طلب بخصوص بيع سيارة

[mima mostafa]

سلام عليكم
لو سمحت عندي سيارة موديل 2008 و الرخصة سارية 3 سنوات كنت عايزة اعرف اية هي اجراءات بيعها يعني مطلوب مني اية الاوراق او لازم اروح المرور ولا اللي بيشتريها هو اللي بيخلص كل حاجة معلش ياريت تفيدوني و شكرا

[Mostafa.Mahran]

لو هتبيعى بتوكيل يبقى المطلوب الاتى
1- اولا بيتكتب عقد بينك و بين المشترى و كل واحد فيكم معاه صورة و ده اثبات ان العربية مش معاكى من تاريخه علشان لا قدر الله لو حاجة حصلت العربية بتكون لسه باسمك بس العقد دليل انه اشتراها

2-بتجيبى شهادة مخالفات من المرور
3- بتاخدى صورة بطاقة المشترى و تعملى توكيل بالبيع للنفس و للغير و بلاش يتكتب فيه التجديد و التعامل مع المرور علشان ميجددش تانى باسمك و يضطر يسجلها باسمه

[mima mostafa]

لو سمحت يعني انا باخد صورة البطاقة بتاعتة وبعدين اروح الشهر العقاري بصورة البطاقة بتاعتة طيب هو لازم يبقى موجود و بعمل توكيل يعني للشخص دة معلش ياريت توضيح للنقطة دي وبالتوكيل دة مش ممكن ياخدها كدة و يتنصب عالية ولا اية

[Mostafa.Mahran]

ممكن يبقى موجود و تخلصو كل حاجة فى ساعتها يعنى العربية تبقى معاكى و هو موجود و الفلوس كلها معاه و تعملى التوكيل و تستلمى الفلوس


فى ناس مثلا لو العربية ب50 الف البايع بياخد 45 و ال5 الباقى لما يسلم المخالفات و الرخصة و التوكيل

[د.محمود صلاح]

الافضل انك تبيعي بعقد بيع مسجل في الشهر العقاري ...اضمن لك وله ... ولكن رسوم التسجيل هتكون عالية في حدود الف جنيه وهي على المشتري او بالتراضي بينكم ... المشتري طبعا يكون موجود او وكيله موجود ...... وطبعا لحد ما العربية تتقل ملكيتها له

الطريقة الشائعة هي البيع بتوكيل للبيع وده رسومه بتاع 50 جنيه وبيتعمل عقد بيع صوري بينكم ... لكن الطريقة دي غير مضمونة لان السيارة لازالت بإسمك في المرور وليس عندك مستند رسمي لبيع العربية الا العقد الصوري ده واللي لا يمكن الإعتداد به الا لو كان موقثا في الشهر العقاري ( الطريقة الاولى )

[S O P H O S]

راي البيع بعقد مسجل وليس توكيل زي ما قال الاخوة

[lad]

عقد مسجل فى الشهر العقارى و يمضى مشترى خليى بالك يمضى مشترى واوعى اوعى حوار التوكيل ده اوعىىىىىىىىىىى و تصرى على كدا واللى مش عجبه ميشتريش

[elmkaneeki]

official contract with the signature of the buyer

[mhDeeb]

عقد مسجل فى الشهر العقارى و يمضى مشترى خليى بالك يمضى مشترى واوعى اوعى حوار التوكيل ده اوعىىىىىىىىىىى و تصرى على كدا واللى مش عجبه ميشتريش

ممكن افهم اية المشكلة في التوكيل ؟؟؟ مصر كلها ماشية بالتوكيلات ؟؟؟

التوكيل دة بيتم عمله في الشهر العقارى يعنى مستند رسمى ان السيارة من اللحظة دى مش معايا

[lad]

يا فاندم وقت لما بيحصل حاجة بالعربية بيجيبو اللى الرخصة باسمه و بعدين انتى بقى تثبتى انك بيعاها وكدا فاليه من الاول