افيدونى فى نقل ملكيه عربيه علشان اول مرة اشترى مستعمل

[AmRElSiSi]

بسم الله الرحمن الرحيم

انا اشتريت من اسبوع كده عربيه بوما 2007 من واحد معرفة يعنى محتجناش و لا عقد ابتدائى و لا مقدم و لا غيره
المهم اتفقنا على المبلغ و اديتهوله فورى على مايعمل التوكيل و شهادة المخالفات
دلوقتى هو راح عمل توكيل شامل اللى هو للبيع للغير و كل حاجه

الرخصة لسه باقى فيها شهرين
انا المفروض انقل ملكيتها ازاى بعد الرخصة ماتخلص و هل هحتاج اروح الشهر العقارى تانى

نقطه تانيه ,, العربيه ملاكى قاهرة و انا من اسكندريه يعنى هحولها كمان ملاكى اسكندريه

ياريت كل الخطوات و المصاريف :b4_611:و شكراً

[mlav_cbr]

شوف يا سيدى فى الاول هتروح الشهر العقارى هتسجل لنفسك بالتوكيل اللى معاك وبعدين تروح على المرور التابع للسيارة تاخد شهادة مخالفات جديدة وشهادة بيانات للمرور التابع له وتاخد العقد المسجل وشهادة االمخالفات والبيانات وتروح على مرورك تنقل الملكيه وتفصح من جديد وتنقل بأسمك
المصاريف رسوم عقد المسجل
رسوم التراخيص الضريبه و التأمين الاجبارى
المخالفات ان وجدت
شهادة البيانات رخيصه
بس ادى كل الحكايه
الكلام دة كلو ممكن تعملو بعد ما الرخصه تنتهى او قبلها عادى هيضيفولك الشهرين على الرخصه الجديدة

[AmRElSiSi]

الف شكر يا باشا
معلش متعرفش مصاريف تسجيل العقد قد ايه؟

[youssef1967]

مصاريف تسجيل العقد حوالى 700

[khalid_adel]

بسم الله الرحمن الرحيم

انا اشتريت من اسبوع كده عربيه بوما 2007 من واحد معرفة يعنى محتجناش و لا عقد ابتدائى و لا مقدم و لا غيره
المهم اتفقنا على المبلغ و اديتهوله فورى على مايعمل التوكيل و شهادة المخالفات
دلوقتى هو راح عمل توكيل شامل اللى هو للبيع للغير و كل حاجه

الرخصة لسه باقى فيها شهرين
انا المفروض انقل ملكيتها ازاى بعد الرخصة ماتخلص و هل هحتاج اروح الشهر العقارى تانى

نقطه تانيه ,, العربيه ملاكى قاهرة و انا من اسكندريه يعنى هحولها كمان ملاكى اسكندريه

ياريت كل الخطوات و المصاريف :b4_611:و شكراً

انا لسه عامل الكلام ده كله في اليومين اللي فاتو فخد من المفيد ان شاء الله وربنا يسهلك المواضيع
1-بص ياسيدي مبدئيا كده رسوم التسجيل لعربيتك 1187 جنيه ( انا مصور الجدول بتاع 2011 من الشهر العقاري) وحارفعه بكره لاني شغال بفلاشه دلوقتي
2-اوعي تستني لما الرخصه تخلص بجد بلاش ممكن تدخل في حوارات ورسوم وشهادات فالاحسن ابتدي في الاجراءات الرخصه (بعد ماتخلص التسجيل طبعا) قبلها بشهر ومش مشكله لو سيبتلهم كام يوم خليهاعليك بس خليك في المضمون
3-روح المرور الخاص بالعربيه وروح شباك استخراج شهاده بيانات من غير ماتشتري الاستماره ولا حاجه واسأله انا حانقل العربيه مرور كذا باسمي والرخصه لسه ساريه هل محتاج شهاده بيانات ( انا بعد ماوقفت في الطابور قالي مش محتاج الشهاده طالما الرخصه ساريه لكن لو خلصت لازم تيجي تطلعها من هنا)
4-تروح شباك المخالفات وتطلب شهاده المخالفات وان شاء الله يطلع مفيش مخالفات
5-تروح المرور بتاعك في الاسكندريه وتشتري ملف الفحص ونقل الملكيه (بيتباع جاهز ب 35 جنيه من جوه المرور وبره ب 40 ) هاتو من جوه احسن او قوله هو ب 35 معروفه
6- تدفع التامين الاجباري انا سنه كان ب 124 جنيه
7-تفحص وترفع البصمه ومتنساش يختملك على ورقه الطفايه ( انا طفايتي كانت موديل 2006 ووافقلي عليها كده ) وخد بالك حاول تهرب من المثلث والشنطه حايقولولك دي لازم عشان الظابط والملف ولا ليها تلاتين لازمه الوصل الاهبل ده الظابط مضي ليا عادي والناس لما كانت بتدي الوصل ده للموظف نقل المليكه بيقولو لا خليه معاك (تلبيسه ملهاش اي لازمه)
8- تطلع علي شباك نقل الملكيه (صور بطاقتك ) وطبيعي انه يوديك ويجيبك كام مره كده غلاسه عشان معدوش بياخدو فلوس او بالاصح الناس مش بتديهم خلاص احنا بعد الثوره مفيش رشاوي والحاجات ده الحمد لله
9-الموظف حيقدر الضريبه انا دفعت سنه ضريبه مع نمر الجديده 350 جنيه بالظبط تروح تدفع في الخازنه وترجع تاني لموظف نقل الملكيه عشان تديله الوصل (خليك صبور ومتتعصبش على الموظف ده بالذات مهما عمل فيك معلش ماهو خلاص مفيش رشاوي بقى الحمد لله )
10-بعد ماتخلص الملف مع الموظف حيقولك اقعد لحد ماتسمع اسمك ( انا قعدت بتاع 45 دقيقه تروح تفك النمر وتقعد) نده عليا اداني ايصال تسليم لوحات للمخزن المهم سلمت النمر القديمه ومضي على الوصل رجعت للموظف اديته الوصل يديلك الرخصه الجديده المنوره الجميله تروح بيها المخزن يسلمك النمر الجديده ومتنساش كيس المسامير
كده الحسبه
1190 تسجيل
المخالفات مفيش ان شاء الله بس في 5 جنيه رسوم كشف الكمبيوتر ومهاش وصل هو كده :)
شهاده البيانات ب 4 جنيه تقريبا بس انت ان شاء الله مش حتحتاجها عشان كده اسأل الموظف الاول
125 جنيه تامين اجباري لمده سنه
35 جنيه ملف الفحص ونقل الملكيه
350 جنيه ضريبه ونمر جديده
70 جنيه شنطه ومثلث بس متجيبهومش زي ماقلتلك ملهومش اي لازمه في اي اجراء
10 جنيه للراجل اللي ركنك وعلقلك النمر الجديده ان شاء الله او اللي يطلع منك ليه
اهم حاجه مطلعش جنيه لاي موظف ولا فني فحص لان خلاص مش محتاجين الكلام ده تاني بعد كده ان شاء الله
ومتنساش تدعيلي بظهر الغيب لما تاخد النمر ان شاء الله

[khalid_adel]

ان قلت اكمل الموضوع مره واحده ورفعت الصوره بالفلاشه عشان يبقى الرد وافي للكل بخصوص التسجيل

[pepsi007]

شوف يا سيدى فى الاول هتروح الشهر العقارى هتسجل لنفسك بالتوكيل اللى معاك وبعدين تروح على المرور التابع للسيارة تاخد شهادة مخالفات جديدة وشهادة بيانات للمرور التابع له وتاخد العقد المسجل وشهادة االمخالفات والبيانات وتروح على مرورك تنقل الملكيه وتفصح من جديد وتنقل بأسمك
المصاريف رسوم عقد المسجل
رسوم التراخيص الضريبه و التأمين الاجبارى
المخالفات ان وجدت
شهادة البيانات رخيصه
بس ادى كل الحكايه
الكلام دة كلو ممكن تعملو بعد ما الرخصه تنتهى او قبلها عادى هيضيفولك الشهرين على الرخصه الجديدة

كلام زي الفل

[Tarek_Swelm]

كلام جميل جدا بس عايز اضيف حاجة صغيرة
انا كنت بنقل ملكية من مرور ابيس لمحرم بية و كان لاز اعمل مطابقة بصمة في ابيس و علي اساسها طلعت شهادة بيانات و في محرم بية فحصت تاني و اتقارن الفحص بشهادة البيانات
و ليا صديق كان بينقل ملكية من القاهرة للاسكندرية بيقولي انة طلع شهادة بيانات موجهة لمرور الاسكندرية علشان يعرف ينقل العربية من القاهرة للاسكندرية
فبدل ما تدخل في دوخة و غلاسة موظفين , طلع بالمرة شهادة بيانات من القاهرة موجهة للمرور الخاص بيك في الاسكندرية علشان تخلص بدل ما يغلسو عليك و تضطر تروح القاهرة تاني
بالتوفيق ان شاء الله

[samoreception]

موضوع مفيد جدااااا

[AmRElSiSi]

الف شكر يا خالد باشا و جزاك الله خيراً

كده الواحد يروح و يبقى فاهم هو هايعمل ايه بدل مايتبهدل بين القاهرة و الاسكندريه

[party_0000]

الله يتور عليكوا يارجاله

[khalid_adel]

لا شكر على واجب يا عمور وربنا يقدرنا على الافاده زي ما بنستفيد من الناس اللي زي العسل اللي هنا
متنساش تطمنا عملت ايه
وياريت اي حد واجه الموضوع ده يكتب برضه هو عمل ايه