لاحول ولاقوة الا بالله ايه موضوع رخص العربية ده

[macgiver30]

كل ما ااخى استفسر عن عربية من صاحبها فالتليفون عشان اروح ابص على العربية اشتريها
اللى يقلى عربية ابن خالى ......و اللى يقلى الرخصة مش بأسمى وكنت شاريها استفيد بترخيصها سنة وفيها توكيلات .......ونا بقى زهقت زهق السنييين.........
مفييش حد رخصة عربيتو بأسمو ..........
وبعدين اللى انا عاوز اجبها مش قدييمة اوى يعنى دى موديل 94-96 اعمل ايه بقى انصحونى يا قوم

[gaaz]

هههههههههههههههههههههههههههههه
ماهي دي مشكلة البلد كلها توكيلات قليل اوي تلاقي عربية باسم حد ولو هي فعلا باسمه بيبقى خلاص جايب عربية بتاعته ومش عايز يبيع
انما التجار تلات اربعهم بيمشو بتوكيلات
توخى الحذر اخي العزيز

[macgiver30]

ارحمنا يارب

[kimo-nubira]

حظك بس انك بتقع في تجار وهما بيعملو تويكيلات لبعض ده سلوهم

[احمد المصرى]

على فكره دا مش مبدا اطلاقا انا شخصيا ببيع عربيتى حاليا ومعايا توكيل علشان رخصتها لسه فى شهر 10/2011 هل معنى كدا انى تاجر !!!!!!!!!!!!!!!!!!!!!!!!!!!!!!!!!!!!!!!!!!!!!


بس كل الموضوع انى اشتريتها وبعد كدا حبيت اغير واجيب اتوماتيك بس كدا ..... مش كل البيض نحطه فى سله واحده

[medododo]

خلاص بيع عربيتك للأخ صاحب الموضوع إيه رأيك

[mahmoud_anwar]

ياباشا عادي مافيش مشكلة انا لما اشتريت عربيتي كانت معمولة توكيل للراجل الي اشتريت منه العربية انتا حضرتك تشترط انك تسجل علي طول ماتخلهوش يعملك توكيل وانتا بعد ماتسجل افحص وطلع الرخصة بي اسمك وريح دماغك كل الناس ماشية بي توكيلات انا لما اشتريت عملت كده

[elewey]

ما لو الدوله تسهل اجراءات نقل الملكيه و الفلوس الكتيرة اللى بتدفع كان كل واحد حيشترى عربيه حينقلها باسمه لكن بعيد عنك تروح الشهر العقارى تدفع فلوس و تروح المرور تتبهدل و تقف طوابير و تدفع فلوس حاجة مقرفة فعلا

[احمد المصرى]

خلاص بيع عربيتك للأخ صاحب الموضوع إيه رأيك

لو حضرتك تقصدى انا شخصيا يبق الاخ صاحب الموضوع يشرفنى والعربيه بتاعته من غير فلوس وممكن يسجل فورا لو عايز مفهاش اى مشاكل اطلاقا يعنى

[Ghost2]

اشتري زي الناس ما بتشتري ولو فيها عشر توكيلات .. طالما هتسجلها وتاني يوم ترخص يبقى ريحت دماغك والتوكيل مش بيقلق لو سليم .. عادي جدا

[raedegypt]

احلى حاجه ان السعوديه مطبقه نظام نقل الملكيه فى البيع والشراء ومافيش حاجه اسمها توكيلات بهدف البيع والبيع لنفسه فالدوله تستفيد من اموال نقل الملكيه وبعدين حفظ لحقوق الناس من النصب . اتمنى الغاء حاجه اسمها توكيلات مكتوب فيها حق البيع والبيع لنفسه والتحايل دة . احنا عاوزين نحافظ على فلوس الناس ومنع هذا الباب للاحتيال

[behman]

ما لو الدوله تسهل اجراءات نقل الملكيه و الفلوس الكتيرة اللى بتدفع كان كل واحد حيشترى عربيه حينقلها باسمه لكن بعيد عنك تروح الشهر العقارى تدفع فلوس و تروح المرور تتبهدل و تقف طوابير و تدفع فلوس حاجة مقرفة فعلا

+111111

[misoalex]

ما لو الدوله تسهل اجراءات نقل الملكيه و الفلوس الكتيرة اللى بتدفع كان كل واحد حيشترى عربيه حينقلها باسمه لكن بعيد عنك تروح الشهر العقارى تدفع فلوس و تروح المرور تتبهدل و تقف طوابير و تدفع فلوس حاجة مقرفة فعلا

لا ولازم تفحص

طيب انا بنقل الرخصه بأسمى افحص ليييييييييييييييييييييييييييييييييييييييييه يا ولاد التيييييييييت

اسكت اصلى مفقوع من حوار نقل الملكيه والفحص كلفنى بتاع 700 جنيه واكتر عشان العربيه كان فيها تعديلات ومتنفعش تفحص بيها الكلام ده طبعا قبل الثوره

[lasth]

بص على حد علمى انك لازم تروح التوكيلات الى هوة الشهر العقارى وتتاكد هناك ان العربية باسمة وان التوكيل سليم واتاكد من صحتة ووانت هناك انقل الملكية ليك وسجلها فى الشهر العقارى دى الخطوة الاولى والضرورية دى اكيد بعد ما تنوى على الشراء وتشوف المخالافات وكدة

[mlav_cbr]

هى ايه مشكله التوكيل بالنسبالك انتى عايز تشترى عربيه ولا ورق ؟
انا بالنسبالى مثل الاخ اللى كتب انه شارى عربيه بتوكيل وهو توكيل يعنى اتنين توكيل والرخصه فيها لسه 6 شهور اروح انا بقى ليه انقل ملكيه دلوقتى او حتى ادفع فلوس عقد مسجل وانا مش متأكد انى هخلى العربيه ولا لا هى ديه الفكرة اللى يهمك فى الموضوع العربيه تعجبك وتكون سليمه و ورقها سليم حتى لو فيها 5 6 توكيلات والرخصه ساريه