حضرتك تقولي تفرق إيه اللادا 2015 عن 2017 ؟
وهل دي أو دي هيبقى فيها تكييف أو حتى ينفع أركبه أنا ولا لأ ؟

[mexmarine]

الريجاتا و بس و ممكن تلاقيها مكيفه كمان بس ممكن تدخل على 22

[AMA]

AMA

طب ممكن حضرتك تقولي تفرق إيه اللادا 2015 عن 2017 ؟
وهل دي أو دي هيبقى فيها تكييف أو حتى ينفع أركبه أنا ولا لأ ؟

والله بص أنا يتهئ لى مفيش اختلاف بين لادا 2105 و 2107 ممكن فى الميكانيكا لكن الله أعلم و فى الموديلات لأن 2107 موديلات جديدة و حتى الان بينزل منها موديل 2009 لكن 2105 قديمه شوية يعنى فى التمانينات و هكذا لكن معرفش أكتر من كدة
بالنسبه للتكييف أى عربية ممكن يتركبلها تكييف مستعمل بحوالى 1500 جنيه و جديد بـ2500 جنيه بس لازم تكون فوق الـ1300 سى سى عشان تستحمل عندك ال128 ممكن يتركبلها تكييف بس السحب هيكون ضعيف جدا و سرعتها هتكون بطيئة و كمان التكييف بيزود فى أستهلاك البنزين عندك الماروتى مينفعش يتركبلها تكييف نهائى و كل المحاولات فشلت لأنها 800 سى سى فمش هتستحمل
دا كل إلى أعرفة بصراحه حتى الأن و أكيد الناس هتفيدك أكتر
و على فكرة كل أنواع اللادا الفتيس و الدريكسيون فيهم تقيل جداااااااااا


و دى صورة لادا 2105


و دى صورة لادا 2107

[TransParancy]

هو أكيد في فرق بينهم غير أن الـ2015 تمانينات بس .. لأن العربية اللي كنت بقولك عليها دي كانت موديل 1995
ممكن يكون فرق في الاوبشن أو الموتور ..
عامة أنا لسه مقررتش وأديني بسأل وأدور على ما أحدد النوع اللي هجيبه وربنا يكرم إن شاء الله

ومتشكر جداً ومعلش تعبتك معايا

[AMA]

هو أكيد في فرق بينهم غير أن الـ2015 تمانينات بس .. لأن العربية اللي كنت بقولك عليها دي كانت موديل 1995
ممكن يكون فرق في الاوبشن أو الموتور ..
عامة أنا لسه مقررتش وأديني بسأل وأدور على ما أحدد النوع اللي هجيبه وربنا يكرم إن شاء الله

ومتشكر جداً ومعلش تعبتك معايا

العفو يا باشا و أحنا كلنا هنا عشان نفيد بعض و إن شاء الله ربنا يكرمك بالحاجة إلى تريحك

[DR.M]

شاريد 90 1000cc عربيات شديدة

[HanyAziz]

الاخوةالافاضل 2105 بتكون 1200 سي سي ودةيعتبر ميزة مش عيب لانها بتكون اقتصاديةاكتر فى استهلاك البنزين وبتكون كاربرتير اما 2107 فمنها 1500سي سي و1600 سي سي الجديد منها الروسى انجكشن اما المصرى كاربيرتير والشكل تقريبا متشابه باختلاف الشبكةالامامية 2107 نيكل اما 2105 فيبر اسود

[TransParancy]

فعلا أنا سألت وإتأكدت من المعلومة دي في الفرق بين اللادا ال5 و ال 7

بس انا خلاص قررت أجيب 131 ولو ملقتش حاجة نضيفة وسعرها كويس هجيب لادا 2015

بس انا دورت في كونتاكت كارز على ال131 كلها موديل سبعينات واوائل تمنينات وكلها فوق العشرين ألف

مش عارف هل دا فعلا سعرها ؟؟ ولا الناس دي بتهزر ؟

[eg_falcon]

فعلا أنا سألت وإتأكدت من المعلومة دي في الفرق بين اللادا ال5 و ال 7

بس انا خلاص قررت أجيب 131 ولو ملقتش حاجة نضيفة وسعرها كويس هجيب لادا 2015

بس انا دورت في كونتاكت كارز على ال131 كلها موديل سبعينات واوائل تمنينات وكلها فوق العشرين ألف

مش عارف هل دا فعلا سعرها ؟؟ ولا الناس دي بتهزر ؟

هو على فكرة الاتنين لان فعلا دا سعرها في السوق بس في راي ان الناس دي بتهزر لان عربية موديل السبعينات و يبقى دا سعرها يبقى في حاجة غلط على راي عمنا الراحل حسن عابدين

[AMA]

هو على فكرة الاتنين لان فعلا دا سعرها في السوق بس في راي ان الناس دي بتهزر لان عربية موديل السبعينات و يبقى دا سعرها يبقى في حاجة غلط على راي عمنا الراحل حسن عابدين

فوق العشرين أية يا جماعة دا الناس دى بتستعبط مش بتهزر
عمتا دور أكتر فى مواقع البيع والشراء هتلاقى فى حدود من 17 إلى عشرين دا السعر الطبيعى بتاعها لكن فوق كدة يبقى أستعباط
أنا والله عشان ببص كتير فى مواقع بيع و شراء سيارات بلاقى أسعار كتيرة مبالغة و أسعار كتيرة معقولة أنت بس خلى عندك صبر و دور كويس هتلاقى أكيد حاجة جميله و لو ملقتش أنزل السوق بص بصه هتلاقى الأسعار واقعة جدااااااا بس لازم يكون معاك ميكانيكى و سمكرى الأتنين محترفين جداااااااااااااا عشان يكشفوا عليها