عاجل استفسار بخصوص فيات 128 للشراء

[saddam]

نصيحة حسبة لله تعالى يا أخي المواطن لو إنت لسه بتتعلم وده أول حظك في العربيات بلاش ال 128 عارف إركب تكتك وهين نفسك في مواصلات ولا تجيب 128 حتظلم نفسك وحتكره حياتك وحتعمل فيك مواقف بايخة في الشارع كتير وبدل محيبقه كل أصحابك دكاترة وصيادلة حياتك حتختصر على بلية واﻷسطوات حاول تحوش بأي شكل بأي طريقة ولكن ولا 128 ولا 127 ولا سيات ولا الحاجات دي متركتكبش جريمة في حق نفسك ولو على السواقة أي مكتب سواقة بيديك 7 حصض ب 200 جنيه إبقه خشلك دورتين ورا بعض أنا عارف إنك بالظغط المادي مش حتسمع كلامي بس صدقني بكره لما تشتري وحتصعب عليك نفسك إبقه إفتكر مواطن نصحك حسبة لله تعالى وإداك خبرة سنين ببلاش وإنت مشتريتش منو ودمتم

[moury]

والله ناس كتير بتخوفنى من ال 128 بس هنعمل ايه فى الحكم المادى

المهم انا قدامى سوزوكى ماروتى موديل 1996 حالتها كويسة بس لسه هخلى ميكانيكى يبص على موتورها وعفشتها بس الفكرة انها بتاعت اخت واحد زميلى فمكنتش بتجهدها اووى فى الحركة يعنى
مش عارف فيها كماليات ايه بالظبط

هو بيتكلم فى 15 الف غالبا يعنى

ايه رأيكم ؟؟؟

انا بصراحة قلقان لان فيه اكتر من جد خوفنى من الماروتى لدرجة انه قالى ال 128 احسن منها
خصوصا ان موتورها 800 سى سى قالى مش هتسافر معاك وكمان عايزاك لوحدك يعنى متركبش معاك ناس كتير يعنى اقصاها اتنين كمان معاك ويكونوا احجام خفيفة
هل ده حقيقى ولا ايه ؟؟؟
من الاخر اللى قالى قال ان العربية دى عربية حريمى اكتر منها رجالى يعنى عايزة بنت يكون مشاوريها داخلية بسيطة

ايه رأيكم ؟؟

[aboomar22]

سعر السوزوكى حلو وبعدين انت عندك فرق 20 سنة بين الموديلين ومتخفش من موضوع ال 800 سى سى هقول لحضرتك حاجة شفت العربيات السوزوكى الفان اللى بتشتغل فى بنها واظن هتلاقيها عندكم فى المنوفية العربيات دى بتحمل 7 افراد غير السائق يعنى 8 افراد طول النهار شغالة وبتلقيها فى طرق السفر كمان ماشاء الله او محملة بضائع ومسافره هنا وهناك عارف موتورها كام سى سى 1000 سى سى او بالضبط 970 بالمقارنة بعربية صغيرة راكب فيها شخص او اسرة صغيرة هيبقى كويس قوى وبعدين مواتير سوزوكى مواتير ناعمة واقتصادية فى البنزين جدا --ربنا يوفقك لما فيه الخير

[moury]

فعلا عندك حق والله فى كلامك

ان شاء الله انا هشوف العربية بتاعت اخت زميلى دى
بس المشكلة انه فى واحد زميلنا كان قايله لو جيت تبيعها هشتريها منك فهو قالى معلش هوريهاله الاول ولو مرضيش ابقى شوفها انت وخلص فيها
خايف بصراحة تطير لانى حاسس انها كويسة وكمان لانى فعلا خلاص باذن الله وبعد استخارة نويت على سوزوكى ماروتى وهنسى موضوع ال 128 ده
بس المشكلة انه مش قدامي هنا فى الشرقية ماروتى كتير او يكاد يكون مفيش اصلا

وبفكر انزل سوق الجمعة بس للاسف معرفش حاجة هناك ومروحتوش قبل كده وكمان خبرتى ضعيفة جدا جدا ومليش علاقة بميكانيكية عشان اخدهم معايا حتى
محتار والله ربنا ييسر

[moury]

استاذ ابو عمر

دى معلومات العربية اللى قدامي :

سوزوكى ماروتى موديل 1996
المواصفات كالتالى على لسان صاحب العربية ( اللى هو زميلى فى الشغل بس دى عربية اخته )
هو كان شاريهالها من سنه وعلى كلامه ان العربية هو مغيرلها الفتيس تقريبا لسه قريب وبيقول انه جايبه استيراد ... عامل عمرة للموتور من حوالى 9 شهور تقريبا وللعفشة بتاعتها
على كلامه برضه ان العربية كاساسيات كويسة جدا جدا وقالى لما هتركبها هتحس بده فى نعومتها على الطريق
العربية مش راشة لا بره ولا جوه
عامل كسوة للصالون جديدة ( يعنى ايه كسوة ؟؟ يعنى متنجد جديد ولا ايه قصده ؟؟ )
العربية فيها كاسيت وسماعات ستريو
العربية محتاجة تترش بره للنضافة مع العلم انه مش ظاهر فيها اى خبطات خارجية
العربية محتاج يتغير فيها الاكصدام الخلفى لانه مكسور والامامى للنضافة بصراحة
وشوية حاجات فى الشكل من بره زى الجلد بتاع الباب وكده
والازاز الامامى مكسور بسبب المظاهرات اتحدف عليه طوبة وهو بيقول هيغيره الاسبوع ده ان شاء الله
العربية رخصتها تقريبا انتهت وهتحتاج نقل ترخيص من القاهرة للشرقية وتجديد رخصة طبعا

سؤالى بقى العربية دى تعمل كام سعر ؟؟
ولو عايز اتاكد من كل الحاجات اللى هو قالها دى اتاكد ازاى يعنى ميكانيكى ولا سنكرى ولا عفشجى ولا ايه ؟؟؟
وياترى الاكصدامات والحاجات دى الاقيها فين وتتكلف كام ؟
ورش العربية من بره يتكلف كام برضه ؟؟
وهل الرخصة تقلل من سعر العربية ولا لا ولو اه تقلل كام تقريبا ؟؟
وسؤال اخير هل الماروتى قطع غيارها متوفرة زى ال 128 فى الشرقية بالذات ولا لا ؟؟
واخيرا هى افضل ام فيات 128 ؟؟؟؟؟؟


وشكراااا مقدماااا