مساعدة في شراء سيارة بها توكيلين - خايف تكون نصب

[فرفوش]

السلام عليكم
استشارة قانونية عاجلة
هشتري سيارة فيها توكيلين ورخصتها مسحوبة وتنتهي في شهر 7 القادم
الراجل اداناي شهادة البيانات للمرور وهو معاه شهادة بيانات تانية للشهر العقاري عشان يعملي بها شهادة المخالفات والعقد المسجل باسمي ودفعت له جزء كبير من الفلوس والسيارة معي
كلمني منذ قليل وقالي ان المرور طالب شهادة البيانات الموجهه للمرور عشان لازم الشاهدتين يعني بكده هيكون معاه الشهاديتين وانا كل اللي معايا صور من التوكيلات والشهادات فهل اديها له عشان يخلص الاجراءات ولا كده خطر ويبقى معيش ورق للسيارة خالص ولا اعمل ايه انا مش عارف
ارجو ان يساعدني احد بسرعة ويقولي اقوله ايه

[ahmedhilmy]

حضرتك تطلع علي المرور التابع ليه السياره و تتاكد من صحه بيانتها عن طريق ملفها في المرور و ده اللي كنت لازم تعمله قبل ما تدفعله مليم بس ان شاء الله خير ثانيا متدلوش حاجه و رجلك علي رجله في اي مشوار يخص ورق العربيه و طمنا

[فرفوش]

يعني لو رحت المرور دلوقتي استعلم على العربية بمعلومية شهادة البيانات اللي معايا ولا ايه ؟؟

[ahmedhilmy]

يعني لو رحت المرور دلوقتي استعلم على العربية بمعلومية شهادة البيانات اللي معايا ولا ايه ؟؟

ايوة اعمل كده لو عندك فرصه انا قبل مشتري العربيه اللي معايا عملت كده بصوره الرخصه لانه فيها توكيلين برده و شفت ملف العربيه و تاريخ حياتها كله

[فرفوش]

طيب هو مش معنى انه طلع لها شهادة بيانات انها مش مسروقة
وهل معنى انه عمل عقد مسجل في الشهر العقاري باسمي انه كده مالكها الاصلي وهي كده ملكي
يعني لو عمل الخطوات دي ابقى مطمن ولا ايه رأيك
انا مش هطمن الا لماالرخصة تبقى في ايدي بس عاوز اعرف هو كده سليم ولا لا عشان مروحش امسكه اكتفه لحد ما يبان ليه صاحب يجيب لي الفلوس اللي خادها

[ahmedhilmy]

طيب هو مش معنى انه طلع لها شهادة بيانات انها مش مسروقة
وهل معنى انه عمل عقد مسجل في الشهر العقاري باسمي انه كده مالكها الاصلي وهي كده ملكي
يعني لو عمل الخطوات دي ابقى مطمن ولا ايه رأيك
انا مش هطمن الا لماالرخصة تبقى في ايدي بس عاوز اعرف هو كده سليم ولا لا عشان مروحش امسكه اكتفه لحد ما يبان ليه صاحب يجيب لي الفلوس اللي خادها

الفكره انك علشان تبقي مطمن تماما لن حسيت في كلامك بنسبه قلق بس الافضل انك تراجع ملفها برده حرص و لا تخونش بالذات في الأيام الجميله اللي احنا عيشنها دي

[mo7a_mo7a]

لازم تروح معاه المرور
وكمان تروح معاه الشهر العقاري وانت بتنقل
وخلي بالك انه لازم يطلع شهادة المخالفات علي رقم العربية القديم (الرقم الاصلي) والرقم الجديد كمان علشان متدبسش
وابقي طمنا

تخياتي

[FASTER]

روح معاه الشهر العقاري وبعدين الشهر العقاري مش بيطلب شهادة البيانات هو اللي ييهمه شهادة بيانات موجهة للشهر العقاري فقط أنما اللي موجهة للمرور دي بتاعتك متديهالوش لأن دي بياخدوها منك في المرور بتاعك وأنت بتنقل ملكية العربية بأسمك

[fadymedhat]

حضرتك العربية طلع ليها شهادة بيانات من المرور يعنى الملف موجود بتاع العربية.......
مفيش داعى تقلق او تروح مشوار مخصوص للمرور علشان تسأل على العربية

[فرفوش]

الحمد لله خلصت الاجرائات بخير
رحت معاه المرور والشهر العقاري والراجل كان متفهم جدا واستلمت تصريح التسيير المؤقت حتى تأتي اوراق السيارة للمرور التابع له ورخصتها لسنة
الحمد لله
شكرا للاهتمام من الجميع

[ahmedhilmy]

الحمد لله خلصت الاجرائات بخير
رحت معاه المرور والشهر العقاري والراجل كان متفهم جدا واستلمت تصريح التسيير المؤقت حتى تأتي اوراق السيارة للمرور التابع له ورخصتها لسنة
الحمد لله
شكرا للاهتمام من الجميع

مبروك يا باشا ربنا يباركلك فيها

[engamin]

خليك معاه خطوة بخطوة سواء فى المرور او الشهر العقارى لا تعطى الامان لاحد فى هذه الايام