مساعده لو سمحتوا عاوز مقارنه عادله (ابيزا94 - بونتو 94 - فيات تمبرا 94 )

[mxz911]

السلام عليكم

انا بصراحه قبل ما ابدأ سؤالى احب اعرف الناس انى دايما بستشير اهل المنتدى ونايل موتورز هنا ف المقام الاول فى اى شئ متعلق بالسيارات ..

خصوصا بعد شراء سياره نوبيرا 2004 مانيوال بعد مقارنات كتير هنا وكان دى اخر مقارنه

انا كنت بدور على 2001 بس ربنا كرمنى وجبت 2004

http://www.nilemotors.net/Nile/115160-2001-2000-a.html

http://www.nilemotors.net/Nile/169027-a.html

دلوقتى انا سبب انى عاوز سياره خاصه بيا هوه انى مش عاوز حد يحتاج العربيه وهيه معايه ؟ بمعنى حاليا معظم الوقت معاى عربيه البيت النوبيرا .اهلى مرات بيحتاجوها مثلا وانا بره ف بفكر جديا اجيب سياره اخرى ..

واهم حاجه مش حاجه تقرفنى عند الميكانيكى ... معتدله من باقى الحاجات زى قطع الغيار والصيانه وكده

دول اللى وقع عليهم اختيارى حتى الان (ابيزا94 - بونتو 94 - فيات تمبرا 94 ) واخرى هوه 30 باكو مش ازيد ولا مليـــــــــــــــم ( ياريت لو اقل كمان )

عاوز حاجه منهم محسش انها مختلفه اوى عن النوبيرا لانى مندمج جدا مع النوبيرا ولو فى فلوس تانى كنت جبت برضه نوبيرا .!!!


انا شاب 25 سنه عموما ... وعاوز عربيه عمليه من الاخر ... ف ياريت مقارنه عادله من اهل الخبره ( وعدم التحييز )

وشكرا ليكو

[flyway3110]

ibiza

[mxz911]

حضرتك واضح انك معاك تقريبا العربيتين ( التمبرا . والكوردوبا اللى هيه اخت الابيزا )

ممكن حضرتك تقولى ليه اخترت ابيزا ؟

[ramy87]

بص انا هقولك وجهة نظري الشخصية و يمكن تستفاد منها
التمبرا معروفة أنها عربية عفية و محترمة جدا و و موتورها قوي و تقدر تقول أنها أفضل عربية كقوة من الاتنين الليي باقيين
تمام؟
بس شكلها كده مش ظريف و متاسبش الشباب أوي علشان شكلها تقليدي جدا
يعني الأوبترا عندي كبيرة بس البادي عليه شغل و شكلها حديث

البونتو شكلها ظريف و شبابي أوي و عربية فيات محترمة و قطع غيارها متوفرة

الابيزا شكلها شبابي مس معنديش معلومات كافية عنها و لا عن مشاكلها بس السيات ماركة كويسة طبعا

[beshomilan]

ارشح لحضرتك اكسيل 1300 ومش هتندم ابدا

[i_Am_Legend]

افضل حل _لأفضل سعر_لافضل سيارة_لافضل موتور=فيات برافا 1999-2003_دى عربية وحش على الطريق_وشبابية جدا جدا_بس إبقى هات لفة أما تجيبها

[Memo_Lancer]

ابيزا للصبح

[waelms3]

ابيزا طبعا مع العلم ان جربت الاثنين الابيزا والبونتو بس لو عايز عربية كبيرة يبقى التمبرا واسعة اوى و حاملت اسيه

[mxz911]

بص انا هقولك وجهة نظري الشخصية و يمكن تستفاد منها
التمبرا معروفة أنها عربية عفية و محترمة جدا و و موتورها قوي و تقدر تقول أنها أفضل عربية كقوة من الاتنين الليي باقيين
تمام؟
بس شكلها كده مش ظريف و متاسبش الشباب أوي علشان شكلها تقليدي جدا
يعني الأوبترا عندي كبيرة بس البادي عليه شغل و شكلها حديث

البونتو شكلها ظريف و شبابي أوي و عربية فيات محترمة و قطع غيارها متوفرة

الابيزا شكلها شبابي مس معنديش معلومات كافية عنها و لا عن مشاكلها بس السيات ماركة كويسة طبعا

فعلا انا متفق مع كلامك تماما جدا جدا جدا .. وفعلا دى برضه وجهه نظرى لل 3 واعتقد ان مسأله الشكل التمبرا فى الاخر خالص والابيزا تكتسح ف التصميم والبونتو وسط

لكن فعلا مسأله ان التمبرا عمليه اكتر ده اللى خلانى ادخلها ف المقارنه لانى مش عاوز اجيب عربيه تغلبنى لانى اكتر حاجه اكرهها انى اصلح عربيه او اروح لميكانيكى !!

beshomilan ارشح لحضرتك اكسيل 1300 ومش هتندم ابدا

شكرا يا فندم لترشيحك الاكسيل .. بس انا مش عارف مش بحبها خصوصا فى موضوع الثبات بالذات بحس انها مش ثابته خالص وكمان نادرا ما تلاقى حاله حلوه !

افضل حل _لأفضل سعر_لافضل سيارة_لافضل موتور=فيات برافا 1999-2003_دى عربية وحش على الطريق_وشبابية جدا جدا_بس إبقى هات لفة أما تجيبها

كان نفسى فيها على فكره والله وكنت هشتريها لكن انى اروح لكذا ميكانيكى يقولى عمرى ما اشتغلت فيها دى مصيبه فى مصر ! انا بعشقها عموما ! بس عيبها انها نادره

ابيزا للصبح

ابيزا طبعا مع العلم ان جربت الاثنين الابيزا والبونتو بس لو عايز عربية كبيرة يبقى التمبرا واسعة اوى و حاملت اسيه

فعلا اانا مدى للابيزا الاولويه اكتر من اى حاجه بس موضوع انها ممكن تغلبنى اكتر من التمبرا فى موضوع قطع الغيار مخوفنى وبرضه التمبرا اوسع دى ميزه !

مش عارف الموضوع بدأ يتلعبك وانا بحاول عموما ازود الكاش وافكر ف حاجات اعلى لو ينفع !!

يعنى لو فكرت مثلا ال كاش تطلع ل 40 بالسلف وكده هعرف اجيب حاجه احسن جوليت مثلا؟ او كيا سبكترا ؟ او حاجه تكون حلوه كده وبنت ناس

حاجه كمان

ايه الفرق بين ابيـــــــــــــــــــــــــــــــــــــزا 1994 و ال1998 ؟؟؟؟؟؟؟؟ وحد قدامه ابيزا حاله شاذه او تمبرا حاله شاذه ؟

[mikho83]

ابيزا

[Memo_Lancer]

باشا الابيزا 94 احسن و هتلاقيها 1300 سيسي و موتور سهل جدا
و قطع غيارها رخيصه
بس لو هتوصل لوجوليت افضل بكتير

[mxz911]

ربنا يكرمكم جميعا على الردود

بس انا نويت ان شاء الله ازود يعنى ( هستلف اكتر من اهلى ) لانى برضه كنت هبقى سالف تمن واحده من دول وتم زياده ميزانيه العربيه ل 45 الف ان شاء الله ( ده اخرى )

ف ان شاء الله بفكر جديا ف حاجه حلوه وكبيره وواسعه وتعد معايه فتره

بفكر فى كيا سبكترا 2004 . دايو نوبيرا تانى غير اللى عندنا .

او اى حاجه حلوه ف الحدود دى ؟ حد عنده اقتراحات

[Memo_Lancer]

لانسر 99 مانيوال بس هتحتاج شويه كمان
و نوبيرا

[sha2e]

كان في موضوع قريب من ده وكانت المفارنه بين : بونتو وبولو وابيزا وكورسا وفليشيا وفبستيا

الاختيارات كلها موديلات عدا عليها حوالى 15 سنه وبالتالى الى انصحك بيه الحاله
يعني حط الاختيارات كلها فى دماغك لانهم تقريبا نفس الفئه والاختلافات بينهم مش كبيره ولو وقع ؤدامك عربيه من دول بحاله لقطه (يعني حالتها نضيفه اوى) خلص فيها وبلاش تحصر نفسك فى موديل معين خلى اهتمامك الاول هوا حالة العربيه علشان متقرفكش بعد كده

وده رأى فى كل عربيه
سيات ابيزا : قطع غيارها الارخص والاكثر انتشارا ودى كانت 1300 وفى ناس مسقطه المكنه 1400 بس المشكله ان اغلب الابيزا الموجود بيكون اتبهدل جامد خصوصا انها شبابيه شويه وموتورها الاكبر والاقوى من الباقيين (ما عدا البونتو 75 حصان)

فولكس بولو : تعتبر اقلهم حجما وطبعا قطع غياره اقل واغلى (المواتير مشتركه مع الابيزا سواء 1300 او 1400)

فورد فيستا : معنديش معلومات كافيه عنها لانها تعتبر اقلهم انتشارا

فيات بونتو 95 : دى موتور 1300 وفيه منها موتور 75 حصان وفيه منها باوبشن زياده زى فتحة السقف بس سعات الكنترول بيقل اصله ويضرب وبالتالى لازم تغيره بواحد استيراد

الاوبل كورسا 94 : ودي بتنزل بموتور 1200 افضل من الموتور الى 1000 الى نازل فى 99 برغم ان نظريا الاتنين ليهم نفس القدره الحصانيه لكن الخدعه ان ال1000 مش بيطلعها غير على ار بي ام مرتفع وبكده يبقى 1200 افضل وكمان مش معقد زى ال 1000 وكمان ال 94 في منها باوبشن اعلى زى مريات وازاز وباور وكمان فتحة سقف بالاضافه طبعا للتكيف
النقطه المهمه الاوبل الكورسا كان في منها استيراد معاقين وفي منها حالات ممتازه

كل الى فات ثباتهم كويس ومحترم

اسكودا فليشيا : تعتبر اقلهم موتور خشن وصوته عالى و بتسخن بسرعه وكمان مفهاش اي نوع من المتعه فى ركوبها او سواقتها

وفى الختام هقولك تانى خلى اهتمامك الاول بالحاله الكويسه او النادره علشان متقرفكش

ودا عنوان الموضوع :

http://www.nilemotors.net/Nile/190348-30-35-a.html#post3873144547