هى اسعار العربيات المستعمله اترفعت ؟؟؟؟؟؟؟

[Batman372]

انا بقى شايف عكس كلام حضرتك هو مين اليومين دول معاه يدفع كاش اللي هو تمن المستعمل
الجديد اسهل بكتير لناس كتير معهاش كاش عشان التقسيط في الجديد مسهل القصة
دا الواحد من دول ولد ولا بنت اول ما يشتغل يقوم محوشله 15 20 الف مقدم و يقوم جايب حته قسط

كلام حضرتك سليم جدا و واقعى ...
و معظم العربيات الزيرو دى كلها تقسيط ...
تحياتى ...

[aboomar22]

ماهو طبيعى سعر الجديد هيزيد والقديم و قطع الغيار والزيوت هترفع مش علشان الدولار غلى لا علشان الجنية هو اللى انخفض قيمته علشان كده بياثر على كل السلع سواء مستورده او محليه يعنى العربية اللى كان ثمنها 10000 جنيه مثلا بقى القيمة دى تعادل حوالى 11600 جنيه حاليا

[aliabdo]

بص الى بيبع عايز يشترى جديد او مستعمل اكبر و احسن فى الغالب فبيحكمه سعر السوق ؛ يعنى انا كنت حاجز ستيب واى على 81.5 و لما اتاخرت لغيت الحجز و رحت اشتريت اسكورت بالمقدم الى كان جاهز وقتها بعد ما لغيت اللحجز العربيه بقت ب 92 و العربيه الى معاى كل الى معاه زيها زود سعرها انا كمان لما اجى ابيع حبيع اغلى ما اشتريت عشان حشترى غالي ده الموضوع
لو حتجيب لى العربيه بالسعر القديم حبيع لك عربيتى بالسعر القديم ده خلاصه الموضوع مش فكره جشع من الى بي بيع الجشع من التجار

[magic girl]

و لسة كمان لما الدعم يتشال.. هتلاقي العربيات الجديدة اللي موتورها 1400 فما أقل ضرب سعرها عشان الإستفادة بالدعم.. يعني ممكن تلاقي الأكسيل بقت ب 37 و 40 عادي جداً d:

[x100]

هى الاسعار بتغلى لما تيجى تشترى انما لماتكون بتبيع السوق بينام
عن تجربه شخصيه انا معايا دوجان 1994 مريحانى ومظبتانى بس انت عارف البنى ادم طماع قولت ابيعها واجيب دايو ولا فيرنا اجى ابيع اللى يقوللى 22000 واكتر واحد 25000 فى ظل انا مشتريها من 7 شهور 27000 وغيرت عفشه وغيرت طقم دبرياج وظبتها وصرفت 2500
اجى اشترى بقى الاقى اكسنت 2000 1500 سي سي بيتكلم فى 42000 الاقى لانوس ون طالب 47000 الاقى اكسيل طالب 36000 نهائى
بصراحة قررت احترم نفسى واعتذرت لعربيتى وقتى جبتلها طقم كارتيرات وطقم طاسات جديده

[M_OSMAN88]

يا جماعة كل حاجة غلت يعنى قدامى تجربة واحد صحبى مستورد قطع غيار من تايلاند بيقولى هيقفل الشركة علشان مش عارف يشترى من الموردين لزيادة سعر الدولار وبالتالى زيادة السعر على تجار الجملة وكلة خايف يشترى و ممكن كمان شوية تلاقى قطع الغيار الجديدة شحت من السوق ودى مشكلة تانية