انا محتاج نصيحتك فلا تبخل علي بها

[shiref]

يا جماعه انا عايز اجيب حاجة الماني و شبابية زي السيات ابيزا او البولو او الاوبل كورسا بس الناس مخوفيني من اسعار قطع الغيار فانا مش عارف هل هي غالية فعلا ام لا وهي لو غالية غالية اوي ولا معقولة وياريت لو حد مجرب الانواع دي يقولي راية و انا مش عاوز اجيب حاجة واندم عليها . ارجوكم ردوا علي في اسرع وقت

[mohamedshiko]

انا نفس الحوار دة بالضبط منذ شهرين

البولو 2001 و لا البونتو 2003 ولا البيزا 2002

[shooter123]

ما بلاش تقفش علي الالماني يا عم عشان تتيح لنفسك خيارات اوسع
ماله الياباني؟
ماله الايطالي؟

[Fiatbrava]

عايز النصيحة اركب البولو 2001 وانت مغمض
ثبات
اداء
امان
قطع غيار معمرة
وسعر قطع الغيار للثلاث سيارات متقاربة

[m000dy]

على فكره لو نزلت تتفرج على حاجه من التلاته دول هاتشبط فيها ومش هاتعرف تفكر فى الكورى ابدااااا
ومادام نويت هات حاله نضيفه ومش هاتصرف كتير ان شاء الله ومهما صرفت مش هاتبقى متضايق عشان فلوسك هاتبقى فى محلها
الابيزا اكثرهم غلوا فى قطع الغيار واقلهم مشاكل
البولو موتورها مابيستحملش اهانه ولا سخونيه
البونتو اقلهم اعطال واقلهم فى سعر قطع الغيار واقلهم فى الثبات على الطريق بردو
الخامات الداخليه والتصميم فى الامانى يكسب والتلاته عداداتهم شيك جدا خصوصا الوان عدادات البولو والتلاته بيتميزا بالوان حمرا وبرتقالى وفى موف فى البولوا ودى الوان منبهه للعين لتقليل احتماليه نوم السائق ولوضوح الرؤيه اللى ماتخليكش محتاج تركز فى العدادات عشان تشوف
تقفيل التلاته لا يقارن بالكورى او حتى اليابانى مع احترامى لليابانى وده بيبان من دخول سخونيه فى بعض السيارات اليابانى
لو هاتركب حاجه من التلاته دول اعمل حسابك انك مش هاتعرف تركب اقل منهم لما تنزل وتحب تغير وهاتحس ان فلوسك وقعت فى الارض لو جبت كورى او صينى حتى لو زيرو
توكل على الله وهات العربيه اللى فى نفسك خصوصا لو مش متجوز ووراك مصاريف
واما تتجوز ابقى غير وهات ابو بلاش فى قطع الغيار وحاجه توديك وتجيبك وتبقى حنينه فى مصاريفها

[totty]

لو ان ميزانيتك عاليه فى الصيانه هات اى حاجه من الاتنين بولو او ابيزا ....انا كان معايا بولو 2000 ...كانت عربيه تحفه بس جت فجأه و خرفت حاولت اسايسها بالعقل لقيت انه مفيش مفر من الخياطه فى العفشه ....علبه الدركسيون ب 4500 جنيه لوحدها المهم جبت لها علبه استيراد بالف و خمسميه و كملت بقيت العفشه استيراد و بعت العربيه .....العربيات دى لما بتكون مظبوطه انسي اى عربيه تانيه لكن لما بتطلب صيانه عد من الفين جنيه و انت طالع .....ربنا يعينك و ركز قبل ما تختار ......و الله الموفق

[hatchy]

عن تجربة الكورسا افضلهم فى كل شئ

[thunder155]

فكر فى جولف 2

[kamalsalem]

عن تجربة شخصية انسى الكورسا... بطيييييئة فوق الوصف بس تكيفها ساقع بطريقة تخليك تحس انك راكب بطريق مش عربية.. حتى صوتها وهي ماشية بيفكرني بموتور الخلاط.. بس فيها تكنولوجيا عالية الصراحة.. لكن التابلوه ضعيف

[hatchy]

عن تجربة شخصية انسى الكورسا... بطيييييئة فوق الوصف بس تكيفها ساقع بطريقة تخليك تحس انك راكب بطريق مش عربية.. حتى صوتها وهي ماشية بيفكرني بموتور الخلاط.. بس فيها تكنولوجيا عالية الصراحة.. لكن التابلوه ضعيف

ممكن حضرتك توضح بتتكلم على عربية اية بالظبط
يعنى اى كورسا بماتور اية ؟
حضرتك بالكلام دة تعتبر الاول فى المنتدى من الشكوى من الكورسا
يا اما العربيات اللى معايا مش كورسا ومتخفية فى زى كورسا

[Memo_Lancer]

عن تجربه الاوبل و السيات ابيزا و الاتنين 94
الابيز تتفوق بكتير
اوسع و تكيف اقوي
و موتور اكبر
و شكل من وجه نظري اشيك
و قطع فيار مش غاليه اوي

[waelms3]

ابيزا

الابيزا تكسب عن تجربة مع الثلاث سيارات

[hamada2u2000]

بسم الله الرحمن الرحيم
شوف يا باشا اللى هاقولهولك ده عن تجربه قطع غيار الالمانى معروف انها غاليه بس معمرة بمعنى انك لو جبت حاجه كورى او يا بانى مثلا وغيرت فيها اى حاجه هاتعيش مثلا سنة انما فى الالمانى هاتعيش خمسة ده طبعا كلام مختصر ومختصر قوى كمان
المهم انا فى دمياط و معايا بولو 2001 فضى فاضية يعنى مافيش فيها كماليات رشة بره نضافة و جوة فابريكة محتاجة حوالى 300 جنية لتظبيط الشكل مش الاساسيات بمعنى العلامة اللى قدام مسروقة وحاجات من الرفيعه قوى دى العربيه موتورها ممتاز لسه مغير طقم الكهربا بتاعها ومغير الكاوتش من حوالى شهر وببيع والله علشان عايز اجيب مكيف انما العربيه مش مزعلانى
وربنا يكرمك فى الشرا ان شاء الله
ونصيحة من اخ لو فكرت تشترى هات المانى وبولو 2001 بجد والله ده احسن حاجه فى البولو موديل روعه بجد وسحبه على الطريق حكايه والنصيحة الاهم لما تيجى تجيب قطع غيرا لاى نوع هات جديد وسيبك من الاستيراد ده رايي والله الموفق

[mexmarine]

عن تجربه الابيزا 94 جميله و مش معقده و موتور فولكش 1300 سى سى

[srm]

الكورى اثبت عن جداره انها سيارات تستحق الاحترام وذلك للاسباب الاتيه

-قطع الغيار رخيصه ومتوفره(اهم حاجه لما حد يشترى عربه بيسأل عليها)

-حماره شغل والدليل على ذلك انها بتشتغل تاكسى وطالع عنيها ومش بتقول لأ

-ما الفائده انى اركب عربيه المانى او يابانى اى نعم رفاهيه اعلى وجوده تقفيل ......ولكن لو لا قدر الله حصل واى حاجه فيها باظت

او اتخبطت ودى حاجه معرضه ليها اى عربيه حتى وهى واقفه

ساعتها بقى اصرف كل اللى ورايا واللى قدامى عشان اصلحها

وايضا هيبقى فيه صعوبه فى تواجد قطع الغيار.....على العكس

طبعا مع الكورى

-خلاصه الكلام عايز حاجه معقوله وشكلها كويس ومتتعبكش فى

المصاريف ولا الصيانه عشان اى ميكتنيكى بيشتغل فيها عليك وعلى

الكورى ....اما بقى لو معاك كاش ومستعد تصرف فى حاله

العطل او حتى الصيانه العاديه توكل على الله وهات المانى